mylonghouse.blogspot.com

CHERITA TAMPUN ANTU PALA

2011-12-10T18:47:00.000-08:00

Cherita sida ke tuai terubah mungkal menua Drau ditu dulu kelia asai ti enda tentu ulih kenang serta ditemu ditusoi ditu magang. Iya ti disebut ditu semina sekeda iya ti ampit dikingat lalu ditusui urang ti tuai ngagai kitai pasal penatai sida ngagai menua tu dulu kelia. Kitai tu nampung sida iya ti dulu suba sida ti pindah kitu apin penatai Rajah James Brooke ka menua Sarawak tu menya.

Nyadi menua Krian senentang tu maya nya kelia semua agi puang magang, kampung baung apin bisi mayuh mensia nguan iya. Nyadi naka urang ti bisi ditemu sida ngachir pendiau diau belindung belalai dalam babas ba lubang batu ditu nya bansa Seru enggau Beketan. Bala Seru betuai ka Guling, lalu bala Beketan betuai Meragasing. Sida tu enggai tentu meda kitai Iban. Urang dua bengkah tu diau nabur sebelah babas di menua Krian ditu. Sida nya suah dipeda bejalai, belalai, lalu belindung ba siti tingkah tebiang batu tebing ai Krian lalu sebengkah agi enda jauh ari kubur tu kumbai kitai lubang munsuh.

Bala Seru pansut ari lubang nya lalu deka ngachau munuh kitai Iban lebuh maya ba umai tau ka maya kitai gawa kediri. Raban urang dua bengkah tu nadai tentu mayuh tubuh ti ayan dipeda siga-siga pendiau tang taja bakanya sida tu enggai nunduk ka Iban. Nyalai bala Iban ti tajam agi ati enggai surut nadai deka nunduk ka urang ti bakanya ngejung ka pengawa bebunuh bekayau pangan diri. Nyadi sekeda bala Seru iya ti ulih kaul Orang Kaya Temenggong Tandok anak Daap dianjung iya ngagai Imam Molana ka Kabong convert jadi Islam. Nyalai ari pengawa ti bakanya tadi Orang Kaya Temenggung Tandok bulih reta ti dikinginka urang ti ngalah rumah sida iya ti ditemu kitai Tembawai Alah diatu.

Menua Sarawak rambau nya menya mensia apin tentu bisi atur adat ti terit merintah menua lalu raban ke kering berani nya ka lalu empu menua ti tampung bala ichit-wit sida iya diatu. Nyadi aki ini kitai Drau tu lalu nemeran bempu menua ditu nyentuk ka ditampung tubuh kitai datai ka sehari tu. Pemar pemedis sida ti mungkal menua tu enda tentu ulih dikerandau kitai diatu tanda iya meh nya ti dipeda kitai Antu Pala baka ti disimpan dalam Lumbong Bundak enggau Saban ba pendam Kaki Wong.

Apin sida Jabas, Manju, Beti, Chuk, Gila, enggau raban sida pindah ari Melupa ka Drau kitu Seru enggau Beketan endang udah bisi ditemu dulu diau ditu tang sida nya nadai tentu entap pendiau rari alah laban kitai Iban. Udah nya kelia sida nya nyau pambar pendiau bala Seru betuai Guling, Gambang, Tanggai, Seguat pindah ka Tengalat, Senyawan Krian enggau Tebujang Ulu Awik. Enda lama udah nya suba kitai nyau bebaik nadai tentu bepenyarut agi begulai enggau pangan diri. Nyadi bisi siku indu anak Mamju seduai Chemuring ti benama Daong menyadi Jagit, Melana, Bulik ti nurun kitai Drau tu belaki ngambi Seru ke benama Sugom. Seduai iya begulai nadai beranak tauka punas, Sugom seduai Daong begulai enggau kaban sida iya Seru ti benama Riyu diau di Elas Krian. Sugom seduai bini iya Daong kadang-kadang diau begulai sebilik enggau ipar iya Jagit anak Manju bumai betaun diau di menua Elas. Nyalai nyentuk ka diatu kami Drau enggau Sebubu agi meruan mengkang bisi temuda buah tanah kebun getah di Kaki Bukit Tengalat nya dia alai bala kami selalu pereman bumai ngelama tu. Sungai Elas tu bepati ba Batang Krian tebing kanan mudik beseberai enggau rumah panjai sida TR. Sagi Klua diatu. Nyadi Beketan ti betuai ka Meragasing, Merajalin, Agan, rari ngulu ka Krian nitih sida Entigu, Entiggi, Entigar ka Paku Layar Seribas.

Raban aki ini kitai ti angkat ari Sebaru Kalimatan Indonesia betuai ka Padang anak Ligam enggau bala iya Ningkan, Pijih, Jarop, Medan mayuh menua ditengah alai ngetu bumai betaun dulu tang sida agi apin tembu ati endor ngentap ka diri. Nyalai agi mansang ngiga menua baru terengkah di Rimbas dia endang udah bisi diuan urang. Mati Padang diganti anak iya ti nama Gunggu angkat ari Rimbas melungang Bukit Legong ka Melupa berumah di Ng. Meramoh bumai betaun di Batang Melupa terus ka Ili Melupa. Lepas Gunggu diganti anak iya ti nama Garai berumah di menua ti dikumbai kitai Tembawai Alah diatu. Nyalai laban rumah sida ke dialah munsuh kitai pindah ka Krian tengah kitu. Rambau nya menya menua Sarawak tu apin bisi adat lalu mensia ngena pemerani ngena pengering sapa lembut alah iya ti kering menang. Nyadi bisi bala perintis (poineer) urang ti dulu ngambu menua tau alah laban urang ti datai dudi kering berani ti deka ngaga rita mansut nama diri empu rambau nya dulu kelia. Sida nya nadai beduli ka nyawa diri mati ngambi ka jadi kenang urang baka iya ti disebut ditu.

Nyalai utai ti disebut ditu iya nya antu pala lama udah ditaruh dijaga diibun kenyau ari dulu kelia dibai mindah nitih ka kitai nyadi diatu iya dianjung ka pendam. Antu pala nya ulih dengah bala pengayau jeman kelia menya tu jadi ka pesaka kitai ti ichit-wit sida iya. Nyadi asai iya ke diatu kitai enggai agi naruh iya di rumah laban nya kitai nemu anak nembiak mayuh enda tentu nemu guna jalai ngibun baka urang ti tuai dulu kelia. Nyadi tu sebayan begulai enggau kitai di rumah panjai penemu indu nembiak nya antu. Diatu iya dianjung ka pendam diatur kami iya enda ditumbak ka dalam tanah awak ka agi ngayan dipeda kitai iya udah dikemas. Nambah ka nya awak ka sida ti dudi jemah ila nemu pengawa kitai Dayak ti dipelandik ka urang kena ngulih nama ngulih rita.

Pala tu semua nya utai lama magang dia bisi dua bagi iya ti ditusuk nya lama bendar lalu iya diringka nya ti baru agi. Tang taja bakanya semua nya udah manggai ngagai ratus taun udah dikembuan. Bisi dibacha ba History Dayak headhunters tu awak ka nyadi nyata dipeda nyentuk ka sahari tu. Tang iya ti bendar utai tu ulih bala pengayau ukai baka kitai ngasu jelu ari babas ambi ka empa. Sebengkah agi kebuah laban nunjuk ka pemendar sida ti matak raban kitai pindah kitu kelia. Kitai di Drau tu mayuh udah serak tubuh nampung menapung urang ti mungkal menua tu kelia lalu bekau tembawai sida ke tuai suba agi mengkang ditemu kitai magang. Bakanya mega cherita asal penatai aki ini mengkang ditemu dalam tusut sida ti berumpang besawang menua tu. Tang iya ti bisi pegari nama nya semuti Gila seduai Daji ti empu Tampun Antu Pala sebelas 11 igi disebut ditu. Tu ukai semina ulih seduai iya kediri aja. Iya nya sama ulih sekeda kaban pengayau ti bukai ampit basah jari enggau seduai iya.

Cherita ti ditulis ditu nampung tusoi sida ti bisi pengingat ke penatai urang ti dulu kelia menya. Cherita nadai urang nulis iya semuti didinga pansut ari mulut tusoi ngagai rebak ke dudi. Nyalai utai tu mar bendar dicherita ensera sepi aku nadai ulih dibetul ka nitih iya ti asal ti bendar jadi dulu kelia. Nyadi iya ti dipeda kitai diatu abi kaki abi jari sida ke berumpang besawang menua tu temuda bali rimba serta pesaka lama tampun Gila seduai Daji enggau raban sida iya.

Pala munsuh tu ditaruh nitih ka penyiru penau penti pemali sida ti tuai dulu kelia belama disalai ditepok atas bedilang para dapur serta diberi piring asai ai lebuh maya kitai ti bisi begawai bedara ka macham utai ti bisi jadi ba rumah kitai ditu ngelama tu. Bakanya mega lebuh ke pindah berumah, Antu Pala tu nadai diempilita pia aja iya diangkat ngena adat serta piring ading. Nyalai urang ti ngibun utai tu kenyau ari dulu kelia milih urang ti patut alai engkah iya. Urang ti bulih empu dengah semua nya semuti rita enggau nama ditemu kitai nyalai enti nasit sida nadai pala sida tau empu urang. Lepas ari TR. Jabas diganti TR.Bundak jaga ngintu tampun antu pala tu Bundak bebini ngambi Marai uchu Jabas tambah agi Bundak tu uchu Orang Kaya Temenggong Tandok ti dialah ka munsuh rumah lebuh sida nadai ngadang di rumah panjai sida ti disebut kitai Tembawai Alah diatu. Mati Bundak ganti rebak serak uchu ambu iya ngibun jaga tampun antu pala tu suba. Penudi tu kamari diraran atas ruai Penghulu Garan lalu disetuju anjung ka pendam Kaki Wong begulai enggau lumbong Bundak seduai Saban. Saban tu menyadi Bundak sama anak Mawat . Mawat anak O.K. Temenggong Tandok.

PENGAWA MINDAHKA ANTU PALA
Nyalai bepun ari Aum kami ba Balai Raya lama kena 23rd.April 1995 rumah Ng. Drau, Sebubu, Mapar enggau Sg. Engkabang deka meresi serta ngaga ringkat kai tanah kubor Kaki Wong laban nya digaga nyadi kubor Christian. Nyalai lebuh nya kamari bala berunding lalu deka ngadu rumah Lumbong Bundak ke udah runtuh laban jelu makup, tulang Bundak seduai Saban nyau betabur sebelah tanah. Nyadi jaku lebuh nya disetuju ka magang lalu utai ti diperundingka bakani tauka dini alai kitai ngiga duit kena ngaga utai nya. Dia bala mayuh nuduh Penghulu Garan enggau aku (TR.Sabai) berandau enggau YB. Datuk Peter Tinggom (Niang) ngiga fund kena gaga lumbong nya baru. Nyadi peminta nya kamari lalu disetuju ka Datuk Peter Tinggom digaga baru serta meri duit kira ungkus ngaga Lumbong nya. Ungkus ngaga tu suba tau disebut ka besai iya ukai semina ngaga langkau aja serta kami meli BATU PENGINGAT ari Kuching sesingkap ditulis nama Bundak enggau Saban dia. Udah ditemu semua ungkus penyampau belanja diberi Y.B. Datuk Peter Tinggom kami duai Penghulu Garan ngasuh Timban seduai Bajai ngaga iya datai ka nya tembu. Lepas nya suba kami agi ngeluas semua utai ditu nebas ngeranchun rumput enggau kayu ti besai-besai.

Nyalai 1st.September 2002 Timban seduai Bajai berengkah ngaga rumah lumbong nya. Udah tembu rumah lumbong kemari kitai lalu berunding ngasuh kaban kitai ditu Bujang Berani Mr. Jelemin anak Saguh (Niang) ngelumu sekeda tulang Bundak seduai Saban ti agi bisi ngachir ba tanah laban makup disimpan ngagai tajau. Semua pengawa nya diadu ka nitih atur adat Iban chukup enggau piring, enselan munuh babi siku berat 70 kati tambah manok siku. Sehari nya semua kitai ari empat buah rumah panjai tu dipinta sama datai ngulu pengawa tu Ng.Drau, Sebubu, Mapar, Sg.Engkabang dibai kia magang. Makai ngirup semua nya disedia ka begelumu ba bansal Rumah Pesaka Kaki Wong dia magang. Lepas nya kamari kitai gawa gutong ruyong ngaga panti semin ari baruh nyentuk ka atas kin nyadi duit kena meli semin begumpul ngena chara semeri nambah duit teda bebeli ka rachun kena machit rumput enggau meresi kubor dia. Udah nya kamari kami berunding mai urang mayuh meda pengemas antu pala ti udah dianjung kia ka.

Dulu menya Lumbong tu selalu alai urang nyabong disebut urang menya nyabong kai lumbong lalu sida mai piring lalu ngadu iya ti bisi jai serta nebas ke ngelingi ditu. Tu ingat aku lebuh maya kami ti agi bermit suba bisi sekali dua meda urang nyabong ditu lebuh Linggi seduai Ngabong ngelumu tulang Bundak ti tekusai kerumbak makup kelia. Lebuh nya mayuh mensia datai kitu baka ke begawai pengawa lebuh nya suba. Nyadi nyau dudi tu kamari kitai serumah bisi ngajung piring kitu lebuh maya gawai Dayak betuai ka niang aki John (Senin anak Umbol) begendang udah lepas miring ditu pulai ka rumah ngintu gawai. Iya nya apai TR. Gana ke diatu.

Kena 27th.June 2003 Jelemin, Jawa, Ricky Nelson, Dudum ngangkat Antu Pala 11 igi tu ari rumah panjai Ng. Drau serta ngemas nya ngagai langkau lumbong. Sida tiga iya nyangkah antu pala tu niti rumah panjai kami Drau nyentuk ka tengah laman lalu dientudika enggau gendang terus ka kubur enggai ka nya salah peninga rantu jalai. Utai nya jaku urang kelia tau pulai pemali ngagai kitai ti mai enggau mindah iya.

Penghulu Garan, Lr. Gana enggau aku empu madah ngagai kitai serumah deka mindah ka semua antu pala ditu ngagai langkau lumbong Bundak ti udah tembu gaga Timban seduai Bajai. Atur pengawa kitai deka ngena piring serta enselan mindah ka iya. Nyalai apin mindah ka nya suba aku dulu madah ngagai apai Mulok (Niang Empawi ak. Minggat) Antu Pala tu, deka dipindah ka begulai enggau Lumbong Bundak ba kubur Kaki Wong dia. Nyadi Empawi ngasuh serta setuju ka runding nya kamari enggai ka nya dibuai pia aja jemah ila nadai urang tentu deka ngintu iya. Laban meda kitai serumah tu semua udah masuk Kristain magang lalu mayuh pengawa urang ti tuai dulu kelia mansang abis nadai agi tentu dikingat ka nembiak rebak kemaya diatu. Nyalai sekumbang kitai tu agi ulih meda manah ga antu pala tu dianjung ka pendam. Tu jaku Empawi anak Minggat, sama waris urang ti ngibun antu pala tu suba. Kami mai urang mayuh meda pengemas antu pala ti udah dikereja kami disikap ka di pendam Kaki Wong ditu.

Nyalai kena 13th July 2003 kenyau ari pagi sehari tu kitai empat buah rumah tu sama sedia nganti pengabang ba station bus ditu. Sida YBs enggau semua bala mayuh teribit datai Penghulu Garan enggau YB. Datuk Peter Tinggom mai bala tuai-tuai kitai ditu serta YB. bukai niki ka atas ngagai Lumbong pagi nya. Awak ka sama meda gamal pengemas lumbong tu udah diadu baru. Ba Lumbong din aku bisi bejaku nerang ka naka pengawa ti udah dikereja ngagai urang mayuh ke datai dia.

Malam nya semua urang ti datai dibai ka rumah panjai kitai magang lalu diintu baka ti ngenta ka pengabang. Aku bisi bejaku ngari kai kitai serumah nerang ngagai urang mayuh malam nya naka utai ti udah gaga kitai lalu nusui kitai Drau tu agi nganjung antu ka pendam Burui Melupa dulu kelia apin kitai nganjung antu kitu. Nambah ka nya aku bisi nyebut ANTU PALA tu deka disikap ka baru awak ka iya manah agi alai ulih dipeda urang ti mansa menua Kaki Wong ditu jemah ila. Nyalai diatu kitai semua nemu Kaki Wong tu deka mayuh bansa urang mansa Loji Ai berengkah digaga ditu.

Dikingat serta dikarang Ex. Cikgu TR. Sabai ak. Kadam

MAJLIS MEMPERINGATI MAKAM (LUMBUNG) BUNDAK & SABAN - 26.11.2011

2011-11-26T20:05:00.000-08:00

Baum ngatur program pengerami "Majlis Memperingati Makam (Lumbung) Bundak enggau Saban" di Dewan St. Jerome's, Kaki Wong.
Sekeda ari kaban komiti
Nusun Antu Pala sereta ngelekatka cermin baru endur nyimpan Antu Pala ba dalam Lumbung Bundak & Saban kena 25hb November 2011.
**********

Ngelekatka cermin baru endur nyimpan Antu Pala.

Penghulu Garan enggau sekeda raban komiti begambar ba mua Lumbung Bundak enggau Saban.

Pagi 26hb November 2011, Pengerami belabuh enggau penatai YB. Tuan Jelaing ak. Mersat, Timbalan Menteri Pengangkutan Malaysia 1 merangkap Ahli Parlimen P.205 Saratok enggau raban iya.

YB Jelaing enggau semua ti bisi datai sama dibai niki ngagai Lumbung Bundak & Saban .

***********

*********

YB. Tuan Jelaing, Mr. Laga Kueh (Wakil Pegawai Daerah Saratok), Mr. Chambai Lindong (Legal Advisor YB. Tuan Jelaing), Penghulu Garan, Mr. Entika Gumbang enggau bala bukai begambar dalam lumbung Bundak enggau Saban.Meratika "Batu Tanda" dalam lumbung Bundak enggau Saban.

Penghulu Garan nusui cherita lumbung Bundak enggau Saban.

"Piring Tujuh" dalam lumbung.

Lumbung Bundak. Repik sentubung agi ulih dipeda ba atas tanah tumbuh. Tulang niang Bundak disimpan ba dalam tajau.

YB. Tuan Jelaing nemuai ngagai tapak gereja St. Jerome's ka baru sebedau mulaika diri ngagai dewan St. Jerome's.Terenah duduk dalam dewan St. Jerome's.

**********

YB. Tuan Jelaing enggau Penghulu Garan.

Ex. Tr. Sabai enggau Kauselor Tr. Uju.

Sekeda bala ka bisi datai.

Jaku pengelalu ari Penghulu Garan ak. Chunggut.

Ex-Tr. Sabai ak. Kadam nusui penatai urang ka tuai numbuh menua Drau enggau Kaki Wong, Tusut peturun Bundak enggau Saban, sereta cherita penatai Antu Pala.

***********

Ucapan YB. Tuan Jelaing ak. Mersat, Timbalan Menteri Pengangkutan Malaysia 1, merangkap Ahli Parlimen P. 205 Saratok.

***********

********* Penghulu Garan nyurungka cenderahati ngagai YB. Tuan Jelaing, diperatika Mr. Laga Kueh.

Majlis merarau nutup pengawa pagi nya. YB Jelaing enggau bala pengabang bukai mulai ka diri dalam pukul 12.30 tengahari.

Sambutan Hari St. Jerome's 2011

2011-10-18T01:36:00.000-07:00

Pengerami ngintu Hari St. Jerome's 2011 udah diatur kena pagi hari enam, 15 Oktober 2011 ba Dewan St. Jerome's Kaki Wong. Sekeda ka bisi datai lebuh maya pengerami tu kemari ianya Reverend Fr. Stephen Ngabong, Vicar Gereja St. Peter's Saratok. Reverend Fr. Winston ari Gereja St. Micheal di Engkelili, raban indu gereja St. Peter's Saratok, raban ari gereja St. Micheal, Engkelili enggau semua ka diau bekelingi menua Kaki Wong ka sama enggau bekunsi gereja tu.

Reverend Fr. Stephen Ngabong ngepun ka pengawa pagi nya enggau sembiang "Merkat Tanah' ba tapak gereja St. Jerome's ti baru.

Sekeda bala ka sama bisi begelumu lebuh maya sembiang 'Merkat Tanah".
Langkar rumah gereja St. Jerome's ti baru.

Ari kiba ; Mr. Bayai Bungin, Lr. Mr Jullius Illai Sagat, Rev. Fr. Stephen Ngabong, Lr. Mr. Alfred Gana Senin enggau Puan Josephine Entira.

Nyendiaka meja kena sembiang.

Yang Berbahagia, Datuk Amar Dunstan Endawie ak. Enchana, siku ari bala ka bisi datai meri sukung ka pengawa tu bisi bejaku pagi nya.

Rev. Fr. Stephen Ngabong, Penghulu Garan ak. Chunggut enggau raban gereja St. Peter's Saratok.

Raban indu gereja St. Peter's Saratok.

Jaku ari Penghulu Garan ak. Chunggut, ari kiba nya Mcee Mr. Alexander Sela.

Bala ti bisi begelumu ba Dewan St. Jerome's pagi nya.

Nyendiaka diri ka melah Kek Hari St. Jerome's. Komiti kek Hari St. Jerome's diuluka Puan Imbok Illai enggau Puan Roselind Suda.

Rev. Fr. Stephen Ngabong, Datuk Amar Dunstan Endawie, Penghulu Garan enggau bala bukai begambar enggau Kek Hari St. Jerome's.

Sumbangan ari Mr. Jeti Datuk Amar Dunstan Endawie.

Sumbangan ari Mr. Bilun Nunoi.

Sumbangan ari gereja St. Peter's Saratok, RM2000.00 (Dua ribu). Terima kasih ngagai gereja St. Peter's Saratok.

Bini Fr. Winston (Pn. Juliana) begulai enggau raban indu ari gereja St. Micheal, Engkelili. Bala ari Engkelili datai lebih kurang dalam pukul 12.00 tengahari.

Mr. Umar Jaga enggau bala ka bukai ari Engkelili.

Jaku ari Rev. Fr Winston, ari gereja St. Micheal, Engkelili.

Sumbangan ari gereja St. Micheal, Engkelili. RM300.00. Terima kasih ngagai gereja St. Micheal.

Bala indu betanda ngiring penyanyi ari Engkelili, Fr. Winston.

Penyanyi ari Kaki Wong.

Jaku ari Mr. chambai Lindong, Ketua Pemuda SPDP pampang Saratok. Mr. Chambai limpang ari pengerami ka diulu YB Tuan Jelaing Mersat ka sama sereta diatur pagi nya di Lempa, Kabo.

Fr. Winston, Mr. Niu enggau Tr. Blaki.

Bala ka bisi datai lebuh pengerami tu kemari sama bisi meri pemeri (sumbangan) dikena ngaduka gereja ti baru tu. Penyampau duit ti ulih dikumpul pagi nya lebih ari RM6000.00 (Enam Ribu Ringgit). Terima kasih ka semua pemeri lalu ngarapkan ari pemeri tu ulih nulung pengawa ti nirika gereja baru tu enggau jampat agi.

PENGERAMI NIKAH NONY MINA JIMMY & TANZARI UDIN NILLY, 29 MAY 2011

2011-05-30T07:09:00.000-07:00

Peniki bala pengabang enggau raban pengantin lelaki ari Rh Baling, Penurin, Betong jam 10.30 pagi.

***

***
***

***

Terenah duduk ba ruai pengantin indu

Lr. Julius Illai Sagat ngepun pengawa merekat ka pengerami pagi nya.

***

Pengantin lelaki enggau indu

Sesi begambar

***

Jaku Melaki -Bebini, Lemambang Geraman ak. Undau

***

Bala MC, Mr. John Edward, Justin Utik, Anderson Anyun & Mr. Bayai Bungin

***

Jaku lalau ari apai Pengantin Lelaki

Jaku lalau ari Mr. Jimmy, apai Pengantin Indu

Besurung tinchin, diadukan Lr. Julius Illai

Simpul jaku ari Penghulu Garan ak. Chunggut

Melah Kek Kawin

***

Tembu pengawa mutung kek kahwin, ditampung enggau pengawa nyibur ai pengantin. Badu merarau tengah ari, pengawa Barisan lalu belabuh, lalu ditampung enggau pengawa beperindang. Raban pengantin lelaki mulai ka diri ke Penurin, Betong udah semua program lemai nya tembu.

Jalai Besemin (Jambatan Kaki Wong - Rumah Panjai & Sekula)

2011-01-08T21:26:00.000-08:00

****
****
****
****

****

Terima Kasih Perintah, Terima kasih Majlis Daerah Saratok....

2010-12-30T19:52:00.000-08:00

SELAMAT TAUN BARU 2011

*****

NGAJIHKA TAUN BARU 2011 TU MERI BERKAT DALAM PENGIDUP, PENGERAI ENGGAU PENGAWA KITAI SEMUA, LEBIH AGI ARI TAUN-TAUN KA UDAH.

*****

From

*****

Dom Nambi ak Sabai & Family

MAJLIS ULANG TAHUN KE-1 PERGERAKAN WANITA SPDP KRIAN TENGAH BESERIMBAI ENGGAU PENGERAMI HARI MALAYSIA, 16.9.2010

2010-09-18T21:53:00.000-07:00

Pengerami ngintu ulang tahun ti ke-1, Pergerakan Wanita SPDP, pampang Krian Tengah udah diatur lalu dipenyadika Menteri Muda Pemodenan Pertanian Sarawak enggau Timbalan Presiden SPDP, ADUN N. 34 Krian Datuk Peter Nyarok ak. Penghulu Entrie. Pengerami tu diatur beserimbai enggau Hari Malaysia, 16hb September 2010 tu tadi. Rakyat ka diau kelingi menua tu ari Nanga Drau, Sungai Engkabang, Sebubu, Mapar, Melak, Kawit enggau Roban sama sampal bisi datai.****** ******

YB. Datuk Peter Nyarok ak. Penghulu Entrie (tengah), Penghulu Garan ak. Chunggut, Mr. Bayai Bungin enggau TR. Intai ari Mapar.
******
Ucapan YB. Datuk Peter Nyarok ak. Penghulu Entrie.
******

Lemambang Geraman ak. Undau miau kek 'Hari Malaysia' diperatika (ari kiba) Penghulu Garan, Puan Josephine Entira, YB. Datuk Peter Nyarok enggau Mr. Bayai Bungin.

*******

Puan Josephine Entira ak. Sagai, Ketua Pergerakan Wanita SPDP pampang Krian Tengah nguluka YB. Datuk Peter Nyarok melah kek 'Hari Malaysia' lalu diperatika bala bukai ka bisi datai.

YB. Datuk Peter Nyarok enggau Datin, Puan Josephine Entira, Puan Dius, Mr. Bayai Bungin enggau raban indu begambar enggau kek 'Hari Malaysia'.

*******

Pekit ngaga pua 'kain tampung seribu', barang ari marik enggau barang anyam nyadi siti ari program ti diaduka raban indu SPDP pampang Krian Tengah rambau pengerami tu kemari.

Puan Josephine Entira ak. Sagai, Ketua Pergerakan Wanita SPDP pampang Krian Tengah nyerahka cenderahati ngagai YB. Datuk Peter Nyarok ak. Penghulu Entrie.

Cenderahati, gambar Majlis Pelancaran Pergerakan Wanita SPDP pampang Krian Tengah kena 19.4.2009 ulih YB. Datuk Peter Nyarok enggau YB. Encik Jelaing Mersat.

Raban indu SPDP mandangka pengelandik belagu enggau betanda kena ngerami pengawa sarinya.

******

Penyanyi berbakat ari Nanga Drau.

******

LR. Julius Illai ak. Sagat ngesuhka sera nyawa diiring bala raban indu SPDP.

Mr. Anthony....siku ari penyanyi Nanga Drau benung ngansar ka kaki.

******

Enda chukup di dalam, sambung agi ba luar dewan...

Puan Dius, pengari ari Roban.

Mr. Temenggung, penyanyi ari Sungai Engkabang Ulu.

Mr. Justine, Mr. John Edward Mengga enggau Mr. Bajai.

Serambau enggau pengerami tu, YB. Datuk Peter Nyarok ak. Penghulu Entrie mega bisi mantaika langgur perintah ti deka ngaga Loji Ai Kaki Wong, beungkus RM100 Million. Projek tu deka digaga ari baruh projek NKRA lalu disadang tembu sebedau taun 2012.

Diambi ari surat khabar "The Borneo Post", 17 September 2010.

'GROUP PRAYER' DIIRING RABAN ARI GEREJA ST. PETER'S SARATOK, LEMAI 13 AUGUST 2010.

2010-08-28T19:30:00.000-07:00

***
***

***

CHERITA DANGGAT ENGGAU UNGGAT

2010-07-24T07:35:00.000-07:00

Danggat seduai Unggat datai kitu bedagang ari menua sida di Batang Empanang Kalimantan Indonesia. Perengka ti dibai seduai kitu iya nya baka ngepan pekayan Iban dulu kelia. Iya nya baka sagin tinchin, gelik, rawai, tumpa digaga ari temaga magang. Danggat anak Kapat tu petungal Unggat ukai menyadi iya. Seduai tu urang Embaloh bisi pengelandik betempa begaga ka ngepan urang indu ari temaga.

------------

Nyau ka suah seduai iya ti pulai mansang datai ari nyin seduai iya lalu ngaga langkau ka diri empu diau ditu kai alai betempa begaga ka temaga nya. Langkau seduai ba atas nanga Sungai Pelandok lalu pindah ba Wong Unggat nya diatu. Nyau kelama udah nya menya Danggat anak Kapat tu bebini ngambi Sudan anak Nambi seduai Serai. Nyalai nyepi diri nya udah bebini ditu Danggat nadai ati pulai agi, tang Unggat mulai ka diri ngagai menua sida Memaloh di Batang Empanang Kelimantan Indonesia.

------------

Seduai tu endang Memaloh ti datai ka Sarawak kitu bedagang bejual macham ngepan urang ti dulu kelia. Pekayan Iban baka tinchin sagin tumpa rawai enggau macham utai bukai ti digaga ari temaga sigi endang benong dikena urang rambau tu kelia. Diau di menua kitai ditu Danggat seduai Unggat tu, nyau nadai sanggu agi udah teleba begulai enggau kitai Iban. Semua urang udah sampal nemu pengawa seduai iya magang. Urang mayuh balat bendar ngasuh seduai iya ngaga rawai gelik tinchin sagin. Nyadi macham barang ti digaga seduai nya tadi laku bendar rebak nya kelia. Macham utai ti digaga seduai dia dijual ditukar enggau beras manok lalu bisi mega dibeli urang ngena duit.

------------

Temaga ti ditempa dilela seduai iya dia bisi sekeda endang dibai ari menua sida empu ari nyin lalu sekeda nya bisi ulih bagih enggau urang repik – repik temaga ke dianjung urang kia. Temaga tu diberesi digaga nitih ka utai ti deka diguna urang lalu seduai iya semina ngambi upah. Urang bukai kitai menua tu bisi sama nemu betempa nitih ka pengawa seduai iya laban perengka ke baka nya kelia benong di kerindu ka kitai Iban bendar laban apin bisi orang bekena ka barang mas. Baka rawai tinchin sagin gelik enti kitai kurang pemeli rambau nya kelia nadai ngena iya. Nya ngepan urang ke indu dulu kelia.

------------

Nyalai mayuh urang berebut-rebut ngasuh seduai iya ngaga utai nya di menua kitai ditu. Rambau nya kelia mensia nadai tentu mayuh udah nguan menua kitai Drau ditu. Ka ili Krian kia diuan bansa Seru enggau raban bala Melayu tauka Laut ku kitai diatu. Danggat nyau ati ngentap ka diri enda pulai ka menua sida iya empu ka Empanang Kalimantan Indonesia. Danggat tu bebini ngambi Sudan beranak ka Sendi, Bajut, Liman, Anyum, Enjan, Sendai enggau Baring . Danggat ngaku diri enda pulai kin agi lalu nyadi Iban. Udah nya kemari bisi apai iya datai deka ngambi seduai iya. Apai iya ke benama Kapat datai ari menua Kapuas nyin ngiga Unggat seduai Danggat deka mai seduai iya pulai ka Batang Empanang Indonesia.

-------------

Nyalai meda nya Danggat tu udah entap bebini beranak di Drau ditu apai iya Kapat nadai jaku nagang iya. Apai iya ngajar iya anang enda begulai enggau urang manah-manah lalu ngintu bini anak diri empu baka urang mayuh di menua tu. Unggat di bai apai iya pulai ka menua sida iya empu di Memaloh din. Danggat tu lalu tinggal ditu enda pulai agi. Udah nya kelia bisi sekali dua apai iya ngundang sida iya kitu. Iya chukup gaga meda bala uchu iya lalu udah mega meda ichit. Danggat nyau ngaku diri nyadi Iban tang baka nya bisi ga iya sekali dua nemuai ngagai sida apai indai iya di Batang Empanang kin.

--------------

Nemuai ngagai menua sida iya kin ukai semak bejalai kaki. Iya mati leboh sida berumah ba jalai pendai kitai ke diatu. Peturun uchu-ichit iya agi mengkang meruan di menua tu tang kitai ukai nyebut diri purih Memaloh. Diatu nya kebuah kitai ngumbai lansar wong ti ari ili Nanga Drau nya Wong Unggat laban nya pendai Danggat seduai Unggat leboh sida ke belangkau dia kelia. Lebuh tu kelia Tembawai Sungai Pelandok tu rumah panjai urang. Nyadi langkau Unggat seduai Danggat ba nanga Sungai Pelandok nya dia. Danggat jadi enggau Sudan lalu berumah tangga baka kitai mayuh di menua tu mih ga.

-------------

Tusut sida tu baka tu,Isut bebini ngambi Gandu beranak ka Nambi, Nambi bebini ngambi Serai beranak tiga iku iya nya Sudan, Achan, enggau Itau. Sudan belaki ngambi Danggat beranak ka sida tu Sendi, Anyum, Bajut, Enjan, Liman, Baring enggau Sendai. Ayum bebini Lindan beranak Nambi, Ungga, Gundi, Jelani, Empa, Rambok, Chandu, Katak. Sendi belaki ngambi Gambang beranak ka Megong, Jelemin, Bajai, enggau Lenguti. Bajut bebini ngambi Endek beranak ka Serai, Dandok, Edah enggau Tutih. Baring bebini ngambi Duri beranak ka Ruka belaki ngambi Loo beranak ka Kho, Uting enggau Awat Oh Tee.

-------------

Mati Duri Baring bebini baru ngambi Banat beranak ka Gimang (entua Bauk). Nyalai diatu kitai nyebut Wong Unggat dia pendai Unggat seduai Danggat dulu kelia. Nya mih penatai dama Wong Unggat. Dama tu endang bepun ari dulu menya agi idup seduai iya ti nguan engkalan nya suba. Sida ke belangkau dia menya apin datai Tuan Rajah James Brooke ke merintah menua Sarawak tu. Unggat pulai ka menua sida iya empu di Batang Empanang Kalimantan Indonesia kin.Tang nama iya agi kena kitai nyebut nama Wong nya diatu. Kitai nyebut nama menua endang bepun ari bisi kebuah enggau pengawa ti jadi ba senentang alai nya. Iya nya baka aku ke nusoi nama kebuah kitai ke nyebut Wong Unggat diatu.

-------------

Cherita dikarang Ex-TR Sabai ak. Kadam

Gawai Dayak 2010

2010-06-02T04:55:00.000-07:00

30 May, berengkah nyendiaka diri deka begawai 31 May, beranchau tikai lalu ngeriyas ruai enggau bilik diri empu

Lemai 31 May, nungkun dian lalu meresi kubur kena ngingat sida ka udah nadai

7.30 lemai 31 May. Begelumu makai ba ruai diri empu

Badu makai lemai, ngerandang jalai Ai Pengayu. Ai Pengayu digelumu ba ruai tuai gawai lalu diberkat. Kena nganti jam 12 malam, bala ka tuai baka Penghulu, Tuai Rumah, enggau tuai-tuai bilik sama-sama diberi peluang bejaku lalu meri selamat gawai.

12 tengah malam, 31 May. Ngirup Ai Pengayu ba ruai diri empu. Tembu ngirup Ai Pengayu, bejalai niki ruai meri Selamat Hari Gawai enggau taun baru enggau pangan diri

Tembu ngirup Ai Pengayu, program pemerindang malam sampai pagi. Siti ari program malam tu ianya Karaoke Lagu Sponsor.

Pagi 1 Jun, Begulu ba Tiang Pengingat enggau main rama (Pekit Nyumpit).

2.00 lemai 1 Jun, pengerami nikika bala ka datai ari jauh enggau nengeri.

8.30 malam, 1 Jun Pekit Kumang enggau Keling Gawai ka bala anembiak mit

Penghulu Garan nyuaka perais ngagai sida ka menang pekit Kumang enggau Keling Gawai

Tuai Rumah Gana nyuaka perais ngagai sida ti menang pekit

Ex-Tr Sabai nyuaka perais ngagai sekeda sida ti bisi menang pekit enggau pemenang tiket betuah

Program ka penudi malam 1 Jun, Nyarau ranyai

SELAMAT HARI GAWAI DAYAK 2010, GAYU GURU, GERAI NYAMAI, LANTANG SENANG, BETUAH BELIMPAH LEBIH AGI ARI TAUN KA UDAH.

2010-05-22T22:28:00.000-07:00

SELAMAT NGINTU HARI GAWAI DAYAK 2010

GAYU GURU, GERAI NYAMAI,
LANTANG SENANG, BETUAH BELIMPAH, CHELAP INDAP NGUAN MENUA

NGAJIH KA

BIDIK LANSIK, BULIH PEMANDAI, BULIH PENYAMAI, BULIH PEMISI, BULIH REJEKI, BULIH PENGAYA, BULIH PENGERAJA, BULIH PEMANSANG, BULIH PENGELANTANG & PENYENANG, BULIH PENEMU LEBIH AGI ARI TAUN TI KA UDAH.

Gutung Ruyung Nebas Kubur

2010-04-03T01:05:00.000-07:00

Pengawa gutung ruyung ensiang kubur tauka tanah pendam di Kaki Wong udah dikereja saritu tadi, hari 6, 3 April 2010. Semua ti bempu kubur tu ari Rh Gana, Nanga Drau, Rh. Belaki, Sungai Engkabang Ili, Rh. Ex. Tr Liap, Sungai Engkabang Ulu, Rh. Jimmy, Sebubu enggau Rh. Saban, Mapar sama ditesau magang enggau pengawa begutung ruyung ba pendam tu.

Pengawa ti ensiang pendam tu diatur bala komiti ti udah dipaduka ngereja pengawa tu. Gutung ruyung ti bansa tu dikereja tiap kali sebedau Hari Krismas, tauka Hari Gawai enggau maya bukai nitih ka ti udah ditetapka bala raban komiti nya.

Tiap pintu ti enggau bekunsi tanah kubur dipinta bebayar RM10, sekali dalam setaun dikena bala raban komiti bebeli ka racun, pemakai enggai perengka bukai ka dikena gawa ba tanah kubur tu. Urang ka enda ulih datai enggau gawa tau ngasuh wakil sida gawa, tauka mayar duit nitih iya ka udah ditetapka bala raban komiti.

Terima kasih ka semua raban komiti, enggau rayat semua rumah panjai ka bempu tanah kubur tu ketegal ari atur pengawa enggau pengelelak kita ti udah gawa ditu saritu, enggau ka udah-udah. Ngarap ka runding enggau kaul ati ti bakatu diterus ka kitai belama ka dudi hari ila.

Singkang Pemansang (Tusun Ti ke-1)

2010-02-15T00:03:00.000-08:00

Ai Paip

Sebedau bisi ai paip, mensia mayuh ti diau di rumah panjai nurun mandi, nyauk ai irup enggau bebasu gari ka sungai, ba ai Drau tauka ai Krian. Ujung taun 70-an, ai paip diaduka nyadi siti ari ubah jalai pengidup di rumah panjai. Pun penatai ai ke terubah dikena ba rumah panjai tu diambi ari Bukit Belingau. Ketegal laban mata ai ti enda besai, ai Belingau enda chukup meri ai ngagai rumah panjai tu, klinik Kaki Wong, sekula primary Nanga Drau enggau rumah-rumah nyembuah di Kaki Wong. Diatu pun penatai ai paip tu dipindahka ngagai ai sungai ti besai agi di Ulu Drau. Dua iti pala paip disediaka ba segenap pintu rumah panjai. Siti pala paip ka ai irup lalu siti agi ka guna bukai.

Api Elektrik

Pun taun 1980, menua Drau nerima projek enjin api ti keterubah. Enjin api 10 kuda tu dipenyadika ngena minyak diesel, dipasang belabuh ari pukul 7.00 ngagai pukul 9.00 malam. Jai Enjin api ka terubah, rumah panjai tu bulih siti agi enjin api ka besai agi kuasa kuda. Dipasang tiap malam enggau tumu pagi ka penyamai mensia ti deka bepedaka TV malam hari, lalu nurun gawa tumu pagi siti. Minyak diesel dibeli ngena chara bekunsi enggau begintir. Taun 1996, rumah panjai tu nerima api elektrik SESCO 24 jam. Diatu lebih kurang 14 taun rumah panjai tu bulih penyamai ari api elektrik 24 jam. Nadai agi kiruh betungkun api kelita, tauka masang lampu gas maya malam hari tauka maya ti bisi pengawa di rumah panjai.

Ngebak Album Gambar Lama.

2010-01-20T02:28:00.000-08:00

Pemuaska bekebakka album gambar lama, lalu tetemuka sekeda gambar ka diambi dalam taun taun 80-an enggau awal 90-an. Sekeda ari gambar tu nadai agi dipeda kemaya haritu.

Bansal endur nganti bas Kaki Wong. Maya tu kemari bas Kaki Wong lumur 5A agi bisi bejalai masuk jalai Kaki Wong. Bansal tu tempat penyangkai ka penudi bas 5A. Penumpang bas maya tu udah semakin mimit ketegal ti berebut enggau van tambang ke nyau mayuh maya tu kemari.
Gambar pasar Kaki Wong sebedau iya abis dirubuh. Maya tu pasar Kaki Wong nyau udah tembawai bendar gamal. Nadai agi urang bedagang ditu maya tu kemari. Tanah ari atas pasar udah ditulak dikena ngaga rumah panjai baru. Sebedau tu, tanah ari atas pasar Kaki Wong dipumai bala sida ka indu, lalu mega endur betanamka sayur.

St. Jerome's Chapel. Maya tu jalai mansa chapel tu agi jalai mit. Apin bisi jalai besai baka ka dipeda kemaya haritu. Kelingi chapel tu endang udah tawas maya tu kemari endur bumai enggau betanamka utai.

Rumah endur derisa diau, ba mua klinik Kaki Wong. Diatu rumah derisa tu udah nadai agi. Rumah derisa Kaki Wong endang lama udah nadai endur bemalam. Derisa ka gawa ba Klinik Kaki Wong berundang ari pasar Saratok.

Tiang jematan baru Kaki Wong baru didirika. Ba belakang tiang jematan tu pasar Kaki Wong. Maya tu pasar Kaki Wong agi ulih endur diau. Urang ka pengabis dudi bedagang ditu rebak gambar tu diambi ianya Haji Osman. Diatu Haji Osman tu bedagang ba pasar Saratok.

Balai Raya ari atas St. Jerome's Chapel enggau ari belakang pasar Kaki Wong. Diatu balai raya tu udah nadai agi.

2009-12-20T02:02:00.000-08:00

SELAMAT NGINTU HARI KRISMAS ENGGAU TAUN BARU

NGAGAI SEMUA BALA PANGAN, SUKU JURU ENGGAU BALA BUKAI KA NGELALA KAMI SEBILIK.

NGARAP KA TAUN BARU TI KA DATAI MERI TUAH, MERI LIMPAH, MERI PENGERAI, MERI PENYAMAI, MERI PENYENANG, MERI PENGELANTANG, MERI PENGAYA, MERI PENGERAJA NGAGAI KITAI SEMUA.

DOM NAMBI AK. SABAI & FAMILY

Lemai Hari Di Rumah Panjai......

2009-10-10T01:37:00.000-07:00

Begelumu ngirup kopi ba ruai kena ngabiska lemai

Aya kitai tu semampai enda jenuh jari. bisi aja utai digaga. Ulu, sarang duku, nyimpai, nyanggit pukat, jala, ngaga bubu enggau utai bukai.

Bisi peminat setia..

Kadang-kadang bisi indai tuai Melayu datai ari ili bedaya kuih.

* Rumah panjai kemaya hari tu sunyi bendar laban ka mayuh agi sida ka anembiak gaya di nengeri lalu ngentapka pendiau diri din. Sida semina pulai lebuh maya ka bisi pengawa tauka pengerami di rumah panjai.

Pengerami Ngintu Hari Merdeka, 31 August 2009

2009-09-04T21:47:00.000-07:00

Aum kena nusun program Hari Merdeka 2009.

Puan Josephine Entira (Ketua Wanita SPDP, pampang Krian Tengah) nyadi chairman

Raban urang indu sama meri sukung

Hari pengawa nyadi, nyedika pemakai

Pengawa berengkah malam 31 August...

Meja bala raban senior
VIP, Penghulu Garan, Fr. Winston, Pn. Josephine enggau bala bukai

Pemakai enggau perengka makai udah sedia atas meja

Mr Chuat, Anthony enggau Janggu

Mr. Calvin, Alexander enggau bala bukai

Indai Ronny, Indai Kiung enggau menantu iya

Bini Penghulu Garan enggau sida sebilik

Indai Teresa enggau Indai Alexander

TR Gana (Apai Jimmy), Apai Ronny enggau Apai Soda

Raban anembiak ngibarka bendera menua Malaysia

Pekit Kumang Merdeka anak mit

Fr. Winston nyadi siku ari akim pekit

Mr. Desmond (Neu) enggau bala bukai

Pemutus pekit

Puan Juliana (bini Fr. winston) nyurungka prais

Puan Josephine begambar enggau anembiak ka menang pekit

Kek Hari Merdeka

Pengawa mutung kek..udah ngirup ai Merdeka

Fr. Winston

Mr. Bayai (Apai Kiung)

Lr. Julius Illai (Aki Mitchel)

TR. Alfred Gana (Apai Jimmy)

Mr. Desmond (Neu)

Sekeda bala ti ba atas pentas..ex TR Sabai (cameraman)

Puan Josephine Entira

Mr. Manggi enggau bala iya

Begambar bebala mayuh..raban indu SPDP pampang Krian Tengah

Mr. Justine..ngesuhka sera nyawa diiring dua iku penyanyi latar

Puan Juliana..belagu diiring bala penari

Tukis Enggau Televisyen

2009-07-14T08:05:00.000-07:00

Sinu ati lebuh ngenang pengidup di rumah panjai dulu suba. Pendiau agi jauh bendar tinggal ari iya ke diasaika kemaya hari tu. Semua utai tau disebutka nadai. Enti bisi urang sepintu dua ka ngembuan pemisi ka baru, dikira lebih agi ari sida ka bukai. Nadai kala dalam ati bisi berunding ka api elektrik 24 jam, ai paip, talipun rumah enggai perengka baru ti bukai. Jauh sekali ngira diri tau bisi ngembuan talipun binching tauka internet tauka kerita diri empu. Pengidup di rumah panjai lebuh maya tu suba enda muka runding anembiak pasal utai ka tau nyadi enggau utai ti tau dikemisika dudi ari....

Ngenang pasal pengawa ti bepedaka tukis (wayang) enggau TV ba rumah panjai Nanga Drau tu, tau disebutka agi kelalu baru. Sebedau bisi rengka pemadah bakatu, di rumah panjai nadai siku urang ka tuai bisi kala meda..tajapan kala ninga iya bisi dikena urang ti diau di nengeri. Sepengingat aku, ba pasar Saratok ditu endang udah bisi tukis tauka panggung wayang. Aku enda nemu ni pengelama iya udah bisi dia. Tang agi mit maya ti dibai urang ka tuai nurun ka pasar, bisi ninga rita urang ti meda wayang ba panggung. Diatu, rumah panggung wayang Saratok bedau bediri betunga enggau ToK Pekong Cina ba tebing ai krian enda jauh ari market besai Saratok.

Pulai ngagai pengidup di menua ulu, di Nanga Drau maya tu suba urang mega endang udah nemu gamal tukis laban ka bisi di pasar Saratok. Kelimpah ari tu, sida ari upis pemadah selalu datai ngagai menua ulu mandangka gambar tukis ngagai mensia mayuh ti diau di rumah panjai. Pengingat aku urang upis pemadah tu suah bendar datai mai tukis lalu mandangka gambar tukis ba mua pasar Kaki Wong enggau ba penyangkai bas semak pun sabun dulu kelia tauka klinik Kaki Wong. Perengka tukis ka dibai sida tau disebutka simple. Projector pemanchar tukis dipanggaika ba perabung kerita upis pemadah lalu kain burak digantung ba mua din endur mansutka gambar tukis.

Gambar ka dipandang sida upis pemadahnya ukai cherita tauka movie sebut kitai kemaya haritu, tang berita perintah, kelebih agi iya ka besangkut enggau pengawa pemansang di nengeri enggau ka di menua pesisir baka pengawa bumai betupi enggau pemansang ti bukai. Taja pia, pengawa sida upis pemadah tu chukup ngerinduka ati mensia mayuh di rumah panjai. Bala ka bekelingi ditu baka Nanga Drau, Sungai Engkabang, Sebubu, Mapar, Kawang, enggau ka jauh agi baka Kerangan Rusa enggau Babang. Indu anembiak, besai tuai sama bela bebai ngemenuhka mua pasar Kaki Wong.

Di rumah panjai Nanga Drau tu, urang ti terubah bendar ngepunka pengawa rinduka wayang gambar tauka tukis tu, niang apai biak kami ka benama Birai ak. Titum tauka Apai Donald. Pengingat aku, niang Birai tu menya bisi kala ngembuan projector mit ti tau ngemansutka gambar tukis. Maya tu suba, lebih kurang tengan taun 70 lebih, umur bala kami ka serebak agi antara 6 ngagai 7 taun sampal begau penuh ba panggau ruai niang apai Donald ngemata ka tukis kartun nadai munyi. Aku enda ingat agi, enti tukis ka dibai iya maya tu suba bisi gambar mensia...

Nyau ka dudi agi ari nya, niang Birai tu nyadi kami serumah ka terubah iya meli peti televisyen. Aku apin tentu mereti endar ka model TV iya maya tu suba, tang dikingat aku bala ka meli TV udah tu suba mayuh agi ka model philip (sangka aku digaga urang ari menua tasik). TV maya tu suba apin bisi iya ka colour screen baka kemaya hari tu. TV enggi niang Birai tu sangka aku pemesai 12 inchi lalu dipasang ngena kuasa bateri (Bateri Kerita). Apin bisi urang ngena injin api (generator elektrik) lebuh maya tu kemari.

Urang ti kedua meli TV maya tu menya ianya pengajar Illai ak. Sagat tauka aki Miitchel enggau niang pengajar Ngelai ak. Numpang. Taja pia ketegal laban sida tu ti gawa ba menua bukai, urang semina ulih meda TV sida tu lebuh maya kemisi sekula. Tiap-tiap malam, enda ngira nama bansa cherita ti pansut ba TV, bilik sida tu semampai penuh kelebih agi laban bala sida ka anembiak. Nyau ka dudi hari, nyangka sida ka bempu TV ngasaika pemesai rega, kelebih agi bateri ti dikena masang TV nya, dia bisi sekeda sida minta bayar....retinya barang sapa ti datai meda TV ka mayar sepuluh sen baka pengawa ba panggung wayang din. Aku ngingat ka diri empu tiap lemai bepintaka dua syiling ari niang ini kelia, laban ti deka bendar meda TV.

Pemuas ti meda kami menyadi meda TV ba bilik urang, dia apai lalu berunding meli TV. Pengingat aku mina siti aja kedai ba pasar Saratok bisi nyual TV maya tu suba ianya kedai Mee Hua (Agi bisi nyentuk ka seharitu). Enti enda salah aku apai meli TV lebih kurang taun 1978, bansa JVC pemesai 24 inchi enggau generator mit kena masang TV enggau api elektrik. TV tu dibeli lalu dibai kami pulai ka Ulu Awik lalu tiap kali pulai kemisi sekula iya mega dibai pulai ka Nanga Drau.

Maya tu suba..bala ka bisi pengawa perintah sama sampal bisi TV lalu urang majak kurang bepeda ka TV ba bilik pangan diri agi.

Dalam kenang tu mega aku deka mulai ka pengingat cherita TV ti balat bendar ngerinduka ati, kelebih agi bala kami ka agi mit maya tu suba. Ka bendar iya, enti TV dipasang semua cherita ka pansut dia endang dikerinduka magang. Sekeda cherita movie maya tu suba baka Combat, Six Million Dollar Man, Bionic Women, Little House On The Prairie, Fantasy Island, The Wonderful World Of Disney agi dikingat aku nyentukka seharitu. Program belagu ti popular bendar iya Donny and Marie diri menyadi. Udah bisi cherita Melayu tang suah agi mandang ka filem 60-an kelia cherita P.Ramlee. Sekali dalam seminggu bisi cherita filem ari Indonesia..lalu filem tu balat bendar ngerinduka ati.

Pun taun 80 lebih..nyau udah bisi colour TV, tang apin mayuh urang bisi ngembuan. Maya aku belajar ba sekula Nanga Drau, siku ari urang ka bisi TV colour nya pengajar Ali ak. Bin tauka apai Sigat ti nyadi Gurubesar ba sekula tu maya tu suba. Tang taja pia, program colour enda semalam-malam. Udah lepas pukul 9.00 malam iya pulai baru ngagai itam putih......

Selamat Ngintu Hari Gawai Dayak 2009.

2009-05-29T19:35:00.001-07:00

Kami sebilik meri Selamat Ngintu Hari Gawai Dayak 2009 ngagai bala kaban belayan, bala pangan enggau temuai ti bisi mansa blog tu. Ngarap ka Gayu Guru, Gerai Nyamai, Chelap Indap, Betuah Belimpah lebih agi ari taun ti ka udah.....

Tungkin

2009-05-28T01:35:00.001-07:00

Pengidup urang tuai dulu kelia tebal agi bepanggai ba babas. Sida ngulihka pemakai ari jelu, ikan buah enggau bulu babas ti bukai. Akal dikena sida ngidupka diri mega agi kelalu mimit. Pekakas ti dikena sida endang datai ari babas magang, lalu mega digaga diri empu. Maya tu menya apin bisi bansa-bansa pekakas baka ti dipeda kitai kemaya hari.

Kena ngulihka pemakai sida bepanggai ba duku, kapak, berayang enggau sumpit. Kelimpah ari nya sida ngetan bubu, ensenga enggau panjuk (mina nyebut sekeda). Urang ti bisi udah ngaga jala enggau pukat pan ditabu enggau bansa randau ti ulih ari babas. Apin bisi senapang maya tu menya.
Tungkin ti dipandang dalam gambar tu dikena urang kelia nyimpan ipuh. Ipuh tu siti bansa utai ti beracun diambi ari kayu ipuh. Ipuh dpalitka ba ujung laja sumpit. Ipuh tu ngasuh jelu tauka burung ti kena sumpit jampat mati. Dalam gambar tu, tungkin dikena urang nyimpan insap. Diatu enti urang bisi nyumpit pan, dikena bemain tauka bepekit lalu ukai dikena ngidupka diri. Urang nadai agi begunaka ipuh tauka tungkin laban mayuh agi jalai bukai kena sida ngulihka jelu enggau ikan.

SELAMAT GAWAI DAYAK 2009

2009-05-26T07:14:00.000-07:00

Selamat Ngintu Hari Gawai Dayak 2009 ngagai semua kitai serumah ka diau di rumah panjai, di nengeri enggau di menua bukai. Ngajihka gayu guru, gerai nyamai, lantang senang, betuah belimpah lebih ari tahun ti ka udah.

Pengerami Muka Pampang Indu SPDP, Krian Tengah

2009-04-22T06:18:00.000-07:00

Sekeda bala sida ka Indu nurun ngagai pengerami ba St. Jeromes Hall, Kaki Wong.

Nyendiaka diri nganti penatai bala YB enggau pengabang ti bukai.

Kiruh ngemas perengka ba pentas.

Puan Imas enggau Puan Nila

Ngantung bunga kena ngerias pentas.

Bala ka lelaki kiruh ngaduka sekeda pemakai.

Urang kuat majlis, puan Josephine Entira kiruh nentuka majlis bejalai enggau mujur.

Penatai YB. Datuk Peter Nyarok ak. Penghulu Enteri. ADUN N.29 Krian.

Penatai YB. Tuan Jelaing ak. Mersat, Ahli Parlimen P.205 Saratok.

Raban bala indu, jenuh mendingka jaku bala pengari ti dipaduka bejaku.

Besembiang merekat pengawa sarinya.

Ari kiba : Mr. Bayai ak. Bungin, Penghulu Garan ak. Chunggut, YB. Datuk Peter Nyarok ak. Penghulu Enteri, YB. Tuan Jelaing Mersat enggau Puan Josephine Entira.

YB. Tuan Jelaing nyuaka cenderahati.

Sekeda ari pengawa pagi nya.

Sesi begambar, raban indu SPDP enggau YBs.
Kena nembuka pengawa..karaoke.

Slow dance...

enggau mejeng.

Jabir, Panding enggau Alas.

2009-04-15T06:13:00.000-07:00

Tusun tunggu Iban meruan agi dikena ba rumah panjai ka pengawa ti besangkut paut enggau adat. Kuasa bejalaika adat ba rumah panjai dipegai Penghulu enggau Tuai Rumah. Penyalah ti mit-mit, laya, leman, atur tanah, bumai betaun, adat jadi belaki bini enggau adat pemati nya sekeda ari pengawa ti agi beguna ka adat.

Tunggu kitai Iban tau dipejalaika Tuai Rumah ngena bansa utai ka endang udah ditetap urang ka tuai dulu menya, baka telu manuk, paku lawang, mangkuk, chapak enggau pinggai (Sandin). Tunggu tu tadi dikena ngatur penyalah ka mit-mit di rumah panjai.
Kelimpah ari nya, Tuai Rumah (kelebih agi) ka nyadi tuai ba rumah panjai tau netapka tunggu ngena mata duit. Mata duit tu disebut ngena nama kebuk tauka tajau lama kitai Iban baka ka disebut dibaruh tu lagi;

(a) Satu Uta-uta - penyampau pulai ngagai mata duit sama enggau RM0.25 (Dua puluh lima sen)

(b) Sigi Menukul - penyampau pulai ngagai mata duit sama enggau RM0.50. (Lima puluh sen)

(c) Sigi Jabir - penyampau pulai ngagai mata duit sama enggau RM1.00 (Seringgit)

(d) Sigi Panding - penyampau pulai ngagai mata duit sama enggau RM2.00 (Dua Ringgit)

(e) Sigi Alas - penyampau pulai ngagai mata duit sama enggau RM4.00 (Empat Ringgit)

(f) Sigi Alas Ngerang - penyampau pulai ngagai mata duit sama enggau RM5.00 (Lima Ringgit)

(g) Sigi Alas Berejang - penyampau pulai ngagai mata duit sama enggau RM6.00 (Enam Ringgit)

(h) Sigi Alas Betanduk - penyampau pulai ngagai mata duit sama enggau RM7.00 (Tujuh Ringgit)

(i) Sigi Rusa - penyampau pulai ngagai mata duit sama enggau RM8.00 (Lapan Ringgit)

(j) Sigi Rusa Lelaki - penyampau pulai ngagai mata duit sama enggau RM10.00 (Sepuluh Ringgit)

(k) Sigi Menaga - penyampau pulai ngagai mata duit sama enggau RM16.00 (Enam Belas Ringgit)

(l) Sigi Ningka - penyampau pulai ngagai mata duit sama enggau RM32.00 (Tiga Puluh Dua Ringgit)
Penghulu (Dalam menua bagi kedua) tau bejalaika tunggu ngena kati (timbang) baka ti di baruh tu;
(a) 5 Kati - pulai ngagai mata duit RM5.00 (tauka $3.60 dulu suba)

(b) 10 Kati - pulai ngagai mata duit RM10.00 (tauka $7.20 dulu suba)

(c) 20 Kati - pulai ngagai mata duit RM20.00 (tauka $14.40 dulu suba

(d) 30 kati - pulai ngagai mata duit RM30.00 (tauka $21.60 dulu suba)

(e) 1 pikul - pulai ngagai mata duit RM100.00 (tauka $28.80 dulu suba)
Kelimpah ari bansa tunggu ka udah disebut diatas nya tadi, kitai Iban mega ngena simbol ti bukai, ukai semina ka jalai tunggu tang mega kena ngenyelap ka pengidup pengudah tunggu tadi dipejalaika. Sekeda ari bansa utai ti nyadi simbol nya baka babi (tauka darah babi), duku enggau beliung.

Tembawai

2009-03-13T01:11:00.000-07:00

Tuai dulu kelia suah mindah pendiau. Sida berumpang menua. Kebuah ka selalu mindah nya laban ngiga pendiau ti chelap Indap (Reti nya gerai nyamai, lantang senang). Kedua ngiga endur ka bedau diperimba, laban tanah menua bakatu deka nyadi padi. Ketiga, enda siga jelu babas enggau jelu ai mega lalu jauh ari penyakit. Kelimpah ari nya, menua baru nyamai endur begiga bulu babas (paku, tubu) lalu mega mayuh ikan enggau jelu ti nyadi siti ari jalai pengidup maya nya kelia.
Bisi mega kebuah sida ti mindah nya endang dikena mandangka pengering tulang enggau runding anak lelaki. Sida ti ngulu ka urang berumpang menua nya deka nyadi urang ti beberita lalu dipebasa mensia mayuh.
Ditu aku deka nusui sekeda ari tembawai ti udah nyadi endur sida ka tuai menya ngidupka diri sebedau ngentapka pendiau ba endur ka diatu. Endur tembawai nya lalu sida ti tuai ka ngiring anembiak redak maya tu suba ditulis aku nitihka iya ti ditusui aki (Kadam ak. Nambi).

Pun Penatai.
Munyi ti udah disebut ngelamatu, asal penatai urang tuai ti muka menua Drau ditu ianya ari Nanga Melupa. Sida mindah ari menua nya laban rumah di Tembawai Alah diserang bala Balau. Sida ti ulih ngelarika diri lalu belabuh ngepunka pendiau ti baru, kelebih agi ba sepemanjai Batang Krian.

Tembawai Maya Iring Jabas
(i) Nanga Ilas (Kaki Bukit Tengalat)
(ii) Kerango

Ari tu sida pindah baru ka
(i) Sungai Jeno
(ii) Kawang

Ari sungai Jeno enggau Kawang sida pindah baru ka
Nanga Melak

Ari Nanga Melak sida pindah baru ka
Nanga Sungai Kundung

Ari Nanga Sungai Kundong sida pindah baru ka
Nansang *Rumah tu dialahka Seru
*Jabas (Udah pemati iya), diganti menantu iya ka benama Chuk.

Tembawai Maya Iring Chuk
Tembawai Baru

Ari Tembawai Baru sida pindah baru ka
Tembawai Sungai Pelanduk

Ari Tembawai Sungai Pelanduk sida pindah baru ka
Tembawai Sungai Kundung
* Rumah di Sungai Kundong bepechah. Bundak ngiring bala iya berumah ba Tembawai Kilong.

Tembawai Maya Iring Bundak
Tembawai Kilung

Ari Tembawai Kilong sida pindah baru ka
Tembawai Sungai Tekalung

Ari Tembawai Sungai Tekalung sida pindah baru ka
Tembawai Sungai Betung

Ari Tembawai Sungai Betung sida pindah baru ka
Tembawai Tinting tauka Tembawai Panjai.

Notes:
* Bundak mati ba langkau maya berumah ba Tembawai Tinting
* Dua iku tuai ti nganti Bundak ba Tembawai Tinting ianya Antas enggau Minggat
* Rumah panjai ba Tembawai Tinting bepechah baru. Bala ti bepechah tadi belangkau, bedampa ba sepemanjai ai Drau. Dampa ka panjai agi nya ba Nanga Drau. Bala ka diau ditu ngepun pengawa berumah ba Tembawai Masing.

Ngenang Pengawa Maya Langkang.

2009-02-25T23:41:00.000-08:00

Dulu suba maya panas enggau ujan endang sebaka tiap taun. Musim panas ai sungai deka langkang bendar lalu nyamai endur bemain tauka turun begigaka lauk. Enti maya ujan ai deka bah, lalu pengawa ti turun ka ai deka kurang dikereja.

Dulu kelia, urang turun ka ai kena ngisi maya lepa gawa umai enggai kebun. Sida Ngetan pukat, nyala, nginti, mansai undang, ngiga tekuyung, ngulih milik, ngeresap (ngulihka anak ngena tabir, mubuk (ngulihka bubuk ulu ngena tabir enggau mayuh bengkah chara ti bukai dikena ngulihka bansa utai idup dalam ai ka lauk sida.

Dulu suba, belabuh ari bulan enam hari mupuk deka panas lalu ngujungka kemarau. Musim kemarau enda tentu, tang kadang-kadang hari tau nadai ujan sampai sebulan. Maya tu, ai Krian mupuk langkang, lalu nyamai bendar alai bala ti deka turun ka ai.

Ai ti chiru nyamai endur urang nimbak ikan. Iya mega nyamai endur sida ti rindu nginti. Lubuk Labang, lubuk Lidong, Lubong Embuas selalu endur urang nginti peridin. Ukai semina ikan peridin aja ti ulih, tang kadang-kadang bulih baung, undang, kedebu enggau bansa ikan bukai ti deka makai ginti.

Musim panas, kelebih agi maya ngalih hari pendiau di rumah panjai balat bendar angat. Nyalai, bala sida ka lelaki bebai-bai pangan diri ngiga kayu ti bisi diempa miluk. Kadang-kadang kayu ti rebah ka ai ditanchang dulu ngambika diempa miluk. Musim panas sida nurun ngabas lalu ngulihka miluk dia.

Ai ti mabu nyamai endur begiga tekuyung. Ai urung menua ari ili wong Embuas mayuh bendar tekuyung pasang lalu mua ka ulu Embuas mayuh tekuyung rau. Tekuyung pasang lekat ba batu enggau kayu kelebih agi ba endur ti lansar. Enti sema lama udah nadai digiga kitai tau teulih ka tekuyung pasang ti besai. Tekuyung rau mayuh agi ba endur ti enda datai pasang.

Keresap (anak ikan) mudik ka ulu nitih ai pasang. Bala sida ka indu nganti ba sukut-sukut batu ba tebing sungai, bebaika tabir dikena ngulih keresap. Enti kena maya keresap mayuh, bala ti ngeresap deka bulih bendar nyentuk ka penuh buntut tabir. Bakanya mega maya pasang bubuk (anak undang). Bida enggau maya ngulih keresap, urang ti mubuk deka nurun malam hari. Maya pasang bubuk kitai ulih meda api kelita tauka lampu pichit bakacheli ba tebing sungai. Keresap enggau bubuk ulu tu endang siti ari bansa utai ti bisi ba ai Krian urung menua Kaki Wong tu, lalu nyadi siti ari bansa pemakai urang ba menua tu.

Endur ti beulai, kelebih agi ba lubuk ti bisi kerukuh kayu deka bendar endur ikan diau. Nya alai bala ti ngetan pukat semampai ngining endur ti bakatu endur nerantingka pukat sida. Pukat ditan ngulurka ai. Retinya puting pukat ditarit tunga kili lalu puting tu enda ditanchang. Enti sema pukat ditan ngempang batang ai, iya tau rusak tauka putus kena tumpu kayu lalu nambun reba ti anyut ari ulu. Dulu suba pengawa mukat tu besai bendar asil ketegal laban ikan ti agi mayuh. Suah bendar sida bulih ikan pait, banta, buing, baung lalu enti nasit manah agi tau bulih anak tengas enggau semah.

Enti kemarau nyau udah lama bendar nyadi ai pasang ari ili deka mai pantai mudik ka ulu. Tebing ai, batu enggau kerukuh kayu kadang-kadang nadai ayan agi ketegal kena lamun pantai. Maya tu, ai manah bendar endur bala ti deka nyala. Siti ari kebuah iya manah laban ai nyau nyadi mabu. Kerukuh kayu enggau tingkah batu dalam ai pan udah telamun magang. Nyau ka semua tempat ulih endur nibarka jala, lalu nadai takutka tekait. Maya tu, ikan ulu nadai tentu mayuh ulih. Sida ka nyala suah agi bulih ikan ili enggau undang.

Kemaya haritu, ai Krian nyau enda agi baka ti kelia. Ai enda tentu agi chiru ketegal laban jalai aluh enggau projek betanam ti besai udah digaga ba sepemanjai Batang Krian. Ikan enggau bansa utai bukai ti idup dalam ai pan nyau udah makin kurang. Taja pia, pengawa ti turun ka ai kemaya haritu agi ulih dikereja, kelebih agi kena mantupka pengerindu turun ka ai.

'Gajah Nusu'

2009-02-13T01:38:00.000-08:00

Mayuh anembiak kemaya hari tu, kelebih agi sida ti ada lalu diau di nengeri enda nemu nama utai, lalu enda kala ninga nama utai nya disebut. Anembiak rumah panjai ka rebak dudi tu mega mayuh ka enda nemu nama utai, ketegal nama nya nadai agi disebut tauka utai nya tadi nadai agi dipeda tauka dikena ba rumah panjai sida. Nya alai sida suah tegenung, lalu sekeda nanya ka reti lebuh ti ninga bala apai indai, tauka aki ini sida nyebut nama utai nya tadi.

Siti ari leka jaku ti dikena kitai menua tu nyebut nama rumah ti digaga nyangking ba panggau ruai rumah panjai sida nya ‘Gajah Nusu’. Enti kitai nanya ngagai sida ka anembiak, nadai siku sida enda nemu ‘Gajah’ nya siti ari bansa jelu babas ka bisi di menua tasik din, lalu ‘Nusu’ tu siti ari pengawa anak mit kitai mensia tauka jelu ka apin nemu makai beridup ba indai sida. Sida nyangka enda terunding ka reti ‘Gajah Nusu’ dikena nyebut bansa rumah ka digaga ba senentang endur tanju.

Jarang bendar kitai meda rumah panjai kemaya haritu, bisi ngaga rumah nyangking ba ruai sida kelebih agi rumah panjai ka baru diatu. Di Nanga Drau dulu suba bisi dua iti ‘Gajah Nusu’. Siti ‘Gajah Nusu’ digaga ba tanju Minggat ak. Changgas (Empawi ak. Minggat ka diatu), lalu siti agi ba tanju Impa ak. Anyum (Enggi ak. Impa ka diatu). ‘Gajah Nusu’ ba tanju Empawi ak. Minggat udah lama dibuai, tang iya ti ba tanju Enggi ak. Impa agi meruan nyentukka seharitu.

‘Gajah Nusu’ digaga urang ka tuai dulu suba kena ngemesaika agi ruang ba ruai. Pengidup sida ka tuai kelia bepanggai ba pengawa betanam betupi enggau pengawa ngasu beburu. Nya alai sida mayuh nyimpan rengka dikena gawa dalam rumah, kelimpah ari ka ditinggal sebedau langkau umai enggau kebun. ‘Gajah Nusu’ tu nyadi endur besimpan ka tumpa, raga, selabit, agak, lanji. Iya mega nyadi palan endur ngantung duku, kapak, enggau cangkul, lalu mega endur manggai ka tikai. Kelimpah ari nya, ‘Gajah Nusu’ nyadi palan endur naruh rengka kena ngasu beburu baka sumpit, ginti, bubu, jala enggau pukat. ‘Gajah Nusu’ mega nyadika setur endur nyimpan asil padi, lada enggau getah sebedau iya dijembui tauka dijual.

Dulu kelia, bala ka baru ngangkat diri bujang rindu bendar begempuru tinduk di ruai. Maya tu kelia apin bisi pemerindang baka kemaya haritu. Sida nadai radio enggau televisyen. Nya alai maya malam hari sida ti baru ngangkat diri bujang tu begempuru ba ‘Gajah Nusu’, berandau enggau pangan diri nganti mata ti deka tinduk, lalu kelebih agi enti ati bisi ngining peninduk sida ka indu.

‘Gajah Nusu’ ba tanju Empawi ak. Minggat ka dulu suba digaga nyadika rumah sekula. Sida ka tuai baka Impa ak. Anyum, Jilum ak. Ginal enggau Senin ak. Umbol terubah besekula di Kumpai. Abis pelajar di Kumpai, sida tu pulai ka Drau lalu nguluka bala anembiak ba rumah panjai tu ngemansangka pengawa sekula. Sida ngansak urang ka tuai nirika palan endur belajar, lalu sida empu mantu ngajar bala anembiak bukai ba rumah panjai tu. Siku ari pengajar tuai di menua tu ti udah ngajar ba sekula ‘Gajah Nusu’ tu Niang Mr. Kedai ak. Jeti tauka Apai Lajun. Niang Mr. Kedai ngajar ba sekula ‘Gajah Nusu’ tu lebih kurang dalam setaun sebedau sekula baru digaga ngena jalai gutung ruyung ba tanah niang ex-TR Sabang ak. Empiu enda jauh ari sekula SK Nanga Drau ka diatu.

Tusun Bilik

2009-01-29T05:13:00.000-08:00

Tusun lumur bilik dalam rumah panjai Nanga Drau dikira belabuh ari puting ulu. Urang ka bempu bilik lumur satu, tauka puting pengabis ulu nya enggi Anyum ak. Enggi, lalu puting mua ari ili enggi Edward ak. Ngelai. Tusun lumur bilik enggau nama urang tuai ti asal bempu bilik tu baka ti dalam list di baruh tu;

*Note ; Lumur ke lekat ba mua pintu diatu agi lumur lama. Bilik lumur 1 ka dulu suba belabuh ari bilik Mr. Bayai ak. Bungin (Lumur 3 ka diatu).

Bilik Lumur 1 (Pengabis Ulu)

Anyum ak. Enggi

(Bilik digaga Anyum ak. Enggi)

Bilik Lumur 2

Joshua ak. Sedin

(Bilik tu digaga Joshua ak. Sedin)

Bilik Lumur 3

Bayai ak. Bungin

(Urang tuai ti ngepun bilik tu Titum ak. Unjah)

Bilik Lumur 4

Kendat ak. Tukau

(Urang tuai ti ngepun bilik tu Unchang ak. Antas)

Bilik Lumur 5

Rambai ak. Inin

(Urang tuai ti ngepun bilik tu Engkoh ak. Madang)

Bilik Lumur 6

Enggi ak. Impa

(Urang tuai ti ngepun bilik tu Impa ak. Anyum)

Bilik Lumur 7

Jullius Illai ak. Sagat

(Urang tuai ti ngepun bilik tu Uyu ak. Unong)

Bilik Lumur 8

Nilau ak. Ajah

(Urang tuai ti ngepun bilik tu Ajah ak Sumok @ Ajah ak. Abang)

Bilik Lumur 9

Bilal ak. Jan

(Urang tuai ti ngepun bilik tu Jan ak. Suat)

Bilik Lumur 10

Paul ak. Entamin

(Urang tuai ti ngepun bilik tu Entamin ak. Samat)

Bilik Lumur 11

Dudum ak. Rengan

(Urang tuai ti ngepun bilik tu Rengan ak. Sang)

Bilik Lumur 12

Sabai ak. Kadam

(Urang tuai ti ngepun bilik tu Nambi ak. Anyum)

Bilik Lumur 13

Senang ak. Gambing

(Urang tuai ti ngepun bilik tu Gambing ak. Gindal) Bilik Lumur 14

Nanggal ak. Gawan (Bilik Niang ex-TR Gawan ak. Sabang)

(Urang tuai ti ngepun bilik tu Sabang ak. Empiu)

Bilik Lumur 15

Kundat ak. Brayun

(Urang tuai ti ngepun bilik tu Numpang ak. Abang)

Bilik Lumur 16

Minggat ak. Mitai (Kiah ak. Empawi)

(Urang tuai ti ngepun bilik tu Minggat ak. Changgas)

Bilik Lumur 17

Icha ak. Jimbau (Bilik Niang Blanda ak. Gundi)

(Urang tuai ti ngepun bilik tu Gundi ak. Anyum)

Bilik Lumur 18

Andu ak. Senin

(Urang tuai ti ngepun bilik tu Umbol ak. Andam)

Bilik Lumur 19

Achin ak. Tinggi

(Urang tuai ti ngepun bilik tu Gimang ak. Baring)

Bilik Lumur 20

Nyaing ak. Tambat

(Urang tuai ti ngepun bilik tu Luna ak. Megong)

Bilik Lumur 21

Chuat @ Kut ak. Tukau (Dulu suba bilik George ak. Penghulu Garan)

(Urang tuai ti ngepun bilik tu Megat ak. Mensan) Bilik Lumur 22

John Edward @ Mengga ak. Giang

(Urang tuai ti ngepun bilik tu Ansi ak. Ngelayang)

Bilik Lumur 23

Manggi ak. Salok

(Urang tuai ti ngepun bilik tu Salok ak. Juing)

Bilik Lumur 24

TR Gana ak. Senin

(Urang tuai ti ngepun bilik tu Chundi ak. Unjah)

Bilik Lumur 25

Ling ak. Geraji

(Bilik digaga Ling ak. Graji)

Bilik Lumur 26

Katum ak. Numpang

(Bilik digaga Katum ak. Numpang)

Bilik Lumur 27

Geraman ak. Undau

(Bilik digaga Geraman ak. Undau)

Bilik Lumur 28

Penghulu Garan ak. Chunggut

(Bilik digaga Penghulu Garan ak. Chunggut)

Bilik Lumur 29

Anau ak. Empawi

(Bilik digaga Anau ak. Empawi)

Bilik Lumur 30 (Pengabis Ili)

Edward ak. Ngelai

(Bilik digaga Niang Ngelai ak. Numpang)

Dua pintu ti diau ba rumah kediri ianya Mindun ak. Jelani tauka Ini Rebuh ti diau ba rumah kediri ba tengah laman puting ari ulu, enggau Minggu ak. Giang ti diau berimbai enggau sekula SK. Nanga Drau. Sebedau tu, dua pintu agi ti diau ba rumah kediri ianya Sangking ak. Munan enggau Louis ak. Brayun. Diatu Sangking seduai Louis nitihka bala ti berumah baru di Lidong.

Jematan Kaki Wong - 12 Januari 2009

2009-01-12T02:57:00.000-08:00

Ujan nyadi sehari semalam nadai ngetu. Nya alai malam 13hb Januari 2003, ai berengkah besai. Bah ti pemadu besai dalam timpuh 50 taun udah nyadi dalam kandang menua Kaki Wong. Jambatan gantung ka lama enggau iya ti baru tembu digaga (Jematan ka diatu) keterubah iya ampuh laban ai. Tengah laman rumah sakit Kaki Wong mega ampuh lebih kurang dalam lima kaki peninggi. Reba enggau batang kayu ti anyut ari ulu betakat ba jematan ka lama lalu ngujung ka iya putus. Semua reba ti lekat dia lalu rarat nempuh jematan ti baru digaga. Ketegal laban penegap jematan tu enda rusak, tang semina singit sepiak aja. Siang hari 13hb Januari bala kami serumah sampal magang nurun kia, ngupas kayu reba ka lekat ba jematan tu.

Diambi ari diari Ex-TR Sabai ak. Kadam (Ditulis 13hb Januari 2003)

Kena 11hb Januari 2009, 7 taun udah bekau jematan tu kena duju bah taun 2003, sekali agi iya kena uji ai deras. Baka ka ngulang utai ti udah nyadi dulu suba, ujan bangat enda ngetu-ngetu lebih kurang dalam pengelama dua hari ngujungka ai Krian kena bah besai baru. Taja pia, bah tu enda ngemesai iya ti nyadi dalam taun 2003. Ai enda ngampuhka jematan. Taja pia, kayu besai ti anyut ari ulu ditabanka ai deras betakat baru ba jematan tu, ngujungka sekeda ari besi enggau dawai ti nanggan ramu jematan tu putus. Ramu enggau papan teras ti nyadika alang enggau ngeladak jematan mega lenyau ditaban ai deras. Raga dawai jematan mua ari ulu balat bendar rusak.

Munyika ditusui bala ti sama ngemataka utai ti nyadi ditu kemari, jematan tu balat bendar singit laban kena paut kayu ti deka anyut ka ili. Sida irau bendar ati enggaika jematan tu putus baru baka iya ti udah nyadi taun 2003 suba. Enti sema jematan tu putus baru, iya balat bendar ngemedis ka bala ti nurun kulu kili, kelebih agi bala anembiak sekula enggau sida ti kelang kelut nurun ka kedai enggau nurun gawa. Pemendar ati bala ka tinggal di rumah panjai, diuluka Penghulu Garan ngansak bala pemegai pengawa di Majlis Daerah Saratok, minta saup sida ngaduka jematan tu enggau lengkas. Pengawa bepinta ukai utai mudah dikereja, kelebih agi enti iya besangkut paut enggau duit. Tajapan perintah ulih meri tulung, tang suah agi iya enda ulih diaduka dalam sehari dua. Ari runding ti kering, enggau pengekih ngatur utai, Penghulu Garan mujur ngansak bala di Saratok (Majlis Daerah) ngerepair jematan tu dalam tempuh enda datai dua hari. Kontraktor ari Saratok dipaduka ngereja pengawa tu seharitu (12hb January 2009), sehari udah iya ka rusak laban kayu. Tajapan bisi kontraktor udah dipaduka perintah ngerepair baru jematan ti rusak tu, bala rayat ari rumah panjai tuai biak, indu lelaki kelebih agi ari Nanga Drau enggau Sungai Engkabang dua buah rumah sama bela sampal magang ngemataka jematan tu direpair. Sekeda ari bala sida sama nyurungka jari nulung urang ti gawa dia.

Penatai bala rayat rumah panjai, enggau sekeda agi ka diau ba sebelah pasar Saratok enggau endur bukai mandangka pengibuh enggau pengingin ati sida deka meda jematan tu pulai manah baru. Jematan tu siti ari jalai ka ditengah sida mindah kulu kili, lalu enti sema iya enda diaduka, mayuh bendar pengawa enggau jalai pengidup tau tejanggal enda ulih dikereja.

Pengerusak ti nyadi ba jematan tu, enti enda diaduka enggau lengkas mega tau nganu nya mensia mayuh ti nengah iya kulu kili.

Ngenang pasal jematan Kaki Wong tu; sebedau jematan baru ka diatu didirika, endang udah bisi jematan lama ba endur tu. Meraka ai Krian ari ulu pasar lama Kaki Wong, lalu tepantup ba pendam Alik seduai Gambang ba puting ari kanan. Penyauh jematan lama enggau iya ti baru tu lebih kurang dalam 10 meter aja mua ari ulu. Ketegal laban ti udah kelalu lama enggau selalu rusak, mensia mayuh majak enda tentu nyamai nengah kelebih agi ketegal iya ti nuntung ba pendam. Bala sida ka tuai berunding bepinta ari perintah dikena nirika jematan ti baru.

Udah tembu jematan baru, jematan lama makin jarang ditengah, ngujungka jematan lama tu majak rusak. Jematan teras ti nampung jematan lama meraka sungai lubang munsuh tauka sungai penuan nuju ngagai stesen bas Kaki Wong mega sama rusak lalu nadai direpair agi. Munyi ka disebut aku terubah dia atas dia tadi, jematan lama tu runtuh ketegal laban bah besai taun 2003.Ungkus dikena nirika jematan tu dianggarka lebih kurang RM65.000.00. Penghulu Garan nguluka bala ti gawa begaji nirika jematan nyentukka iya tembu dalam taun 1996. Atur ngaga jematan endang dikereja ngena jalai enggau adat kitai Iban. Pengawa ngenselan, miring enggau bebiau dikereja sida ka tuai. Darah babi disimpan dalam lubang tiang. Tajapan pengawa ti ngaduka jematan tu dikereja ngena jalai begaji, rayat mayuh ti bukai sama mandangka pengaga ati lalu meri sukung ngagai sida ti udah kiruh bepinta, ngatur lalu nirika iya.

Sida ka tuai enggau bala ka anembiak sama bekunsi runding dikena nentuka semua atur pengawa mujur dikereja.

Kena 14hb March taun 1997, jematan ti baru tembu tu dipenyadika Ahli Parlimen Saratok maya tu suba, ianya niang YB Datuk Peter Tinggom ak. Kemarau. Sekeda bala ti bisi nadai ngulu pengerami tu, ianya ADUN Krian, YB Datuk Peter Nyarok ak. Penghulu Enterie, bala-bala pemesai opis perintah, ketua-ketua masyarakat enggau ketua kaum ari kelingi menua tu ditu enggau sekeda bala ari endur bukai ti bisi dikangau datai.

Kena 21hb Ogos 1998, menua urung tu ditu enggau di rumah panjai Nanga Drau empu nerima penatai mensia mayuh ti ngulu pengawa 'Pesta Berakit Sungai Krian 2008'. Sekeda mensia bemalam ba rumah panjai, lalu sekeda agi bemalam ba tebing ai sepiak-sepiak (ba klinik desa Kaki Wong enggau endur pasar lama Kaki Wong ke dulu suba. 32 iti akit berangkat ari endur tu, ngili ai Krian. Maya tu kemari mensia mayuh bepadat bediri atas jematan enggau tebing kiba enggau kanan ai Krian ngemataka akit ti belepas.

Musim Ujan Enggau Banjir Udah Datai Baru

2009-01-11T02:13:00.000-08:00

Dua ari ti udah menua Saratok tu ujan bangat siang enggau malam, lalu nadai ngetu-ngetu. Sekeda endur ti baruh-baruh diatu nyau majak ampuh laban ai. Mensia ka diau berimbai enggau tebing sungai berasai bendar ketegal ai ti besai enggau deras ngampuh ke pendiau enggau pemisi sida. Ujan ti bangat ditambah enggau segang pasang besai nya sekeda ari kebuah iya nyadi tiap-tiap taun...

Tengahari tadi, lebih kurang pukul sebelas pagi Penghulu Garan telefon ari rumah panjai di Nanga Drau madah ka kayu besai ti anyut ari ulu neruju jematan gantung di Kaki Wong. Iya irau bendar ati enti ai majak besai enggau deras, jematan tu tau putus lalu runtuh. Dulu suba mega jematan lama ditu udah kala runtuh ketegal laban duju ai enggau lumpung kayu besai ti anyut ari ulu.

Lemai tu, aku nurun kin deka meda gamal pemesai ai Krian, jematan ti kena duju kayu enggau belakang rumah panjai baru di Lidong, tang lebuh datai ba urung menua sebedau simpang Kawang ka dulu suba, kilah rumah panjai baru (Tajak), aku besatup enggau tanda AWAS enggau teranting tali ba tengah jalai. Jalai Kaki Wong ba senentang tu putus laban segang ai Krian ti besai bendar.

Tuju aku ka deka ngabas utai ke ulu tadi tejanggal naka tu laban kereta enda agi ulih mansang kin. Enda nemu pengawa bala ka ba rumah panjai din. Tentu sida mega enda ulih nurun ke baruh kitu enti sema ai kelalu besai lalu jematan mega rusak.

MPSH SK Nanga Drau

2008-12-31T08:11:00.000-08:00

Pengerami meri sijil enggau prais ka anembiak sekula SK Nanga Drau udah diatur kena 12 hb November 2008 sebedau kemisi panjai ujung taun. Pengerami ka bakatu diatur tiap-tiap taun dikena ngerami bala anembiak ka udah mandangka pemutus peresa ti manah enggau anembiak primary 6 ka deka ninggalka sekula primary lalu masuk sekula secondary di Saratok.

Kelimpah ari pengawa ka meri sijil enggau prais nya, party ujung taun mega diatur dikena ngelumu bala apai indai anembiak lalu meri terima kasih ngagai bala pengajar ti deka mindah endur gawa enggau bala pengajar temporary ti abis timpuh ngajar ba sekula tu.

Semua apai indai anembiak ka bisi anak besekula ditu, enggau bala bukai ari rumah panjai ka bekelingi menua tu ditu bela sampal datai maya pengerami tu kemari.

Mr Jimmy Dato, Mr Sekam enggau sida sebilik

Bini Penghulu Garan (Indai George) enggau sida sebilik

Cikgu Umpi enggau bala iya

Mr Chuat (Kut), Mr Anyun enggau Mr Temenggung

Sekeda sida ka indu, Ani seduai indai Nomi. Berimbai enggau Mr Chuat nya laki Ani

Guru Besar SK Nanga Drau, Mr Nelson Sigat benung nyurungka cenderamata

Penghulu Garan ak. Chunggut benung meri seleka dua jaku ka bala ti bisi datai

Sama terebak duduk ninga ka bala ti bisi bejaku

Tuai Rumah Gana ak. Senin enggau bala iya

Mr Nair nyurungka prais ngagai Mr Gon (Cabutan tiket bertuah). Sama bisi dalam gambar Mr Anyun enggau ex-Guru Besar Mr Bayai Bungin

Guru Besar Mr Nelson Sigat ngulu ka bala ngerami pengawa malam nya

Sekeda sida ka indu sama kena tiket bertuah, ari kiba nya Ragina (Indai Wek), Indai Chia enggau bala ka bukai

Mejeng...dikena ngemanjai ka malam

Indu lelaki, tuai biak sama-sama ngansar ka kaki

Mr John Edward benung mantaika pengelandik belagu

Kenang Pemansang di Sungai Engkelili

2008-10-31T03:33:00.000-07:00

Mua ari ili pengkalan Lunching, ari kanan mudik ai Krian bisi siti tempat ka dikumbai Sungai Engkelili. Dulu kelia menua tu seruran endur bala anembiak bemain ketegal ka semak bendar enggau pendai endur mandi. Ai krian ba Nanga Sungai Engkelili nyamai bendar endur bemain laban ai ba senentang tu lansar lalu bekerangan. Ari ili mimit nanga sungai Engkelili bisi dua iti lubuk dikumbai lubuk Pituh Bejait enggau Lubuk Labang.

Nadai mayuh bala anembiak ka rebak baru bisi nemu, tauka bisi ditusui pengawa ti kala bisi nyadi ba awak endur tu kelia. Taja pia, sida nyangka bisi berunding ka bekau ka agi bisi dia, mandangka pengawa bisi udah kala dikereja urang ka tuai menya. Siti ari bekau ka disebut aku nya tadi ianya sekeda ari tangga batu (semin) meruan ulih dipeda nyentuk ka saritu.

Ditu aku deka nampung cherita ka ditulis Mr. Liman Numpang, District Officer di Saratok ka dulu suba, ka endang ada di Nanga Drau ditu bekaul enggau pengawa sida ka tuai menya di Sungai Engkelili. Cherita tu bisi diubah aku mimit, ngambi iya ka bisi besangkut paut enggau pengawa ba sungai Engkelili enggau menua Kaki Wong ditu.

(Niang) Mr John Kennedy Wilson tauka Tuan Tuai

Pengawa di sungai Engkelili bepun ari runding siku urang putih ka benama John Kennedy Wilson tauka Tuan Tuai ka numbuh siti komiti, dikumbai ‘Komiti Pemansang Raban Bansa’ di Budu tauka Budu Community Development. Kaban komiti pemansang tu diambi ari sekeda bala Tuai Rumah kandang Krian Ulu, Budu, Kabo, Babang enggau Kaki Wong. Komiti ka ditumbuhka tu, meri penyanding penemu sereta nyukung pengawa ti dipejalaika Budu Pemansang Raban Bansa.

Kena ngerembaika atur pemansang, baka pengawa sekula, pengawa dagang, pengawa pengerai (opis perubat) enggau pengawa betanam betupi, bala komiti ka udah dipaduka tu ngansak Mr. JK Wilson tu ngerembai ka pengawa di Budu ngagai endur bukai baka Nanga Budu, Nanga Gerenjang enggau Kaki Wong. Penemu raban komiti tu tadi diterima Mr. JK Wilson, asal sida sanggup ngiga tanah ba menua diri empu endur nudukka pengawa. Ba tiap iti tempat ka disebut aku diatas nya tadi endang bisi urang dipaduka ngiga tanah tu, lalu di Kaki Wong tu pengawa tu dipejalaika Empa ak. Anyum seduai Numpang ak. Abang. Ari setuju bala mayuh, Empa seduai Numpang bulih tanah di nanga sungai Engkelili endur nudukka pengawa gerempung.

Urang ti bempu tanah ba Sungai Engkelili besetuju nyerahka tanah, lalu dibai betemu enggau District Officer di Saratok. Iya besain surat ka tanda setuju nyerahka tanah ngagai Komiti Pemansang Raban Bansa, dipasukka dalam gazzete lalu dikumbai tanah Native Communal Reserve. Retinya tanah tu tadi nyadi tanah simpan ka guna kunsi mensia mayuh dalam kandang menua nya.

Di sungai Engkelili tu, komiti ti nguasa pengawa dikumbai Komiti Kandang Engkelili Pemansang Raban Bansa. Komiti tu nguasa lalu ngemataka pengawa pemansang raban bansa di sungai Engkelili lalu nadai bekaul enggau pengawa politik tauka komiti rumah panjai. Semua rumah panjai ari Krangan Rusa, Babang, Praja, Sebubu, Mapar, Sungai Engkabang, Drau enggau Nanga Drau sama bempuka pengawa ba sungai Engkelili. Tiap-tiap Tuai Rumah ari rumah panjai nya nyadi kaban komiti, lalu Cr. Numpang ak. Abang dipaduka nyadi Chairman. Pengawa ti ditumbuhka dia maya nya menya baka rumah sekula,Dispensary, Opis Betanam Betupi enggau kedai Gerempung Kereja Sama. Pengawa di sungai Engkelili tu dikemata perintah ari opis Gerempung Kereja Sama Sarawak.

(Niang) Mr. Arthur Thwaites (Tuan Manang) maya iya ka agi idup suba selalu nemuai ka Nanga Drau. Taja pan udah lama ninggalka menua Sarawak, Tuan Manang tu agi landik bendar bejaku Iban. Dua iku agi urang putih ka sama nulung pengawa JK Wilson ianya Mr. Thomas McBride (Apai Tam) enggau Dr. Ronald Lees (Tuan Ragum).

Lebuh maya nya suba sekula di Nanga Drau semina dikemendarka perintah ngajar ari primary 1 ngagai primary empat aja. Sekula di sungai Engkelili dikemendarka ngajar ari primary lima ngagai primary enam. Lebuh perintah muka kelas primary lima enggau primary enam di Nanga Drau, dia sekula di sungai Engkelili lalu ditutup. Semua anembiak dalam kandang Kaki Wong besekula ngagai Nanga Drau nembuka pelajar primary enam.

Sekumbang kedai gerempung Kereja Sama dibuka di sungai Engkelili, dia kedai tu bejalai enggau lanchar sereta maju. Nitihka singkang pemansang dunya kemaya hari tu dia kedai gerempung enggau rumah berubat di sungai Engkelili enggau kedai sereta rumah berubat di pasar Kaki Wong kena kelaung jalai raya, ngujungka nadai mayuh urang agi datai kia. Tang tu ukai reti Kedai Gerempung Kerja Sama di sungai Engkelili nya bangkrap. Sebagi duit puko mensia mayuh agi dipegai Opis Gerempung Kereja Sama di Kuching.

Siti ari tuju Gerempung Pemansang Raban Bansa munyi ka disebut dulu tadi iya nya kena ngajar urang betanam betupi, numbuhka kebun getah kawin laban maya tu menya mensia ka nguan Batang Krian apin sampal nanam getah. Tanah di sungai Engkelili bisi pemesai lebih kurang tujuh ekar, lalu nebing belakang rumah nya ditanam getah kawin chunto. Diatu, semua rumah ba sungai Engkelili, ketegal ka nadai urang meruan nyaga tauka ngintu, nyau nadai agi tau diguna. Tang taja pia, kebun getah kawin agi meruan lalu tau ditangkal.
____________________________________________
Kena ngujungka jaku, aku meri besai terima kasih ngagai Mr. Liman Numpang (Apai Scott) ka udah meri pemendar ngagai aku ngemansut ka cherita iya, pasal pemansang ka diaduka Mr. JK Wilson di sepemanjai Batang Krian, ari Budu ngili ai Krian ngagai Kaki Wong ditu ba majalah sekula kami taun 2005. Cherita tu dipansutka aku baru ditu ngambika iya ulih nyadika pengingat enggau penemu bala anembiak rebak baru ka kemaya haritu.

Pengerami Muka St. Jerome's Chapel (13 Disember 1977)

2008-10-11T23:32:00.000-07:00

Pendam Alik seduai Gambang ba puting jematan Kaki Wong mandangka pengarap Kristian udah lama ngerembai ba menua tu. Sekeda bala bukai ka bisi besekula enggau belajar pengawa pengarap enggau urang putih menya, Megong ak. Gambang. Taja pia, pengawa tu enda dikemansangka lalu lebuh maya tu menya mimit bendar urang ti mereti ka pengawa pengarap.

Taja pia, pengerembai pengawa sekula serta kaul enggau gereja St. Peter’s di Saratok nambahka penyampau rayat menua tu masuk pengarap Kristian lalu bejalaika pengawa sembiang. Lebuh maya tu menya, bala ka besembiang hari minggu deka nurun ka gereja St. Peter’s di Saratok.

Ke dudi hari tu kemari penyampau rayat menua tu, ari Nanga Drau, Sungai Engkabang, Sebubu, Mapar, Babang, Kawang Atas enggau Empelas nyau semakin betambah. Nya alai, gereja St. Peter’s di Saratok maduka dua iku bala menua tu empu nguluka pengawa besembiang, ianya LR Gana ak. Senin enggau LR Illai ak. Sagat.

Pengawa besembiang dipejalaika tiap-tiap minggu. Taja pia, penanggul agi bisi ketegal ka nadai rumah sembiang. LR Gana enggau LR Illai nguluka bala besembiang ba rumah panjai. Bala Paderi ari gereja St. Peter’s di Saratok baka Fr. Unggin mega selalu datai ngundang, ngulu ka raban Kristian menua tu besembiang hari Minggu.

Ketegal ari pemansang pengarap Kristian ba kelingi menua tu, gereja St. Peter’s di Saratok mantu, ngumpul ‘fund’ dikena nirika rumah sembiang. Pengawa ka niri rumah sembiang tu mega bepun ari penalam runding enggau pengangkun sida ka tuai ba pengarap Kristian tu. St. Jerome’s Chapel didirika lalu dipenyadika siku paderi urang putih benama Bishop House kena 13 Disember 1977.

Ketegal ka udah bisi rumah sembiang diri empu, rayat menua tu enda ibuh agi nurun besembiang ka pasar Saratok, ba gereja St. Peter’s. Tambah mega, munyi ka udah disebut diatas dia tadi, rumah sembiang tu seruran diundang paderi ari Saratok, lalu mega bisi urang ti dipaduka ngintu lalu ngiring pengawa ditu.

Penyampau urang ka masuk Kristian mega betambah tiap-tiap taun. Nya alai, kemaya haritu bala raban sida ka tuai ngulu bala anembiak redak sida ngatur pengawa ba gereja. Siti ari pemansang ka baru nyadi, ianya St. Jerome’s Hall ka nyadi siti ari palan endur begelumu tiap kali ka bisi pengawa diatur ditu.

Kaul Enggau Bala Cina, Melayu

2008-10-01T08:03:00.000-07:00

Kaul enggau bala Melayu, Cina di Menua Drau udah nyadi kenyau ari kelia menya. Tu sekeda ari cherita ngenang kaul rayat menua Kaki Wong, kelebih agi menua Drau enggau bala Melayu, Cina ka datai ari ili.

Bala Melayu kala numbuh ka siti Kampung Melayu ba urung menua Kaki Wong dikumbai urang suba Kampung Lengki. Tanah temuda ba Tanjung Gagam menya kala diempu siku Melayu benama Mahmud. Kelimpah ari nya, Siku agi Melayu benama Haji Bujang Kabi, kala ngambu bempu tanah tebing ai Krian nyentuk ka Tanjung Gagam. Pengawa seduai tu, numbuhka penyarut laban kitai Iban ngasaika menua tunga keulu tu dipangkang bansa kitai, lalu ngetan ka tanah ngambi ka enda pulai ngagai bansa bukai. Penyarut nyadi antara kitai Iban benama Jambu enggau Hj. Bujang Kabi. Penyarut seduai tu dipadanka ngena jalai chara (Pechara). Kena mutuska penyarut tu tadi, bala mayuh besetuju ngena jalai ‘bebunuh babi’. Bangkai babi diperanyutka ngili ai Krian. Endur bangkai babi nya tadi tepanggai deka dikena jadika antara, menua diempu Melayu enggau Iban. Bangkai babi ka diperanyut tadi, tepanggai ba siti endur ka disebut Batu Ampar, Sepu. Belabuh ari tu, menua Sepu keili diempu bala Melayu, lalu mua kaulu diempu bala Iban.

Penyarut enggau bagi menua antara kitai Iban enggau Melayu enda kala nanggul kaul kitai enggau sida. Bala Melayu Saratok enggau Kabong suah mendam di Nanga Drau, enggau urang bumai, bekebun, nangkal getah, berikan enggau bedagang. Siku Melayu benama Abang Ganggo lama bendar mendam belangkau di Sungai Pelanduk. Abang Ganggo tu ngidup ka diri ngena jalai berikan. Siku agi Melayu benama Jupit (nama sebut kitai Iban), bejalai ka pengawa bumai ba Tembawai Baruh. Nyentuk ngagai pun taun 80 lebih, sida Usop menyanak-nyanak diau betaun-taun ba tanah sida Niang Ex. TR Gawan bejalai ka pengawa betanam betupi. Suah bendar kitai meda bala Melayu menyanak-nyanak datai nepat pangan sida ba rumah panjai. Sekeda nya diau beminggu-minggu bekuli tauka nulung gawa.

Bala Melayu ari Kabong, suah datai bedaja ngena perau mai garam, gula, ikan masin, ikan salai, belacan, rumpung, budu, bubuk, senik, tesar,empedi enggau bansa-bansa pemakai enggau kuih Melayu. Garam, Gula, Bubuk, senik, budu enggau sekeda pemakai ka bukai dibai ngena udat. Barang tu dijual ngena sukat tin (jarang urang ngena jalai timbang). Sebedau mensia tentu nemu ngena duit, barang ka dibai bala Melayu ditukar ngena padi tauka beras. Ngambika chunto, seudat budu ditukar ngena dua pasu padi. Bala Melayu mega beguna bendar ka buah, baka buah temedak ti dikenadaika sida di menua ili. Nya alai, kadang-kadang barang ka dibai nya tadi dipetukarka ngena buah. Bala menua tu menya suah bepesan ngasuh pangan Melayu sida mai barang ti dipeguna ari ili tauka pasar. Sekeda barang nya diberi ngagai urang ka endur sida bemalam.

Sekeda nama bala Melayu ka suah bendar datai bedagang kitu maya tu menya benama Adir, Man enggau Haji Derasin. Sida suah ngetu dua tiga hari ba Nanga Drau, sebedau nampung pejalai bedagang ngagai ulu ai Krian baka Kabo enggau Budu. Pengkalan Tembawai Tinting, Nanga Drau, Lunching, Kaki Wong kelia teleba bendar nyadi ka penyangkai perau bala Melayu ka datai bedagang ari ili.

Penatai bala Cina ngagai menua tu, jauh lebih dudi ari bala Melayu. Taja pia bala Cina mega sama bela nanggam kaul enggau bala menua tu. Siku Cina benama Kinsing (nama sebut kitai Iban), suah bendar datai bedagang ngena perau lalu bemalam di Nanga Drau. Kinsing enda datai kediri aja, tang bebaika bini anak. Iya mai barang-barang pemakai ka diguna urang rumah panjai baka garam, gula, bilis enggau pusu. Suah bendar Kinsing tu pereman beminggu-minggu ba rumah panjai tu. Nitihka cherita ka ditusui urang ka tuai, Kinsing datai nepat bilik pangan iya baka ka nepat bilik diri empu. Iya nadai sanggu tama lalu ngintu diri dia tajapan sida ka bempu bilik nadai di rumah. Datai maya iya deka mulaika diri ka pasar Saratok, iya ninggalka barang pemakai enggau utai bukai ka sida ka bempu bilik nya tadi.

Bisi mega bala Cina datai bedaja barang ngena perau, dikumbai bala menua tu ‘Cina Belampu’. Sida bedagang, lalu diau dalam perau beminggu-minggu tauka bebulan-bulan nyentukka barang ka dijual sida abis. Kelimpah ari ka bejual barang, bala ‘Cina Belampu’ tu mega meli asil ari urang ka kelingi menua tu ditu baka getah enggau lada. Sida tu bekelala enggau tiap iku urang menua tu, lalu mega deka endur berutang. ‘Cina Belampu’ tu bepalan ba pengkalan di Nanga Drau tauka ba pengkalan Tembawai Baruh. Sekeda ari nama Cina ka belampu ba menua tu ianya Ah Chee, Ee Tay, Ah Yong, U Teng, Ah Seng, Ajang, Ah Chin enggau Ah Pau. (nama disebut Iban menua tu). Ketegal laban pengelama ka udah bedagang di menua tu, sekeda ari bala Cina tu rapat bendar kaul enggau rayat menua tu. Dua iku ari sida nya, ianya Ah Seng enggau Ajang bebini ngambi indu menua tu empu.

*Pengawa Cina ka belampu tu ngujung ka perintah besetuju numbuhka pasar ba menua tu, ianya Pasar Kaki Wong.

Lumbung Bundak Enggau Saban

2008-09-20T22:47:00.000-07:00

Kena 13hb Julai 2003, Lumbung Bundak seduai Saban dipejadika (Niang) YB. Dato Sri Peter Tinggom ak. Kemarau (Ahli Parlimen P.205 Saratok). Sekeda bala ka bisi datai maya tu suba ianya YB. Dato Sri William Mawan ak. Ikom, YB. Datuk Peter Nyarok ak. Penghulu Enteri, Ybhg. Tuan Jelaing ak. Mersat, Mr. Paul Igai (Setiausaha Politik Kepala Menteri Sarawak), Mr. Empeni Lang, D.O Henry Ginjom ak. Lajim, bala pemesai-pemesai opis perintah enggau bala ka bukai.

Sekeda bala pemesai ka bisi datai, ari kiba Mr. Empeni Lang, D.O Henry Ginjom Lajim, YB. Dato Sri William Mawan ak. Ikom enggau Mr. Paul Igai.

Sebedau lumbung tu digaga baru, iya endang seruran diintu rayat menua tu. Ketegal laban ka udah kelalu lama, langkau tras ka endur manggaika Santubong seduai nyau udah runtuh. Tulang seduai mega mayuh ka lenyau dikachau jelu babas. Penghulu Garan ak. Chunggut, umbuh Bundak lalu berunding ngaga lumbung nya baru ngambika iya ulih dipeda lalu dikingatka nembiak rebak dudi ila. Lumbung tu digaga baru ngena duit ari (Niang) YB. Dato Sri Peter Tinggom ka endang siku ari peturun O.K Temenggung Tandok ti nurunka Bundak seduai Saban tu.

Dato Sri William Mawan berandau enggau sekeda bala ka bisi datai. Ari kiba bendar Fr. Jonathan Ringgit, Mr. Dom Silang, Mr. Loya Seman enggau bala ka bukai.

Tusut Bundak seduai Saban bepun ari Ligam. Ligam bebini ngambi Riah, beranakka Padang. Padang bebini ngambi suyah, beranakka Gunggu. Gunggu bebini ngambi Racha, beranakka Garai. Garai bebini ngambi Rechak beranakka Jana. Jana bebini ngambi Lada beranakka Baat. Baat bebini ngambi Lanjut, beranakka Munan. Munan bebini ngambi Nyanggan, beranakka Jenun. Jenun belaki ngambi Daap, beranakka Orang Kaya Temenggong Tandok. O.K Temenggong Tandok bebini ngambi Nuee, beranakka Mawat. Mawat bebini ngambi Lua, beranakka Bundak. Bundak bebini ngambi Marai, beranakka Changgas. Changgas bebini ngambi Dindok, beranakka Daong. Daong belaki ngambi Mancha, beranakka Marai (Indai Penghulu Garan). Mati bini ka terubah, Mawat bebini baru ngambi Saur, beranakka Lemok. Lemok belaki ngambi Tinggom, beranakka Gupi. Gupi belaki ngambi Begarak, beranakka Lindun (Indai Dato Sri Peter Tinggom). Nitihka tusut tu, Bundak seduai Saban tu sama apai, tang enda sama indai.

Mr. Empeni Lang berandau enggau (Niang) Dato Sri Peter Tinggom ak. Kemarau sebedau bejadika lumbung Bundak enggau Saban. Penghulu Garan ngulu bala ka bisi datai nemuai ngagai Lumbung Bundak enggau Saban

Bundak bebini ngambi Marai (Orang Nanga Drau). Iya siku ari urang ti dipebasaka rayat sereta beberita bendar ba kandang menua Krian Tengah. Iya nyadi siku ari tuai ka ngiring rayat menua tu ngemansang ka menua rambau tu menya. Bundak mega beberita ba pengelandik adat enggau penemu tuai bansa Iban lalu teleba ngatur penyarut anembiak redak ka dipegai iya maya nya menya.

Ex-TR Sabai nusui tusut enggau cherita Bundak seduai Saban

(Niang) Dato Sri Peter Tinggom benung bejaku lalu bejadika Lumbung Bundak seduai Saban. Ari kiba nya YB. Dato Sri William Mawan, Penghulu Garan ak. Chunggut enggau YB. Datuk Peter Nyarok ak. Penghulu Enteri.

Ketegal ari pengawa, pengelandik runding enggau penemu sereta penampak rita ka dikembuan Bundak nya tadi, pemati iya diintu baka pengawa Bujang Berani. Bangkai iya enda ditumbak dalam tanah baka urang bukai, tang digaga ka rumah tauka lumbung. Rumah enggau santubung iya mega digaga ari kayu teras. Menyadi iya ka benama Saban mega endang sigi urang tampak rita tampak nama ba menua tu. Nya alai pemati iya mega diintu ngena jalai Bujang Berani. *Lumbung Bundak berimbai enggau lumbung Saban.

Abis pengawa ba Lumbung, bala pemesai enggau pengabang ke bukai lalu ditikika ngagai rumah panjai Nanga Drau. Babi dibanchak kena ka enselan ba kaki tangga. Lemambang Geraman ngelalu ka bala pemesai enggau pengabang bukai ka bisi datai sebedau sida niki ka rumah.

Pengawa ka ngaga baru lumbung Bundak seduai Saban tu kemari dikereja ngena jalai begaji. Tang taja pia, rayat menua tu ngena duit tulung ari (Niang) YB. Dato Sri Peter Tinggom enggau YB. Datuk Peter Nyarok, sereta duit pemeri diri empu ngadu ka tangga besemin ari pun penatai Tanah Pesaka (Pendam) tu nuju ngagai lumbung ngena jalai begutung-ruyung. Tuju ka ngaga jalai besemin tu, ngemudahka pengawa bala ka nganjung antu sereta bala ka deka ngabas lumbung tu.

Raban bala ka bisi datai maya nya suba. Ngena selapuk ba mua nya YB. Tuan Jelaing ak. Mersat (MP P205 Saratok), maya tu kemari benung nyadi Setiausaha Sulit ka Dato Sri Peter Tinggom ak. Kemarau.

Kelimpah ari ka ngadu pendiau Bundak seduai Saban, lumbung tu mega dikena nyimpan Antu Pala. Antu pala tu dikembuan bala urang ka tuai kelia, digantung ba ruai Megat (Penghulu Garan). Kedudi hari tu kemari, bala nyau berebak masuk Kristian, lalu nadai agi ngintu iya baka ka dikereja sida ka tuai menya. Nya alai anembiak ka rebak baru diatu enda tentu berasai nyamai ati meda iya disimpan dalam rumah. * Dulu suba dilang batu enggau dapur diengkah ba baruh gantung Antu Pala. Api seruran dipenyadika dia. Lebuh maya bisi pengawa, kelebih agi maya Gawai, Antu Pala digagaka piring. pengawa tu nadai agi dikereja bala ka rebak dudi. Nyadi sida ka tuai agi sama besetuju mindah ka Antu Pala tu ngagai Pendam, ianya disimpan dalam Lumbung Bundak seduai Saban.

Ngenang Pengawa Berikan

2008-09-14T04:07:00.000-07:00

Kemaya hari tu, bala ka diau di rumah panjai suah bendar sebana ka penusah begiga ka lauk sungai. Ai Krian ka diatu jauh bendar bida enggau ka kelia menya. Sida ka turun ka ai, ngulih ikan enggau jalai nginti, mukat, nyala enggau nyelam jarang bendar bulih mayuh. Suah agi ka lebu nadai utai dibai pulai.

Mr. Katul Ak. Luna - benung nyanggit jala

Ngenang pengawa ka dulu menya. Enti nurun ngagai ai Krian urung Lubuk Labang, Lubuk Lidung, Lubuk Tembawai Tinting, tauka Embuas suah bendar tekenyit ninga semerap ikan besai ngempas nangkap barang utai ka anyut dibai ai ari ulu tauka labuh ari puchuk kayu. Suba ikan ulu baka Semah enggau ikan pegung baka Leko enggau Chou Hu (enda nemu nama ka bendar) mudah bendar dipeda nangkap kelebih agi maya ai baru mudik pasang. Sidang ka ngetan pukat, nyala enggau nginti nadai kala pulai lebu. Sida bulih Lansi, Ikan Tunggal, Baung, Ikan Pait, Aras, Supit, Peridin, Tengas enggau bansa ikan ulu ka bukai. Bala ka bagas turun ka ai bisi bendar jalai ngidup ka diri laban ikan ka diulih laku bendar dijual di rumah panjai.

Musim kemarau, kelia nyadi belabuh ari bulan tujuh setiap taun ngujung ka ai Krian langkang bendar. Pantai ari menua ili mudik keulu nyentuk ngagai pala pasang ba Wong Embuas. Maya tu, ikan ulu jarang bendar dipeda pansut. Bala ka turun ka ai suah bendar bulih ikan ka datai ari menua ili. Kadang-kadang sida tau bulih ikan tasik ba ai urung menua tu. Aku ingat bendar dalam taun 1981 menya maya ka besekula ba SK Nanga Drau, suah bendar enggau urang nyala maya langkang. Bansa ikan ka suah bendar ulih mayuh agi bansa ikan ili, kelebih agi Baung enggau Undang. Mayuh mega bansa ikan ka enda dikelala gamal enggau bansa. Abis musim kemarau, ai pulai dalam sereta chiru baru. Ikan ili pulai ka menua ili lalu ikan ulu belabuh pansut baru.

Pengkalan Nanga Drau enggau Pengkalan Lunching dulu suba penuh enggau perau. Diatu kitai semina ulih meda dua tiga iti aja perau ditu..

Bala ka anembiak rindu bendar ka pengawa nyelam. Dulu suba ai Krian enda keruh baka ka kemaya haritu. Enti keruhpan enda tentu lama, lalu iya nyadi ketegal segang bah ai ka anyut ari ulu. Siti ari kebuah pengawa nyelam tu balat bendar ngerindu ka ati laban kitai ulih meda ikan ba dalam lubang batu din, lalu ngasai ka diri ngulih ka iya ngena senapang ikan. Suba urang nadai takut nyelam ai Krian. Kebuah iya pia laban ai sungai tu seruran rami dipansa mensia ari ulu, ari ili. Urang ka undur ari Budu, Kabo, Babang enggau menua bukai sigi mansa menua tu magang ngena enjin ‘speed’ (Moto Speed). Nya alai, lubuk ka endang ditemu bisi jelu ai pan ulih diselam bala sida ka berani agi.

Taja pan pengawa ka ngulih ikan dikereja tiap-tiap hari, ikan menua tu suba endang tetap mayuh. Kebuah iya pia, ai agi beresi. Apin bisi jalan alun di menua ulu. Mega apin bisi projek betanam betupi ka bedandang besai. Kedua, urang apin tentu mayuh macham jalai ngulih ka ikan. (Semina ngena jala, pukat, ginti enggau senapang ikan). Ketiga, urang ka turun ka ai ngiga ikan ka lauk diri empu. Semadi maya ka bulih lebih baru bisi dibagi ka jual. Keempat, urang ka turun berikan semina bala menua tu empu. Nya pan semina bala ka bisi tubuh, bisi jala, pukat tauka ginti. Bala bukai ka nadai tubuh enggau rengka kena berikan jarang bendar enggau ngereja pengawa tu.

Kemaya hari tu, lubuk ka dalam dulu menya nyau nyadi mabu laban tambun tanah ka anyut ari ulu. Lubuk mega penuh laban kerukuh kayu enggau rau. Ai sungai nyangka nyau enda nyamai endur ikan diau ketegal laban ungkap enggau baruh kayu ka tengelam tambun tanah. Suah mega kitai tepeda ka anak undang, gerama enggau ikan ka mit-mit bakalepung mati. Tentu meh urang bisi ngena utai ka bisa ba ai sungai. Kelimpah ari nya mega, urang nyau nemu bekena ka karan enggau racun!

Munggah sekeda ari pukat ka deka ditan ba sungai

Tusah bendar deka meda ikan besai semerap nangkap ba tengah lubuk kemaya hari tu. Jarang mega kitai meda urang bakaserap betibar ka jala sepemanjai ai. Nadai agi meda urang bekedugau duduk atas perau nginti peridin enggau undang ba Lubuk Labang, Lubuk Lidong tauka Embuas. Enti bisi pan jarang bendar... Siti ari kebuah laban ikan nyau nadai tentu mayuh diulih.

Kemaya hari tu ai Krian nyau pulai sunyi. Urang suah bendar besatup enggau jelu ai maya ka merau tauka turun begiga lauk. Kenu ku urang, jelu ai mega begantung ba ikan ka pemakai sida. Nya alai diatu suah bendar kitai tepeda ka sida betangkap ka bangkai jelu, sampah tauka nganu jelu tupi.

Ngintu 31 Ogos (Hari Merdeka) 2

2008-09-05T20:49:00.001-07:00

Ngintu 31 Ogos (Hari Merdeka)

2008-09-02T06:53:00.000-07:00

Fr. Jamal enggau raban iya ari Gereja St. Peters, Saratok ngulu ka bala Kristian besembiang ba St. Jeromes Chapel, Kaki Wong beserimbai enggau pengawa ka ngintu Hari Merdeka (31 Ogos).

Ngentak Rumah Ba Tembawai Masing

2008-08-24T03:12:00.000-07:00

Tanah ka deka endur berumah ba Tembawai Masing nya tanah munggu. Tunga ka ujung tanju enggau ujung bilik dikelingi lebak. Pia mega puting ari ulu nunga ngagai ai Drau, balat bendar renjan. Nitih ka gamal asal menua tu ditu, pengawa ka berumah enda tentu mudah dikereja. Tanah ka tinggi deka dichangkul, ngambika rata dulu. Tanah ka udah dichangkul nya tadi deka diangkut lalu ditambun ngagai endur ka baruh nunga ka ujung tanju enggau ujung bilik. Sida ka tuai dulu menya endang nyabung pengering ati enggau tulang. Enti enda pia, rumah enda ulih digaga laban semua pengawa enggau perengka ka dikena endang betumbuh ari pengering tulang enggau pemintar runding ngadu.

Sebedau belabuh ngentak rumah baru, sida ka tuai dulu meratika adat, penti pemali, burung, mimpi, pengelantang enggau atur. Darah enggau atau babi deka diperatika, enggai ka bisi salah tauka mai reti ka enda manah. Enti sema nyadi burung tauka mimpi ka enda manah, sida deka ngetu sarinya, nganti maya ka nadai penanggul tu. Enti sema burung enggau mimpi nya nanggul bendar (Mimpi enggau burung ka jai) sida enda tau enda muai iya dulu ngena jalai piring, jalai ading. Pia mega enggau adat serta penti pemali. Tiap iti adat enggau penti pemali sida ka tuai dulu menya enda tau enda dititihka. Enggau chara bakatu, pengawa ka berumah bejalai enggau mujur. Pemujur pengawa berumah nentuka sida ulih diau dia gerai nyamai, chelap indap, lantang senang, beranak betelesak nguan dunya tu.

Pengawa ngentak rumah mayuh agi ngena jalai gutung ruyung tauka jalai besaup. Jarang bendar ka bisi begaji. Sida besaup, kelebih agi maya ngereja pengawa ka berat baka nyangkul tanah, nebuk lubang tiang, ngangkut sereta nirika tiang, manggaika ramu ti berat enggau pengawa ka bukai ti enda ulih ditanggung tubuh siku. Pengawa ka lempung agi baka masang geladak, dinding, tangga, enggau atap ulih dipupuk diri empu. Nitih ka pengingat niang Aki, pengerami pengawa maya ngentak tau disebut baka ka begawai. Mayuh bendar kaban belayan datai ari ulu enggau ari ili. Sida ukai semina datai nguang datai ngabang, tang nyaup tulang nitih naka ulih diri empu.

Tiap iku urang nemu tanggung pengawa diri empu. Bala ka lelaki besaup ngereja pengawa ti berat baka nanggung, narit, ngetan tiang, ramu enggau rengka kena berumah. Bala sida ka indu, mela pemakai, nunyau ai ka sida ti gawa. Sekeda bala indu ka regas enggau kering agi nyaup pengawa sida ka lelaki nitih ka ulih diri. Bala anembiak ka udah ulih dikenyadika tulang, mantu ngereja pengawa ka lempung agi.

Bala tuai ka landik betukang nyadika penyanding penemu. Sida ngulu urang gawa, lalu netapka bakani utainya patut digaga. Sekeda ari bala tuai ka endang landik bendar betukang maya tu suba ianya Sabang ak. Empiu. Pengelandik Sabang tu betukang endang beberita kulu kili. Rumah ka digaga iya ukai semina tegap, tang manah dipeda. Kelimpah ari Sabang, bala bukai baka Nambi ak. Anyum, Minggat ak. Changgas enggau Numpang ak. Abang sama bela ngembuan pengelandik enggau pemintar gawa. Sida tu mega ngembuan rengka ka chukup dikena ngaga rumah. Bepun ari pemujur sida tu ngulu ka bala berumah ba Tembawai Masing, sida nyadi beberita. Mayuh bala ari rumah panjai bukai ngambi sida gawa. *Nitih ka pengingat aki, gaji gawa maya tu suba enda besai ianya dalam $20 ngagai $30 aja (Sampai tembu).

Pulai ngagai pengawa ka ngentak nya tadi, sebedau tiang bediri sida besaup numbak lubang tiang. Tembu lubang ditumbak, baru niri ka tiang rumah. Nitih ka cherita aki, jalai ka niri tiang enda sebaka. Iya dikereja nitihka pengelandik enggau pemandai tukang ka ngiring gawa. Tali, kayu penyukung, kayu ka panggal tiang, kayu penyagu enggau ai endang udah dulu disediaka. Maya ka ngentak sida nadai agi bakekalat begiga rengka kena gawa.

Maya tu kelia apin bisi tali baka ka dikena kemaya haritu. Tali digaga ari betik. Iya ditabu dulu ngambika tan dikena nanggung enggau narit tiang. Kelimpah ari tali, kayu udah dulu digaga ka panggal tiang, penyukung enggau penyagu. Ai mega disediaka dikena ngelembutka tanah.

Maya nirika tiang, semua urang besaup magang. Sida enda ibuh diarah. Sida nemu dini utai ka patut digaga. Kenu ku Aki, bala ka kering agi tulang ngangkat sereta nyagu tiang. Udah tiang nya terangkat, bala ka bukai deka nyaguka tiang nya tinggi agi ngena kayu bejanga. Sekeda agi bala bediri ari sepiak narit tali betik ka udah dulu ditanchang ba puchuk tiang ngambi ka tiang nya ulih ditanggung enggau mudah agi.

Udah tiang bediri, iya enda tau enda disukung. Kebuah iya disukung laban enggai ka berubah tauka rebah ninggang urang. Sida ngena kayu sengapa, tang mesti kering ka sukung tiang. Nya alai kayu baka gerunggang selalu bendar dikena. Sida begutung-ruyung nyentuk ka semua pengawa ti berat tadi tembu. Pengelama ka gawa enda tentu, lalu jalai ka malas duruk pangan diri mega nitihka pengelantang.

Maya tu kelia, bisi jaku selebubu ka beribut kulu kili. Bisi urang enda arap ka urang Drau ulih nembu ka rumah sida. Kebuah sida bejaku bakanya laban tanah enda tentu entap, tiang ka diban enda sebaka pemanjai, tiang enggau ramu mega enda sama pemesai. Sida enda terundingka bakani deka nyemela ka rumah ba tanah ka bakanya ngena ramu ka enda sebaka. Taja pia, munyi ka disebut tadi sida ka tuai tu endang sigi tukang. Tiang ka tinggi dikayak. Ai dipanjah dalam lubang tiang ngambi ka tanah lembut. Tiang tadi ulih diunjam dalam agi nitih ka peneka sida. Enti sema tiang ka didirika nya tadi kelalu dalam masuk dalam tanah, kayu digaga nyadi ka panggal pun tiang. Enggau jalai bakatu, sida ulih nyemelaka peninggi puchuk tiang.

Minggat ak. Changgas enggau Numpang ak. Abang ngepun ka pengawa ngentak. Minggat tu nyadi Tuai Rumah maya tu, lalu iya disukung Numpang. Minggat enggau Numpang tu datai ari siti bilik. Nya alai maya ka berumah, seduai agi bekunsi ngaga rumah siti. Taja pan pia, rumah ka digaga seduai besai agi penaik ari urang bukai (5 penaik), laban seduai ngadangka anak uchu ka dudi hari ila enda ulih begulai belama. Nyau ka dudi ari, bilik seduai tu tadi disapat nyadi 2 pintu. Mua ari ulu enggi Numpang lalu iya ka ari ili enggi Minggat.

Tembu ngentak rumah Minggat seduai Numpang, bala bukai pan sama bela mupuk nitih ka pemisi enggau pengelantang diri empu. Gundi ak. Anyum terubah nampung mua ari ili (sepiak Minggat). Sebedau ditampung Senin ak. Umbol. (Senin lama diau ba rumah dapur, sebedau nirika rumah besai). Sabang ak. Empiu terubah nampung mua ari ulu, dititihka Gambing ak. Gindal, Nambi ak. Anyum, Rengan ak. Atat, enggau Entamin ak. Samat (Entamin mega dulu diau ba rumah dapur sebedau ngentak rumah besai). Kenu ka Aki, Nambi ak. Anyum terubah iya ngambu berimbai enggau Sabang. Tang ketegal ka apin chukup perengka enggau ramu meri endur iya ngagai Gambing.

Taun 1937, tujuh pintu bilik udah tembu bendar digaga lalu udah endur diau, ianya enggi Minggat seduai Numpang, Gundi, Sabang, Gambing, Nambi enggau Rengan. Bala ke bukai agi diau ba dapur, tauka baru ngentak dapur. Kelimpah ari Senin enggau Entamin, bala bukai ka udah ngentak dapur maya tu kelia ianya Jan ak Suat, Ansi ak. Ngelayang enggau Ajah ak. Sumok.

Lepas taun 1938, pemanjai rumah tu jauh bendar nambah. Bala ka nampung mua ari ili ianya Gimang ak. Maring (Bilik Achin ke diatu), Luna ak. Megong, Mensan (Apai Megat), Ansi ak. Ngelayang, enggau Juing. (Apai Salok). Bala ka nampung ari ulu nya Entamin ak. Samat (ngaga rumah besai), Jan ak. Suat, Ajah ak. Sumok, Uyu ak. Unong, Impa ak. Anyum, Engkoh ak. Madang, Unchang ak. Antas enggau Titum ak. Unjah.

Nyau ka dudi hari (lebih kurang dalam taun 60-an), Chundi ak. Anjah nampung mua ari ili, berimbai enggau bilik Juing. Aki Ika enggau Ini Ika(Rebecca) belangkau nungking berimbai enggau Chundi (ba jalai penatai). Dalam timpuh 10 taun dalam taun 1980-an, bala ka nampung ari ili betambah baru. Sida ka nampung baru tu ianya Jungan ak. Geraji, Katum ak. Numpang, Geraman ak. Undau, Penghulu Garan ak. Chunggut, Anau ak. Empawi enggau Ngelai ak. Numpang. Mua ari ulu mega bisi nambah baru. Bala ka baru ngidup ka diri baka Joshua ak. Sedin nampung sepiak bilik aki iya Titum. Dalam taun 2006, Anyum ak. Enggi nampung berimbai enggau bilik Joshua ari ulu. Ka dudi hari tu kemari, bisi dua tiga pintu bala ka diau belangkau, tang besempekat enggau rumah panjai tu. Sida tu Louis ak. Brayun, Sangking ak. Munan enggau Mindun ak. Jelani.

Dagang Bejalai

2008-08-11T07:12:00.000-07:00

Pengawa dagang bejalai endang udah nyadi di menua Drau ditu berengkah ari kelia. Kenu ku sida ka tuai, maya pegai perintah urang putih (Brooke), masuk ngagai maya Jipun, lalu ngalih ngalih Colony British taun 1946, menua tu semampai diundang bala Laut enggau Cina ka bedagang bejalai enggau belampu. Sida mudah mudik ngagai Kaki Wong laban ditu meh endur ai pasang tepantup. Mudik kulu nyerumba pasang, lalu pulai ka ili ngundur ai surut. Mensia ka nguan menua tu mayuh. Nya ngasuh barang ka dijual nadai kala enda laku. Enti kitai meratika, pasar Kaki Wong menya didirika District Council enggau perintah ketegal laban pengawa dagang menua ulu ka mujur bendar di Kaki Wong.

Kelimpah ari bala Cina ka ngentap bedagang ba pasar Kaki Wong, pengawa sida ka bedaja niki ngagai rumah panjai endang enda kala ngetu ari kelia menya nyentuk ka seharitu. Iya ka bedaja tu bala Cina, Laut, Indon enggau kitai Iban empu. Penatai sida tu endang ari mayuh bengkah menua. Bisi ari Saratok, bisi ari Debak, bisi ari Kabong, bisi mega ari Sibu enggau Kuching, lalu urang Indon tebal agi ka datai ari Badau.

Aku ingat bendar maya pasar Kaki Wong agi bisi kelia. Cina Kaki Wong baka Bini Ah Bey (Lian) enggau bala anak Ah Hui niki ka rumah panjai bedaja kuih enggau sekelim (Ice-cream). Sida ka bedaja jarang bendar lebu. Kebuah iya pia laban bala di rumah panjai, kelebih agi bala anak mit deka bendar makai kuih digaga Cina. Ice-cream laku, laban dulu suba rumah panjai apin bisi peti ais. Maya musim panas, berebut bala nutu sida ka mai sekelim mangkuk enggau sekelim pau(Enti Cina lelaki dikumbai kitai Apek Sekelim).

Bala kitai Iban empu bisi mega datai bedaja. Utai ka didaja lebih agi barang pemakai baka ikan ulu, dagin babi menua, kasam babi enggau babi babas. Bisi sekeda mai kasam Semah ulih ari menua tunga Batang Rajang enggau bansa utai bukai ka jarang ditemu kitai rumah panjai ketegal ka nyau pedis amat digiga kemaya hari tu.

Bisi mega sekeda kitai Iban datai mai barang ka bukai. Aku ingat ka siku kitai Iban ka landik bendar nengkebang ngaga utai, ianya niang Dunging ari Rimbas selalu datai mai tinchin gaga iya empu, dikumbai urang tinchin Dunging. (Anak iru Dunging ka benama Sangking bebini ka Nanga Drau ditu). Nyau ka dudi hari tu kemari, bisi mega bala kita Iban nguji enggau urang bedaja kain. Kain ka dijual dibai ari Entikong tauka Tebedu antara menua kitai enggau Indonesia. Siku ari bala menua tu ka udah ngereja pengawa tu ianya niang Kedai ak. Jeti tauka Apai Lajun. Siti ari pemanah niang Apai Lajun menya, iya deka diutang. Bala ka meli, kelebih agi sida ka indu mayar ni naka ka ulih setiap kali iya datai.

Bisi mega raban urang Indon, datai ari Badau (masuk nengah Lubuk Antu) ketebal agi bebai kain, tajung, pua, baju urang indu enggau rengka ngepan digaga ari pirak. Sekeda sida ka datai tu mega bebai ka ikan masin, ikan salai, telu penyu, enggau sekeda pemakai bukai ari Badau ka nadai kala dipeda kitai menua tu. Bala Indon ari Badau tu suba teleba bendar enggau kami sebilik. Sida selalu nepatka bilik kami ketegal apai ka nyadi tuai rumah. Suah sida iya bemalam semalam ditu sebedau bejalai baru pagi siti ngagai rumah panjai ka besemak ditu, baka Sungai Engkabang, Sebubu, Mapar, Babang, Kawang enggau Melak. Niang indai suba kiruh bendar nyendia ka peninduk enggau mela pemakai sida ka datai. Suah agi ka nadai ngira pengiruh enggau pengerugi laban ka rindu ka sida ka datai. Indai selalu diberi sida iya kain tauka ditinggalka sida iya lauk kena meri terima kasih ka penyiru ka endur sida diau.

Suah mega urang ka datai bejual barang (lebih kurang baka direct selling). Bejual penapis ai, bansa-bansa periuk, set chapak mangkuk, barang-barang plastik kelebih agi baka bisin enggau jagan plastik ka dijual belungguk-lungguk (Mayuh bansa barang dijual sekali). Apai seduai indai bisi ampit meli set penapis ai. Bala sida ka bedaja bakatu suah bendar datai, kelebih agi enti enti bisi bala ka udah berutang ba sida. Bulan siti sida datai baru mai barang baru sambil ka ngumpul duit utang ari bala rumah panjai. *Selalu iya barang ka dijual sida ka bedaja barang bakatu, rega iya dua tiga kali lipat lebih mar agi ari di kedai. Tang ngasuh iya tau laku laban barang datai ka rumah lalu iya mega ulih dibayar enggau jalai pupuk.

Bisi siku Laut ari Debak, Enti enda salah ingat aku dikangau urang Haji Nawi enggau anak iya selalu datai bedaja kain, jam, rengka urang indu enggau barang ka bukai. Bida Haji Nawi tu enggau sida bukai ka sama bedaja tu, iya enda tentu ibuh ka barang iya dibeli ngena duit. Iya rindu amat ati enti barang iya ditukar enggau rengka lama kitai Iban. Mayuh bendar bala maya tu kemari beruah ka sadau, begiga ka baka sida raga, sida ma, duku, ilang, kain kebat enggau ka bukai. Sangka ati aku, siti ari dagang iya tu, ianya bejual rengka lama kitai Iban ngagai bala Cina di negeri din. Peda aja kedai souvenir ba sebelah Carpenter Street di Kuching din, mayuh bendar rengka lama kitai Iban dijual ngagai bala pelancong luar.

Enda ngira nama bansa urang ka datai, tauka nama barang ka didaja, bala di rumah panjai ditu enda kala leju ngulu sida. Enti enda meli rindu ngebak, lalu meratika utai ka dijual urang. Bala indu anembiak mega sama-sama bekangau pangan diri madah ka urang ka bisi datai bejual. Tu siti ari jalai sida begelumu enggau diri sama diri, lalu iya udah nyadi siti ari pengidup kitai ka diau di rumah panjai, baka di Nanga Drau ditu.

Tanah Pesaka, Kaki Wong

2008-08-08T01:02:00.000-07:00

Terubah urang ka tuai menya mungkal pendiau di menua kelingi Drau (Kaki Wong), sida apin bisi pendam endur nganjung antu (Urang ka mati). Nya alai maya tu kelia, enti bisi dituntung penusah pemati, bangkai dianjung ka pendam Burui di Melupa. Pengawa nganjung antu maya tu menya ukai utai mudah. Sida merau ngili ka ai Krian ka Melupa. Pengalama pengawa ka nganjung antu ka Melupa nadai dikingatka, tang munyi ku tusui sida ka tuai, iya ukai semina setaun dua.

Pemuas ka nganjung antu ka melupa, sida belabuh berunding ngiga tanah ka semak agi. Sida netapka tanah tebing kanan ai Krian, beseberai enggau pasar Kaki Wong lama, betumpu enggau puting jematan digaga nyadi tanah pendam. (Maya tu pasar enggau jematan Kaki Wong sama apin bisi). Tanah asal di Kaki Wong nya maya tu apin bisi urang ngempu, belabuh dikena endur numbakka anak mit mati lulus.

Urang tuai ka dulu bendar ditumbak ba pendam Kaki Wong tu, ianya Niang Alik enggau anak iya ka benama Gambang. Seduai tu, urang ka dulu megai pengawa Kristian di menua tu kelia. Lebuh jematan Kaki Wong lama suba agi dikena mensia mayuh, pendam seduai tu dipeda bendar ari puting jematan. Pendam seduai tu mega nyadi ka pun jalai urang tama lebuh maya ka nganjung antu. Pendam tu dikena lima buah rumah panjai ka bekelingi ditu, ianya Nanga Drau, Sungai Engkabang Ulu, Sungai Engkabang Ili, Sebubu enggau Mapar.

Kelama-lama pendam Kaki Wong udah dikena, iya pan nyau majak sekut. Sida ka tuai majak irau ati ngira ka endur numbak bangkai ka majak mimit. Penghulu Garan ngulu ka bala tuai-tuai rumah berunding ka jalai begiga tanah kena nambahka tanah pendam ka lama. Pun runding sida deka nanya tanah ba kaki Belingau endur pendam baru. Sida ka diau besemak dia enda tentu besetuju laban enggai semak pendam.

Enda jadi di kaki Belingau sida nanya tanah berimbai enggau pendam lama. Tanah tu enggi Gelima ak. Megat. Pemutus runding sida ka tuai, tanah tu ukai diambi sengapa pia, tang enggau jalai beli. Semua bala kelingi menua tu ka nyanggup enggau bempu pendam sama mayar RM25.00 sepintu ngagai sida Gelima. Semina apai Anggat (Paul ak. Entamin enda enggau mayar. Kebuah iya pia laban tanah iya ka berimbai enggau tanah pendam baru tu digaga nyadi ka jalai.

Pendam baru Kaki Wong disebut 'Tanah Pesaka'. Sida ka tuai mega bulih duit tulung ari perintah RM5000.00 dikena nyungkur tanah tu betingkat-tingkat baka ka dipeda kitai diatu. Lebuh maya perintah, ari penemu Niang Ex-YB Datuk Peter Tinggom ak. Kemarau deka ngadu ka Lumbung Bundak enggau Saban ba pendam tu, jalai tangga semin digaga ari pun jalai nyentuk ngagai lumbung. Terubah ka ngaga jalai semin tu kemari, bala sama bela besetuju deka meri duit nitih ka pemisi diri empu. Iya digaga enggau jalai gutung ruyung dalam taun 2003.

Di baruh tu list nama bala ari Nanga Drau, Sungai Engkabang, Sebubu enggau Mapar ka mayar duit RM25.00 ka tanda enggau bempu 'Tanah Pesaka' Kaki Wong.

Rh. Sabai ak. Kadam, Nanga Drau. (Diatu RH Gana ak. Senin)
1. Penghulu Garan ak. Chunggut

2. TR. Sabai ak. Kadam
3. Jullius Illai ak. Sagat
4. LR. Gana ak. Senin (diatu TR Gana ak. Senin)
5. Gawan ak. Sabang (Niang)
6. Ngelai ak. Numpang (Niang)
7. Mudit ak. Numpang
8. Inyang ak. Numpang (Niang)
9. Katum ak. Numpang
10. Senang ak. Gambing
11. Minggat ak. Mitai
12. Blanda ak. Gundi (Niang)
13. Bayai ak. Bungin
14. Anyun ak. Enteri
15. Mengga ak. Giang
16. Geraman ak. Undau
17. Anau ak. Empawi
18. Nyaing ak. Tambat
19. Tukau ak. Unchang (Niang)
20. Joshua ak. Sedin
21. Justin ak. Enggi
22. Louis ak. Brayun
23. Kundat ak. Brayun
24. Rambai ak. Inin
25. Nilau ak Ajah
26. Mawan ak. Dudum
27. Andu ak. Senin
28. Kacha ak. Achin
29. Empawi ak. Minggat
30. Bilal ak. Jan
31. Jelemin ak. Sagoh
32. Ujai ak. Gani
33. Paul ak. Entamin
34. Sangking ak. Munan
35. Manggie ak. Salok

Rh. Panggai ak. Achan, Sebubu Mapar.
1. TR. Panggai ak. Achan
2. Jelemin ak. Telajan
3. Gadum ak. Lunsa
4. Jimmy ak. Datu
5. Nyandang ak. Kam
6. Enteri ak. Less
7. Julin ak. Nyandang
8. Sekam ak. Panggai
9. Jipun ak. Kedai
10. Kedit ak. Bugat
11. Sila ak. Enggang
12. Mula ak. Minggat
13. Kampit ak. Datuh

Rh. Gon ak. Sajok, Mapar. (Diatu Rh Saban ak. Anding)
1. TR. Gon ak. Sajok
2. Penghulu Atang ak. Sangkan (Niang)
3. Engkabi ak. Lanchang (Niang)
4. Saban ak. Unggang (Niang)
5. Anding ak. Untan (Niang)
6. Melaka ak. Kam
7. Siba ak. Belaka
8. Sajok ak. Ayun (Niang)
9. Jiram ak. Seng
10. Rakin ak. Enggan
11. Richard ak. Tindin
12. Adut ak. Gelunggan
13. Endit ak. Saban
14. Philip ak. Lanchang
15. Tawi ak. Senja
16. Totat ak. Miat
17. Lega ak. Tinggi
18. Antas ak. Rambok
19. Intai ak. Saban

Rh. Liap ak. Unang, Sg. Engkabang, Drau
1. TR. Liap ak. Unang
2. John ak. Danggat
3. Temenggong ak. Danggat
4. Linsam ak. Mawar
5. Dugat ak. Kendawang
6. Umbat ak. Dugat
7. Kudang ak. Tukau

Rh. Blaki ak. Galau, Sg. Engkabang Drau
1. Galau ak. Seman
2. Anong ak. Magal
3. Udin ak. Renang
4. Usang ak. Jemol
5. Chemagat ak. Igoh
6. Ajie ak. Jelom
7. Baing ak. Udin
8. Braoh ak. Galau
9. Antay ak. Kendawang
10. Kenyali ak. Kendawang
11. Tom ak. Renang
12. Senja ak. Belaja
13. Awat ak. Renang

Meli dudi
1. Stuart ak Charlie

2. Bauk ak. Buma

Temuda Tuai di Jeno

2008-07-18T00:02:00.000-07:00

Tanah di Jeno diperimba aki ini kami menua tu ke benama Jagit, Melana enggau Chemuring. Tanah tu suah dikena kami ngereja pengawa kunsi, baka ka bumai, nupi sapi, nanam koko enggau ka dudi bendar tu kemari endur nanam getah (Rubber mini Estate).

Tu nama urang tuai ke enggau bekunsi temuda di Jeno enggau urang ka nampung bilik sida ka diatu.

1. Nambi ak. Anyum - ditampung Sabai ak. Kadam
2. Umbol ak. Andam - ditampung TR Gana ak. Senin
3. Ilon ak. Nisau - ditampung Andu ak. Senin
4. Chundi ak. Unjah - ditampung Dang ak. Digut
5. Unchang ak. Antas - ditampung niang Tukau ak. Unchang (diatu Kendat ak. Tukau)
6. Gindal ak. Danggat - ditampung Senang ak. Gambing
7. Abang ak. Buda - ditampung TR. Mudit ak. Numpang
8. Manang Ambu ak. Gasing - ditampung Minggat ak. Mitai
9. Sabang ak. Empiu - niang Ex TR Gawan ak. Sabang (diatu David ak. Gawan)
10. Entamin ak. Samat - ditampung Paul ak. Entamin
11. Rengan ak. Sang - ditampung Mawan ak. Dudum
12. Megat ak. Mensan - ditampung Penghulu Garan ak Chunggut
13. Gimang ak. Baring - ditampung Rantai ak. Achin
14. Uyu ak. Unong - ditampung Ilai ak. Sagat
15. Suat ak. Nisau - ditampung Bilal ak. Jan
16. Megong ak Gambang - ditampung Tr. Panggai ak. Achan
17. Langan ak. Sang - ditampung Jimmy ak. Datu
18. Banat ak. Danguk - ditampung Baing ak. Kampit
19. Seman ak. Melawi - ditampung Kedit ak. Bugat
20. Empaga ak. Slin - ditampung Jelemin ak. Saguh
21. Giri ak. Antau - ditampung Mula ak.Minggat
22. Lunsa ak. Dundang - ditampung Gadum ak. Lunsa
23. Unjah ak. Unong - ditampung Enteri ak. Tembum
24. Luna ak. Megong - ditampung Nyaing ak Tambat

Jalai Semin Ujung Tanju

2008-07-10T00:15:00.000-07:00

Siti ari penanggul ka besai amat dikena ngintu rumah panjai lama ianya ba senentang pemeresi. Ujung tanju, enti enda dijaga tau jai bendar dipeda ketegal laban sangkar utai ka ditupi, tugung ramu enggau bekau pengawa ka dikereja kitai besari-sari. Bisi sekeda urang enda tentu peduli ka pengamah ketegal laban uras ka dibuai seneka ati ba ujung tanju.
Kandang ujung bilik mega deka pedis bendar diperesi, kelebih agi enti bala ka diau di rumah panjai enda seati ngadu ngintu iya. Ukai semina ketegal laban uras ka ditikau seneka ati, tang tanah mega tau nyau ami laban ai ka labuh ari dapur, agu enggau bilik mandi. Tanah ka ami tau balat bendar dipeda enda beresi, lalu deka balat bendar bebau kelebih agi enti iya nyau becampur enggau bekau pemakai, uras ditambah agi enggau tai babi, manuk enggau itit ka ditupi di baruh rumah.

Bakanya mega dalam kandang baruh rumah. Baruh rumah endang pedis amat diberesika, kelebih agi enti rumah panjai nya begantung. Urang ka tuai nyangka nemu reti pasal pemeresi baruh rumah lalu enda muruk ka uras tauka bekau pemakai enggau seneka ati, tang bala anak mit enda ulih ditagang enggau mudah. Nya alai enti baruh rumah enda selalu diperatika bala tuai ka ngiring anak biak rumah panjai, baruh rumah mega tau kamah amat dipeda.

Pengawa ka ngintu pemeresi kandang rumah panjai tu beguna amat, ukai semina ngasuh iya manah dipeda urang ka datai tang mega ka tuju pengerai mensia mayuh ba rumah panjai nya empu. Kerubung tin sardin, plastik mee tauka plastik bukai enti enda dibuai tau ngandang ai lalu nyadi endur nyamuk besarang. Bau ka datai ari uras enggau bekau pemakai ka dipuruk ka baruh rumah tau bendar ngangau lalat enggau langau. Utai tu tau bendar nganjung igi penyakit ka kitai ka diau ba rumah panjai.
Di rumah panjai Nanga Drau ditu, atur kena ngintu pemeresi kandang rumah panjai endang udah dikereja belabuh ari iring sida ka tuai dulu suba. Pengawa ka begutung-ruyung nebas, manchit, ensiang ujung tanju, ujung bilik, tengah laman, jalai pendai enggau jalai ka pasar endang dikereja tiap-tiap taun kelebih agi sebedau maya deka ngintu pengerami baka Gawai Dayak, Krismas enggau pengerami bukai di rumah panjai.

Diatu, JKKK rumah panjai ka baru dipegai bala ka anembiak regas bendar nampung lalu nambah ka agi pengawa ka udah dipun sida ka tuai menya. Pengawa ka ngintu pemeresi ukai semina diaduka lebuh maya ka bisi pengerami aja. Sida bisi nyendiaka tusun pengawa ka patut dikereja lalu maya pengawa nya deka dikereja. Sida mega ngaduka komiti mit ka diasuh nyaga sebengkah-sebengkah pengawa baka komiti jalai, komiti dapur, komiti api, komiti ka ngintu pendai enggau ka bukai. Ari tusun pengawa ka udah disediaka bakatu, bala komiti nemu bagi pengawa diri empu, lalu tu ngujung ka batang pengawa ka udah diagihka nya tadi ulih dipejalaika enggau manah agi.

Jalai besemin ka dipeda dalam gambar tu belabuh dikereja sebedau ngintu pengerami Gawai Dayak 2008 lalu tembu enda lama udah bekau ka begawai. Enggau jalai semin ka bakatu, ujung tanju rumah panjai, tajapan lama tampak bendar beresi ari ka selama tu. Pengawa ka ngadu jalai besemin bakatu nyangka enda ulih dikereja kediri, kelebih agi ketegal ungkus iya ka besai. Tang taja pia, enggau bantu ari YB tauka upis-upis perintah kelebih agi Majlis Daerah, pengawa bakatu nyadi mudah amat dikereja. Iya nyangka enda datai ka diri empu tang mesti ari pinta, ari tanya ngagai urang ka ulih nulung.

Lanji

2008-06-27T06:45:00.001-07:00

Lanji dikena urang ngangkut padi ari umai nuju ka rumah panjai. Lanji lebih besai sereta panjai agi ari agak tauka belitung. Lanji ka tinggi kadang-kadang nyau ka sebela enggau kitai bediri. Urang kelia beguna ka lanji besai sereta panjai ngulihka padi mayuh agi ulih diangkut.

Tibang

2008-06-21T21:41:00.000-07:00

Kemaya hari tu, nadai mayuh agi kitai rumah panjai ngemeran ka pengawa bumai. Enti bisi pan, iya enda dikereja baka ka dulu kelia. Urang bumai semadi kena ngidup ka leka benih. Sekeda ka agi bumai nyau ngalih ka menua ili bumai paya.

Urang kemaya hari tu deka agi ngereja pengawa bukai, baka ka nangkal getah tauka bekuli. Getah besai amat rega lalu enggau jalai bekuli duit diterima jampat. Beras ulih dibeli ba kedai Cina. Taja pan rega beras jauh amat udah niki, tang duit ulih nangkal enggau kerja bekuli mega besai. Nya alai mensia kemaya hari tu mudah agi meli beras di pasar dibanding ka pengiruh enti sida bumai.

Tibang enggau pekekas bumai ka bukai nyau nyadi cherita lama (History) dalam pengidup kitai. Mayuh anembiak baru diatu enda nemu utai tu agi bisi ba rumah panjai sida. Sekeda sida endang enda nemu utai ka benama Tibang enggau reti guna iya.

*Tibang tu digaga ari kulit kayu. Tibang dikena urang tuai dulu suba endur nyimpan padi. Urang ka mayuh padi, ngembuan Tibang ka besai agi. Tibang deka penuh laban padi kelebih agi maya udah badu ngetau. Beras disimpan dalam Tibang dalam pengelama lebih kurang setaun, laban taun siti agi sida deka bulih padi baru.

Tibang dalam gambar tu disimpan ba sadau gantung di rumah panjai Nanga Drau. Diatu, sadau rumah panjai nyau udah bekena ka dik. Nya alai sida ka anembiak nadai ulih meda Tibang ba sadau gantung din.

Kelita Temaga

2008-06-20T06:34:00.000-07:00

Sebedau bisi enjin api enggau api elektrik, penerang malam hari ba rumah panjai begantung ba kelita. Lampu gas dipasang semina maya bisi pengawa ba rumah panjai, tauka maya ka bisi temuai. Nya alai, sepemanjai rumah panjai kitai ulih meda senawah api kelita bakapeli malam lebuh hari.

Kelita endang udah dikena kitai Iban ari kelia menya. Bansa kelita ka mayuh dikena urang ari kelia ianya kelita tin ka mit, ulih meli ari pasar. Bisi mega kitai Iban nemu ngaga kelita ka diri empu ari tin tusu enggau tin milo ka mit. Kelita ka pengabis manah dikena kitai di rumah panjai maya tu suba digaga ari temaga (Gambar di atas).

Pun lemai, sebedau hari petang sida ka tuai belabuh beisi ka gas ngagai kelita. Sekeda sida kiruh nganti sumbu kelita ka udah jai. Lebuh hari nyau makin petang kelita belabuh ditungkun di bilik enggau di ruai. Pengingat aku, tiap-tiap ruang dalam bilik, belabuh ari dapur nyentuk ka ruai endang disediaka enggau siti kelita. Chukup jam, maya lemai hari kitai ulih meda mensia terudus beanjungka kelita ka ruai diri empu. Ruai enda tau petang. Nya alai endang udah adat ba rumah panjai, ruai enda tau enda ditungkun ka api.

Di rumah panjai jam maya tinduk enda sebaka enggau di nengeri. Kebuah iya pia, nadai tentu pemerindang lebuh ka malam hari. Nya alai sida deka tumu bendar deka ngenat ka diri di bilik ngambika ulih tumu angkat pagi siti. Pukul 9.00 malam, nyau ka semua ruai udah petang magang. Bala ti mulai ka diri ka bilik sama bela minching kelita pulai ka bilik.

Di rumah panjai mega, jarang bendar kitai meda urang tinduk enda beapi. Kelita dipasang enda tentu jauh ari endur ka tinduk. Enti api kelita padam dipuput ka ribut, dibintih indu utai tauka abis gas, sida deka beguai ngadu lalu nungkun iya baru. Pengingat aku ba rumah panjai kami di Nanga Drau ditu, lubang idung selalu chelum laban asap kelita maya ka dani pagi. Kadang-kadang kibung pan chelum laban ka kena asap kelita tiap-tiap malam.

Enjin api belabuh dikena ba rumah panjai tu lebih kurang dalam 28 tahun ka udah lalu. Enjin api ngena minyak diesel dipasang tiap-tiap malam ari pukul 7.00 ngagai pukul 9.00 malam. Lepas pukul 9.00 enjin api deka dipadam baru. Nya alai, taja pan udah bisi enjin api, kelita agi beguna bendar. Iya dipasang kena tinduk nyentuk ka pagi. Maya enjin ka rusak, tauka maya enjin ka nadai minyak kelita deka dikena baka selama.

Tengan tahun 1990-an , api SESCO belabuh disambung ngagai rumah panjai tu. Belabuh ari maya tu, mensia nyau nadai tentu bekena ka kelita agi. Kebuah iya pia laban api elektrik nyau bisi 24 jam.

Diatu kelita nadai agi dikena urang ba rumah panjai. Jarang amat kitai bisi meda urang nyimpan kelita tin ka mayuh bendar dikena dulu suba. Kelita temaga diatu disimpan dalam jemari tauka kena ngerias bilik aja. Sangka aku, mayuh bendar anembiak rumah panjai ka ada kemaya haritu enda kala meda kelita, lalu enda terunding ka jalai ngena iya.

Ipang

2008-06-13T07:04:00.000-07:00

Sebedau bisi ai paip dikena ba rumah panjai, urang nyauk ai ka sungai. Ai ka disauk nya tadi, kelebih agi kena berapi tauka ka irup. Maya tu suba kibut tauka tong plastik (mayuh saiz) digaga ka tali lalu di ma ba belakang. Kibut plastik tu dikena urang nyauk ka sungai. (Dulu agi ari nya, urang ngena kerubung buah labu, kena nyauk ai enggau endur nyimpan ai).

Pengawa nyauk ai tu ukai semina dikereja sida ka indu aja. Bala urang ka lelaki enggau sida ka anembiak mega sama bela minching tauka ngema kibut lebuh maya ka nyauk tauka mandi ka sungai. Urang ka tuai deka nganu sida ka anembiak enti enda minching kibut, laban takut ka nadai chukup ai dikena di rumah.

Lebuh maya bisi pengerami baka gawai, tauka pengawa bukai di rumah panjai, kitai ulih meda bala ka nyauk terudus mansa nengah empuan. Nya alai jarang bendar kitai meda empuan rangkai, laban iya seruran ditengah bala ka mandi enggau nyauk ai ari sungai.

Di rumah, ba endur ka disebut 'Las Ai' antara bilik besai enggau dapur penuh laban kibut enggau ipang kena nyimpan ai. Ipang tu ulih meli ari kedai. Asal ipang endur urang ngengkah ka telu, ka dijual ba kedai Cina. Kitai Iban dulu suba beguna bendar ka ipang laban iya besai endur nyimpan ai.

Diatu nadai mayuh agi urang bisi ngembuan ipang. Enti bisi pan, iya enda dikena agi. Sekeda urang kemaya hari tu ngena ipang kena nimbun ai ujan. Iya beguna bendar kelebih agi lebuh maya ai paip ka rusak. Sementara nganti paip ka manah baru, bala di rumah panjai ulih nyimpan ai dalam ipang sida.

Beramu Kena Berumah

2008-06-05T03:15:00.000-07:00

Dalam pengelama sepuluh taun anggur deka berumah baru, kelimpah ari berunding ka endur berumah, urang ka tuai belabuh begiga ramu. Tiang, sanding, gelegar, atap, dinding enggau utai bukai enda tau enda disediaka dulu sebedau rumah bediri.

Pengawa ngiga ramu ukai utai mudah dikereja. Siti ari penusah sida ke tuai maya tu menya, sida nadai pekekas baka kemaya hari tu ngereja kayu. Retinya semua utai begantung ba tulang enggau pengeras ati. Kedua iya, menua tu nadai tentu mayuh kayu kering. Sida ka tuai enda ulih enda bejalai jauh, ngagai menua bukai beramu ka kayu kering. Sida bedarat nengah babas puang, neresa paya, nanjak bukit, nyemerai sungai sebedau datai ngagai kampung endur beramu enggau beban ramu.

Udah bulih ramu, sida deka ngangkut ramu pulai ka Drau. Sekali agi sida nyabung pengering tulang enggau pengeras ati. Enti tulang enda kering lalu ati enda keras berumah, pengawa baka tu enda ulih dikereja. Sida besaup ngesan. Sida besaup narit, ngiling, neruju enggau munggah ngagai perau. Pejalai pan ukai nya semak. Sida ngangkut ramu ari Kabo, Kerangan enggau Kawit.

Minggat ak. Changgas enggau Numpang ak. Abang terubah beramu ka Kawit. Udah nya seduai mai bala bukai baka Sabang ak. Empiu, Gundi, Untol enggau Gimang beramu ka Kerangan. Maya tu kelia kayu teras agi mayuh. Urang ka bempu menua nadai nagang bala ka ngambi ramu. Nya alai sida ka tuai menya, taja pan datai jauh, sida nadai penanggul bulih ramu kena berumah. Sida tau ngambi ni naka pemayuh ramu ba endur siti-siti. Sabang, Minggat, Numpang, Rambok enggau Impa endang beberita kering ati enggau kering tulang ngereja pengawa beramu. Nitih ka cherita urang ka tuai, enti tiang naka 8 inci segi empat pemesai agi kelalu lempung ba sida tu.

Enti enda teulih ka ramu diri empu, sida ngupah urang bukai beramu, lalu ngaga ramu ka sida. Nambi ak. Anyum ngupah siku urang benama Timbang ari Klua ngaga 12 batang tiang (Pemesai 6 inci, pemanjai 3 depa). Maya tu menya upah urang beban tiang agi murah. Nambi mayar Timbang $2.00 ka sebatang tiang. Ukai semina gaji nebang enggau beban aja, laban Timbang ngangkut lalu nganjung tiang nya datai ka Nanga Drau.

Enda chukup beramu di Kawit enggau di Kerangan, sida mudik Batang Kabo ka Nanga Ijan, Rantau Kechala enggau Lubok Kudi. Di Kabo, Nambi, Gundi enggau Jelani bulih tiang 7 ngagai 8 inci pemesai, lalu 3 ngagai 4 inci pemanjai. Kelimpah ari beramu ka tiang, sida mega ngaga atap. Sida beban atap teras ba Nanga Limat, Kabo.

Munyi ka udah disebut aku di atas nya tadi, pemedis pengawa beramu tu menya ukai semina senentang ka nebang enggau beban. Iya ka pedis agi nya ngangkut tiang enggau ramu bukai pulai ka Nanga Drau. Kelimpah ari jauh (Kabo, Kawit enggau Kerangan), tiang enggau ramu besai ulih sida endang teras magang, lalu berat bendar dibai.

Taja pan jauh enggau berat, pengawa berangkut ulih dikereja. Semua urang rindu besukung betulung enggau pangan diri. Sida ka anembiak ransing ati mandang ka pengering tulang. Sida ngesan ramu ari kampung endur beramu ka sungai. Ari sungai ramu nya ditarit tauka diundan ngena perau besai nuju ka Nanga Drau.

Nitih ka cherita aki, pengawa ka ngangkat enggau ngengkah ka ramu enda tau enda sereta. Sida enda tau beteju ka pangan diri. Uyu tauka Aki Kiley nya siku ari urang ka besai endar nyawa ngerah bala sida ka anembiak berangkut. “Bah..bah..bah, angkat kitai” ku iya. Bala sida ka anembiak lalu sama ngangkat ka ramu ka disan sida. Bakanya mega enti maya ka bisi penanggul, baka maya kaki telinchir, kaki terunjam, besalah urat iya lalu ngerah sida ka anembiak enda ngasuh ngelengka ka ramu seneka ati.

Mayuh chara dikena sida ngangkut ramu. Lebuh ka nengah menua bebukit, sekeda bala diasuh ngesan, lalu sekeda agi narit tiang ngena tali ari atas bukit. Sida enda tau enda ngena tali narit ari atas laban enggai ka tiang nya merurut ka belakang. Maya ka nurun bukit, tiang deka diulurka belubah-lubah ngena tali, tauka enti sida ngesan tiang nurun bukit, tali mesti ditan enggai ka sida telasur ka lebak. Lebuh ka nengah tanah luchak, kaki tengelam ngampuhka buku ali, tang ramu sigi enda dilengka.

Bala ka enggau ngesan enda tau ngelengka ka ramu seneka ati, taja pan sida benung pedis, tauka lelak enggau enda tan agi. Enti sida ngelengka ka ramu nya, iya deka terempas lalu ngemedis ka urang bukai. Nya alai, tajapan sida lelak tauka pedis, sida enda ulih enda ngetan ka diri lalu nganti bala bukai udah sama sereta deka ngengkah ka ramu ka tanah.

Enti sema endur ngangkut ramu besemak enggau sungai. Pengawa ulih dikereja mudah agi. Sida mina ngesan ba darat sebedau ramu dipunggahka ngagai perau. Perau ka dikena ukai perau sebarang, laban iya endang perau besai digaga kena ngundan ramu besai enggau panjai. Munggah ramu ka dalam perau mega ukai mudah. Perau tau pechah kena tinggang tiang tauka ramu ti berat. Kena ngelipakka perau pechah laban ramu, sida deka ngaramka perau dulu. Udah perau karam dalam ai, sida belubah-lubah munggah ramu ka dalam perau. Udah tiang nya tadi tama dalam perau, sida nanggung perau nya tadi lalu nimba ai keluar. Lebuh datai di Nanga Drau, sida deka ngena jalai nya baru ngemansut ka tiang ari dalam perau sebedau disan niki ka darat.

Cherita ari Pengingat Niang Kadam ak. Nambi

Pasak Kayu Enggau Tangkal Tiang

2008-06-03T22:04:00.000-07:00

Pasak kayu ba puchuk tiang. Lubang pasak ditebuk enggau bur kayu, pasak kayu digaga ari teras sama pemesai enggau lubang nya. Tuju pasak sama enggau kitai ngena nat besi tauka paku kemaya hari tu.
Lubang ba puchuk tiang mandang ka urang kelia ngena pasak kayu ngaga rumah sida.
Puchuk tiang enggau ujung ramu mega ditangkal. Ramu ka tepanggai ba puchuk tiang nya tadi enda ibuh agi ditan ngena paku tauka pasak.
Ba rumah panjai Nanga Drau tu, semua tiang ka didirika rebak dulu menya ngena pasak enggau tangkal ba puchuk tiang enggau ujung ramu enda kira iya ba ruai, dalam bilik, atas sadau tauka ba ruang ka bukai.
Kelimpah ari ka disebut di atas nya tadi, urang dulu kelia mega ngena pasak enggau tangkal ngaga tangga sida.

Maya urang ka tuai menya ngaga rumah tu, sida apin bisi rengka baka ka diatu. Apin bisi nat besi enggau paku lawang. Nya alai sida ngaga akal dikena nampung, ngelekat siti ramu enggau ramu ka bukai. Ramu ka deka ditampung deka digaga lubang ngambika ulih endur ngemasukka pasak, lalu puting ramu enggau puchuk tiang ditebuk lubang besegi tauka ditangkal.

Ramu ka dikena berumah endang kayu kering magang, baka teras. Nya alai rumah ka digaga nadai agi berubah taja pan umur iya udah lebih ari 80 taun.

Berumah Ba Tembawai Masing

2008-05-24T22:30:00.000-07:00

Lima belas taun udah diau bedampa, bala sida ka tuai belabuh berunding deka betampung perabung enggau pangan diri. Pemedis maya ka diau kediri-kediri bisi bendar diasaika, kelebih agi maya ka beguna ka tubuh mayuh, ngintu gawai, tikah, belian, rabat enggau maya penusah ngenyit bukai datai ba tubuh siku-siku.

Runding ka deka ngadu ka pendiau baru endang udah lama dipejuraika. Nitih ka tusui niang aki (Kadam ak. Nambi), perambu pengawa berumah udah belabuh enda kurang ari sepuluh taun. Dalam timpuh sepuluh taun tu, sida berunding ka tapak, berunding ka burung, berunding penyelap enggau pemansang rumah ka deka digaga. Sida ka tuai nentu ka rumah panjai ka digaga nya tegap, tan endur diau nyentuk ka tubuh uchu, ichit, wit sida ka dudi ari ila. (Kitai ulih meda taja pan seharitu rumah panjai udah lebih ari 80 taun, tang iya nadai udah berubah ari ka dulu kelia).

Kena netap ka runding ti deka berumah baru tu tadi, sida begelumu baum ba dampa di Nanga Drau (peda artikel ka dulu ari tu). Tuju asal aum tu deka nentu ka tanah endur berumah baru. TR Minggat nyadi ka penyanding penemu, lalu tuai-tuai ka bukai meri runding diri empu.

Sekeda mai berumah di Sungai Dabai, enda jauh ari Tembawai Kilong. Sekeda agi mai berumah di Sungai Ijok, dalam Sungai Isu. Nambi ak. Anyum enda besetuju. Iya ngansak bala berumah ba Tembawai Masing, ba tanah apai iya empu ka benama Anyum ak. Danggat. Tanah tu beseberai enggau dampa sida di Nanga Drau.

Tembawai Masing tu tanah munggu. Mua ari sepiak-sepiak dikelingi sungai, Sungai Krian enggau Sungai Drau. Tanah tu berimbai enggau temuda Sedagar Jeti, siku urang ka beberita di Menua Kaki Wong ditu. Penemu Nambi ak Anyum ka mai berumah ba Tembawai Masing disukung Minggat ak. Changgas, Numpang ak. Abang, Sabang ak. Empiu enggau bala tuai-tuai ka bukai.

Taja pia, enda semua ari bala ka enggau baum besetuju enggau runding tu. Munyi ka disebut aku dulu agi ari tu, bisi sekeda bala ka bedampa di Sungai Dabai enda besetuju, ketegal takut ka jelu ai (baya). Sida enggai kelalu semak enggau ai Krian.

Taja pia Nambi enggau bala iya keras deka berumah ditu. Iya rindu berumah enda jauh ari sungai (Enti ulih tali perau ditanchang ba tiang rumah panjai). Ku iya, pemansang dunya enda datai ari ulu. Pemansang dunya datai ari ili. Enti rumah semak tebing ai, pemansang ulih dibai enggau jampat agi. Orang ari ulu, ari ili mudah sangkai lalu ngetu ditu, baik nya bala Iban, Cina, Melayu tauka urang perintah.

Kelimpah ari nya, menua tu senentang enggau pala pasang (segang ai pasang ari ili tepantup ba Wong Embuas), ari ulu Nanga Drau). Bala ka mudik ari ili ngetu ditu, sebedau nerus ka pejalai kulu. Sekeda bala Melayu tauka Cina ka datai bekuli enggau bedagang ngetu naka urung menua tu ditu. (Sida mudik ari ili nitih ka ai pasang lalu pulai ngundur ai surut).

Bala ka datai ari ulu mega ngetu ditu. Siti ari kebuah iya, munyi ka disebut aku diatas nya tadi sida besatup enggau bala Cina tauka Melayu ka bedagang mai barang ari ili. Kadang-kadang enda ibuh agi nurun ka pasar Saratok enti naka ka bebeli ka garam, gula bicing tauka rengka bukai ka bisi didaja ngena perau.

Tanah menua tu manah. Siti ari kebuah iya manah maya tu menya, laban iya menua baru. Padi ditanam ka nyadi. Menua tu bemunggu-munggu. Bisi siti dua ka tau disebut bukit tang nadai renjan, enda ulih enda bumai bekebun. Sungai agi beresi, Jelu ulih digiga sebelah ujung tanju, ujung bilik sema enda jaku. Ikan ulu seneka ati, laban apin mayuh chara urang ngulihka iya. Pia mega daun babas baka upa tubu enggau ka bukai.

Maya sida ka agi bedampa ba Nanga Drau, kitai Iban, urang perintah, Cina, Melayu (kadang-kadang urang putih) bisi nemuai, bedagang, tauka bejalai ka pengawa kitu. Sida enda tama ka dalam, ngambi ka chunto ngagai ulu Drau tauka rumah dampa ka bukai. Kebuah iya pia, laban dampa sida ba tebing sungai Krian tu semak. Niki aja ari perau sida lalu ulih datai di rumah.

Nambi ak. Anyum sepenemu enggau sedagar jeti. Kenu ku seduai pengawa berumah mesti diaduka enggau bebendar laban rumah ka digaga nya lagi ukai semina endur diau rebak tubuh sida aja, tang ka pendiau tubuh uchu, ichit, wit ka dudi hari. Nya alai rumah panjai mesti tegap, tapak endur berumah mesti manah. (Sida udah puas diau bedampa, lalu patut ngentap ba endur siti).

Jaku sedagar Jeti madah ka rumah panjai ba Tembawai Masing tu disempamaka baka Singapura. Endur urang ari ulu, ari ili betemu, endur pengawa perintah, endur pengawa dagang, endur ngerembai ka pengarap enggau semua bansa pemansang dunya. Runding sedagar Jeti jauh nyulut ari urang bukai. Iya nemu nganggap ka tuju pemansang dunya ka dudi hari.

* Mayuh bala anembiak ka kemaya ari tu mina nemu nama menua tu Nanga Drau. Iya ka bendar tapak endur rumah panjai tu kelia dikumbai urang Tembawai Masing. Urang ari Praja, benama Masing, belangkau ba tanah Anyum ak. Danggat. Udah Masing mulai ka diri ka Praja, urang ka diau kelingi menua tu agi ingat ka tanah tembawai rumah ka udah endur iya belangkau nya ‘Tembawai Masing’.

*Sedagar Jeti tu apai Niang Pengajar Kedai ak Jeti. Iya bebini ngambi Racha lalu beranak ka Sambai, Eda, Duwin enggau Kedai. Duwin bebini ngambi Ijah, beranak ka Datin Pilin ianya bini Datuk Amar Dunstan Endawie ak. Enchana. Tu meh kebuah siku ari anak lelaki Datuk Amar Dunstan Endawie digaga ka nama Jeti.

Cherita ditusoi Niang Kadam ak. Nambi

Happy Birthday To Camelia Sophia Mau

2008-05-23T19:45:00.000-07:00

Camelia Sophia Mau ada kena 23 May 2001, kemari 23 May 2008 genap 7 taun.

Berumpang Menua

2008-05-23T03:44:00.000-07:00

Urang ka tuai dulu kelia mindah pendiau kia-kia, ngiga menua baru ka nyamai agi endur ngidup ka diri. Sida berimba temuda, ka ulih endur bumai betupi, tanah puang ka agi bisi jelu enggau ikan ka lauk. Tambah mega, tubuh makin mayuh, anak makin nelesak. Nyalai sida beguna ka menua baru ngambi ka ulih nyamai agi endur ngidup ka diri. Nya alai dalam cherita lama tuai kitai Iban, kitai meda mayuh agi pengawa ka berumpang menua, muka menua baru kelebih agi dalam menua Sarawak tu.

Siku ari urang tuai kelia ka nampung pengawa berumpang menua tu ianya Orang Kaya Temenggung Tandok. Orang Kaya Temenggung Tandok ngulu ka bala rayat iya, bepindah ari Rimbas ka Melupa. Sida niri ka pendiau di Melupa, bumai betupi baka urang bukai.

Pendiau OK Temenggung Tanduk di Melupa enda ulih betan lama, laban bala Balau ari Banting seruran nguji deka ngalah ka Iban Saribas enggau bala sida ka udah ngentap ka diri ba menua baru di Krian enggau Kalaka. Orang Kaya Janting ngulu ka raban Balau bebalas dendam ngagai bala Iban belabuh ari menua Saribas nuju ka Krian lalu ngalah ka pendiau OK Temenggung Tandok di Melupa. Rumah panjai 16 pintu retung ditunu. Orang Kaya Temenggung Tanduk empu ulih laban bala Balau, lalu rayat iya lebih kurang dalam 130 iku, mayuh ka mati lalu sekeda ka agi idup ngerari ka diri. Tapak rumah panjai OK Temenggung Tanduk di Melupa tu disebut ‘Tembawai Alah’ nyentuk ka seharitu.

Bala ka tasah ngerari ka diri ari Tembawai Alah ngulu ai Krian, muka pendiau di Ilas, ba kaki Bukit Tengalat. Sekeda sida ka tuai ngepun ke pendiau di Ilas nya Angking ak. Anau, Gila ak. Anau, Changgas ak. Achan, Beti ak. Bana, Manju enggau Jabas. Taja pan ngentap ka diri di Ilas, pemisi baka tanah endur bumai enggau kebun agi meruan di Melupa. Sida mega agi nganjung antu (Numbak urang ka mati) di pendam Burui di Melupa.

Di sepemanjai sungai Krian raban ka bepindah ari Melupa tu besatup enggau bala Seru ka endang udah dulu agi nguan menua tu. Sida ngalah ka bala Seru, lalu muka menua di Ilas. Sekeda bala Seru ditangkap, diserah ngagai tuai Melayu di Saratok (Diatu nyadi Melayu). Sekeda bala Seru nyadi Iban lalu sekeda agi becampur nyadi Cina. Cherita Seru bechampur enggau Iban bepun ari pengawa Daong ak. Layang ka belaki ka Seru benama Sugum. Belabuh ari tu Seru nadai agi belaya enggau Iban lalu bala Seru pulai nyadi Iban.

Sepengelama udah diau di Ilas, sekeda raban tu belabuh mudik kulu ke agi. Pemuas ka matau menua, sida milih menua pala pasang, senentang Nanga Drau ka diatu. Menua tu agi puang, manah endur niri ka pendiau, mayuh jelu enggau ikan lalu tanah manah endur bumai betupi.

Terubah ka muka menua tu, sida bisi bebagi penemu. Bisi ka berumah tebing ai, lalu sekeda agi ka ngiga tanah ka jauh ari ai besai (ai Krian). Sida ka deka berumah tebing ai, nganggap ai nya pun pengidup. Sida nyamai mindah kulu kili ngiga pemakai tauka bebai ka barang, nyamai endur ngambi ai irup. Tambah mega sungai, munyi ka disebut diatas nya tadi agi mayuh ikan ka lauk. Bala ka enggai berumah tebing sungai takut ka jelu ai. Dulu kelia ai Krian sunyi. Urang ka merau kulu kili suah besatup enggau jelu ai (baya). Sida enggai ka penusah ditangkap jelu ai nyadi ba raban diri sebilik.

Nambi ak. Anyum bekering penemu deka berumah semak enggau sungai. Ku iya “Enti ulih tali perau ditanchang ba tiang rumah panjai”. Laban ka enda senentang penemu pasal pengawa berumah tu, dia deh sida berumah nitih ka ati diri empu. Bala ka rindu berumah tebing sungai, ngaga rumah tebing sungai lalu raban ka bukai ngaga rumah dalam ai Drau tauka endur bukai. (Peda artikel “Penumbuh Pengawa Berumah”).

Jabas, Chuk, Bundak enggau Antas ngulu ka bala diri empu berumpang menua. Taja pan pia, pengawa ka berumpang menua tu enda seneka ati. Sida netap ka garis antara menua. Sepiak kanan ai Krian begaris ba Teriki. Nanga Mapar nyadi antara enggau Babang. Kili ai Krian naka Kawang, Kulu naka Teberu, Sungai Kedang. (Teberu mega nyadi antara menua enggau Babang).

Cherita ditusoi Niang Kadam ak. Nambi

Penumbuh Menua Drau

2008-05-23T00:54:00.000-07:00

Tuai ti nurun rayat menua Nanga Drau, Sebubu enggau Mapar diatu benama Jabas ak. Layang. Jabas ngepun ka pendiau bedampa di nanga sungai Kundong, Drau sebedau bepindah ka Nansang di, Mapar. Di Nansang, bala Jabas diserang bala Seru, ngujung ka iya empu mega ulih laban munsuh.

Udah pemati Jabas, iya diganti menantu iya ka benama Chuk ak. Changgas. Chuk ngiring bala nembiak redak iya niri ka rumah di Tembawai Baruh. Maya tu pendiau sida apin tentu entap. Kebuah iya laban ka agi ngiga endur ka nyamai agi endur berumah. Ari Tembawai Baruh sida bepindah ka Tembawai Tinting. Ari Tembawai Tinting mindah baru ngagai Sungai Pelanduk, sebedau mulai ka diri baru ngagai Tembawai Sungai Kundong. Maya tu, sida belabuh bepechah endur berumah. Sida belabuh nirika rumah nitih ka temuda diri empu.

Chuk ngulu ka bala iya bedampa ba Tembawai Pungkar. Bundak ak. Mawat nganti Chuk nyadi Tuai Rumah (Udah Chuk mati). Bundak ngiring ka bala iya berumah baru di Tembawai Kilong. Maya tu bala rayat Bundak bendar amat berimba menua, kelebih agi enggau chara bumai ngagai menua Sebubu enggau Mapar.

Bundak sekali agi ngiring bala iya berumah baru. Sekali tu sida bedampa di Sungai Tekalong. Bundak terus ngulu bala raban nembiak iya berimba muka menua. Sida bumai ngagai menua ulu Sungai Betong, lalu ngujung ka sida berumah baru di Sungai Betong. Rumah panjai ka pengabis dudi digaga maya iring Tuai Rumah Bundak ianya rumah panjai Tembawai Tinting enggau rumah panjai Tembawai Panjai. Taja pan udah ngaga rumah panjai baru ka tegap agi, Bundak mati ba langkau umai. Kena ngingat ka pengawa Bundak, kelebih agi pengering ati iya berumpang menua lalu niri ka pendiau rayat, bangkai iya lalu dilumbung ianya sama baka adat urang ngintu Bujang Berani. (Lumbung Bundak agi ulih dipeda nyentuk ka saritu).

TR. Antas ak. Gima nganti Bundak ak. Mawat nyadi Tuai Rumah. Maya iring TR Antas, rumah panjai di Tembawai Panjai niri ka Gawai Antu.

Pendiau di Tembawai panjai mega enda ulih ditan ka lama. Sang ak. Melana mai bala iya berumah baru di Sebubu. Maya tu, rumah panjai tu pan nyau semakin jai laban ka nyau udah lama. Ari nya bala ka agi tinggal sampal berunding deka berumah baru. Udah rumah panjai tu dirumpang, sekeda bala bedampa, lalu sekeda agi belangkau nitih ka tanah, kebun enggau umai diri empu.
Taja pan sida enda segulai pendiau, sida sama besetuju ngasuh Minggat ak. Changgas (Uchu Bundak) nyadi ka Tuai Rumah. Tu nunjuk ka sida agi seati ngadu ka pendiau sebaka enggau urang ari rumah panjai bukai.

Tiga iti dampa, sama betuai ka Minggat ianya di Nanga Drau (ba kebun Achin ka diatu), di Tanjung Tapang enggau di ulu Sungai Dabai. Dampa di Nanga Drau nya bisi sebelas pintu. Bala ka bedampa ditu ianya Nambi (Apai Mau), Impa (Apai Enggi), Kendawang (Apai Lema), Entamin (Apai Paul), Engkoh (Apai Jawan), Manang Ambu, Baba (Apai Chemagat), Kentun (Apai Kenda), Gu (Apai Ladu), Baing (Apai Ketit) enggau Balang.

Bala ka bedampa di ulu Sungai Dabai bisi lima pintu ianya Apai Megat, Luna (Apai Ujay), Belaki, Manggoi, Gimang enggau Antas. Antas diambi nyadi ka tuai sida. Dampa di Nanga Sungai Dabai tauka disebut Tanjong Tapang semina bisi dua pintu ianya rumah Minggat (Apai Empawi) enggau Apai Dagai.

Antara tiga buah dampa tu, dampa di Nanga Drau lebih beberita lalu ditemu urang mayuh ari ulu ari ili. Kebuah iya pia laban rumah panjai tu semak lalu mudah digagai. Nambi ak. Anyum, taja pan ukai nyadi ka tuai endang seruran ditepat urang ka datai ngagai menua tu.

Cherita diambi ari pengingat Niang Kadam ak. Nambi

Nemuai Ngagai SK Nanga Drau 3 (Kuarters Pengajar Enggau Staf)

2008-05-20T08:14:00.000-07:00

Nemuai Ngagai SK Nanga Drau 2 (Pemansang Baru)

2008-05-20T07:56:00.000-07:00

Pemansang ICT. Taja pan sekula jauh di menua ulu, tang sekula tu enda ditinggalka ari nerima pemansang baru kemaya hari, baka perengka ICT. Pemansang Telekomunikasi. Diatu line telefon udah nuntung ba kaki tangga. Kompeni telefon, baka Telekom udah tembu masang line telefon nuju ngagai sekula tu. Dudi ari ila rayat rumah panjai mega tentu ulih masang telefon rumah ba ruang bilik diri empu.
Agu ti manah enggau beresi, ka penyamai anembiak sekula ka belajar enggau bemalam ditu.
Tangki ai moden
Jalai besemin kia-kia dalam kompaun sekula

Nemuai Ngagai SK Nanga Drau 1 (Mulai Ka Pengingat)

2008-05-20T07:25:00.000-07:00

Mayuh bendar pemansang udah digaga ba sekula tu, kelebih agi baka blok kelas ti baru. Dulu suba bisi dua iti aja blok endur kelas. Iya ka satu nya endur kelas primary lima enggau primary enam, lalu siti agi blok nya endur kelas primary satu ngagai empat. Ari atas kelas tu endur bemalam anembiak lelaki.
Tu blok primary lima enggau primary enam dulu suba. Puting ari kanan sekali nya nyadi ka opis endur kepala pengajar enggau bala pengajar ka bukai. Aku ingat maya sekula ditu suba, taun 1981 - 1982, kepala pengajar Mr. Ali Bin (Apai Sigat). Pengajar Sulung (Apai Tek), Mr. Ngelai (Apai Ogos) enggau siku Cikgu Melayu ari Saratok, Cikgu Jos Bin Achan. Pengajar Sulong udah nya diganti Mr. Bilun(Pengajar Long).
Blok tu suba endur kelas primary satu ngagai primary empat. Blok tu bisi dua tingkat. Ari atas kelas nya endur anembiak lelaki bemalam. Sayau bendar nadai nyimpan gambar iya ka kelia, tang aku ingat bendar ka gamal utai ditu kelia lalu bala kawan ka sama ngulih ka penemu ba sekula tu.
Blok kelas enggau opis baru. Dulu suba ditu endur padang sekula. Padang sekula SK Nanga Drau enda rata baka padang sekula bukai. Taja pa enda rata, ba padang tu meh anembiak bemain, belumba enggau aktiviti PJ. Land Sport sekula mega suah diatur ditu. Gambar ba atas kelas nya gelanggang badminton enggau sepak takraw dulu suba. Ba ujung bendar nyin, suba bisi 'grandstand'.
Blok opis enggau kelas tadi dipeda semak

Empawi ak. Minggat

2008-05-17T00:58:00.000-07:00

Empawi Ak. Minggat tauka Apai Muluk (86 Taun)

Apai Nila (Senang ak. Gambing), Apai Muluk (Empawi ak. Minggat) enggau Apai Edna (Sabai ak. Kadam) - gambar diambi kena 17 May 2008.

Taun 1981, maya aku primary lima ba SK. Nanga Drau, nyau ka semua urang tuai iya ka rebak sida aki enggau ini agi idup magang. Ari setak ili, aki Ika enggau ini Ika (Diau belangkau betampung enggau bilik Niang Digut. Aki Lidong enggau ini Lidong, Aki John enggau ini John, Aki Ogos enggau ini Ogos, Aki Bibi enggau ini Bibi, Aki Nila (Ini Nila ninggal ujung taun 70-an), Aki Ina enggau ini Ina (Aki enggau ini aku empu), Aki Cynthia enggau ini Cynthia, Aki Anggat enggau ini Anggat, Apai Bilal enggau indai Bilal, Aki Lin enggau ini Lin, Aki Utik enggau ini Utik, Aki Selamat (Nadai diau ditu maya tu), Apai Kudang enggau Indai Kudang, Ini Ngungok, Aki Donald enggau ini Donald.

Semua sida tu maya tu agi benung tulang gawa magang. Sida agi gawa di kebun, turun ka ai, nangkal getah enggau semua pengawa rumah panjai ka bukai.

10 taun udah nya, taun 1991 - mayuh bendar bala sida tu udah nadai agi, lalu ka pengabis dudi iya kemari apai Kudang (2007) enggau indai Kudang (2008).

Diatu urang ka pengabis tuai ba rumah panjai tu ianya Empawi ak. Minggat tauka Apai Muluk enggau Aki Cynthia (Dudom). Aki Cynthia diatu nitih ka bala anak iya lalu diau di Kuching.

Tanduk

2008-05-17T00:24:00.001-07:00

Tanduk Rusa ba tiang antara ruai enggau panggau

Tanduk Rusa ba antara empuan enggau ruai

Tanduk Rusa (Ruai Niang Ex-Tr. Gawan)

Tanduk Rusa (Ruai Mr Anthony / Niang Brayun Ak. Numpang)

Tanduk Kerbau

Tanduk Kerbau (Ruai Ex-TR Sabai ak. Kadam)

Siti ari utai ka nyadi identiti rumah panjai Nanga Drau tu, ianya tanduk. Urang ka tuai rindu nyangking ka tanduk ba tiang rumah, baik nya ba ruai tauka dalam bilik. Tuju iya ngambi ka ulih endur bekait ka baju, selapuk enggau endur manggaika tikai tauka sengayuh. Agi kelia menua tu semak bendar enggau babas. Urang ka tuai mudah bulih jelu babas ka lauk. Tanduk jelu baka rusa, pelanduk, kijang ka besai lalu manah gamal dilekatka ba tiang rumah. Bala ka bisi tanduk kerebau, tanda sida bisi bumai menua ili. Sekeda bumai di Ilas, Jeno, Kali enggau Selambung (Seberai pasar Saratok).

Diatu penyampau tanduk ka ulih dipeda ba ruai nyau makin kurang. Maya paku ka dikena mantik tanduk nyau putus, urang lalu ningkil ka tanduk sida lalu disimpan aja dalam bilik. Guna enggau tanduk ba ruai nyau makin kurang, nya siti ari kebuah urang enda tentu agi nyangking tanduk ba ruai sida.

Tiang Segi Lapan

2008-05-13T22:43:00.000-07:00

Tiang rumah panjai digaga ari batang teras. Dulu kelia urang ka berumah nadai ngenyadi ka kayu. Nyalai setiap iti tiang digaga ari sebatang kayu teras. Bisi sekeda meruan segala, lalu sekeda agi digaga ka 'shape', baka tiang di dalam gambar tu. Rumah ka dulu dientak di Nanga Drau ngena tiang besai, lalu ramu bukai mega ngena teras besaiz abis kurang 6 x 6. Kayu teras tu diban di Kabo, Ulu Krian enggau di Kawit. Iya diangkut urang ka tuai menya enggau jalai besaup.

Penyangkai Kereta

2008-05-03T17:04:00.000-07:00

Dulu suba bas STC 5A, nurun lalu ngambi penumpang ba penyangkai tu sebedau nikal baru ka pasar Saratok. Diatu, bas Kaki Wong nadai agi. Bala ari Nanga Drau enggau Sungai Engkabang ka enggai mai kereta nengah jalai Kawang, ninggal ka kereta sida ditu. Bala ka nurun niki ka pasar Saratok ngena Van tauka kereta bukai mega agi mengkang ngena penyangkai tu.

Lampu Gas

2008-04-30T21:05:00.000-07:00

Sebedau bisi elektrik, malam hari ba rumah panjai ngarap ka penerang ari kelita. Lampu gas dipasang lebuh maya ka bisi pengawa baka baum, rami gawai, rami nikah, rabat enggau pengawa bukai. Nyau ka dudi ari urang nyau bebeli ka generator ka diri empu, lalu perintah mega bisi meri projek enjin elektrik bekuasa besai kena rumah panjai. Diatu urang nadai agi ngena kelita, lampu gas, generator tauka enjin besai laban elektrik SESCO 24 jam udah bisi.

Dapur

2008-04-30T19:33:00.000-07:00

Keling enggau Kumang Gawai

2008-04-30T00:40:00.000-07:00

Pekit Keling enggau Kumang anak mit, siti ari pengerami maya Gawai

Gawai Dayak 2007 (2)

2008-04-30T00:07:00.000-07:00

Begempuru diri menyadi Begempuru diri patunggalBegempuru diri serumah
Enggau bala kawan