Lima belas taun udah diau bedampa, bala sida ka tuai belabuh berunding deka betampung perabung enggau pangan diri. Pemedis maya ka diau kediri-kediri bisi bendar diasaika, kelebih agi maya ka beguna ka tubuh mayuh, ngintu gawai, tikah, belian, rabat enggau maya penusah ngenyit bukai datai ba tubuh siku-siku.
Runding ka deka ngadu ka pendiau baru endang udah lama dipejuraika. Nitih ka tusui niang aki (Kadam ak. Nambi), perambu pengawa berumah udah belabuh enda kurang ari sepuluh taun. Dalam timpuh sepuluh taun tu, sida berunding ka tapak, berunding ka burung, berunding penyelap enggau pemansang rumah ka deka digaga. Sida ka tuai nentu ka rumah panjai ka digaga nya tegap, tan endur diau nyentuk ka tubuh uchu, ichit, wit sida ka dudi ari ila. (Kitai ulih meda taja pan seharitu rumah panjai udah lebih ari 80 taun, tang iya nadai udah berubah ari ka dulu kelia).
Kena netap ka runding ti deka berumah baru tu tadi, sida begelumu baum ba dampa di Nanga Drau (peda artikel ka dulu ari tu). Tuju asal aum tu deka nentu ka tanah endur berumah baru. TR Minggat nyadi ka penyanding penemu, lalu tuai-tuai ka bukai meri runding diri empu.
Sekeda mai berumah di Sungai Dabai, enda jauh ari Tembawai Kilong. Sekeda agi mai berumah di Sungai Ijok, dalam Sungai Isu. Nambi ak. Anyum enda besetuju. Iya ngansak bala berumah ba Tembawai Masing, ba tanah apai iya empu ka benama Anyum ak. Danggat. Tanah tu beseberai enggau dampa sida di Nanga Drau.
Tembawai Masing tu tanah munggu. Mua ari sepiak-sepiak dikelingi sungai, Sungai Krian enggau Sungai Drau. Tanah tu berimbai enggau temuda Sedagar Jeti, siku urang ka beberita di Menua Kaki Wong ditu. Penemu Nambi ak Anyum ka mai berumah ba Tembawai Masing disukung Minggat ak. Changgas, Numpang ak. Abang, Sabang ak. Empiu enggau bala tuai-tuai ka bukai.
Taja pia, enda semua ari bala ka enggau baum besetuju enggau runding tu. Munyi ka disebut aku dulu agi ari tu, bisi sekeda bala ka bedampa di Sungai Dabai enda besetuju, ketegal takut ka jelu ai (baya). Sida enggai kelalu semak enggau ai Krian.
Taja pia Nambi enggau bala iya keras deka berumah ditu. Iya rindu berumah enda jauh ari sungai (Enti ulih tali perau ditanchang ba tiang rumah panjai). Ku iya, pemansang dunya enda datai ari ulu. Pemansang dunya datai ari ili. Enti rumah semak tebing ai, pemansang ulih dibai enggau jampat agi. Orang ari ulu, ari ili mudah sangkai lalu ngetu ditu, baik nya bala Iban, Cina, Melayu tauka urang perintah.
Kelimpah ari nya, menua tu senentang enggau pala pasang (segang ai pasang ari ili tepantup ba Wong Embuas), ari ulu Nanga Drau). Bala ka mudik ari ili ngetu ditu, sebedau nerus ka pejalai kulu. Sekeda bala Melayu tauka Cina ka datai bekuli enggau bedagang ngetu naka urung menua tu ditu. (Sida mudik ari ili nitih ka ai pasang lalu pulai ngundur ai surut).
Bala ka datai ari ulu mega ngetu ditu. Siti ari kebuah iya, munyi ka disebut aku diatas nya tadi sida besatup enggau bala Cina tauka Melayu ka bedagang mai barang ari ili. Kadang-kadang enda ibuh agi nurun ka pasar Saratok enti naka ka bebeli ka garam, gula bicing tauka rengka bukai ka bisi didaja ngena perau.
Tanah menua tu manah. Siti ari kebuah iya manah maya tu menya, laban iya menua baru. Padi ditanam ka nyadi. Menua tu bemunggu-munggu. Bisi siti dua ka tau disebut bukit tang nadai renjan, enda ulih enda bumai bekebun. Sungai agi beresi, Jelu ulih digiga sebelah ujung tanju, ujung bilik sema enda jaku. Ikan ulu seneka ati, laban apin mayuh chara urang ngulihka iya. Pia mega daun babas baka upa tubu enggau ka bukai.
Maya sida ka agi bedampa ba Nanga Drau, kitai Iban, urang perintah, Cina, Melayu (kadang-kadang urang putih) bisi nemuai, bedagang, tauka bejalai ka pengawa kitu. Sida enda tama ka dalam, ngambi ka chunto ngagai ulu Drau tauka rumah dampa ka bukai. Kebuah iya pia, laban dampa sida ba tebing sungai Krian tu semak. Niki aja ari perau sida lalu ulih datai di rumah.
Nambi ak. Anyum sepenemu enggau sedagar jeti. Kenu ku seduai pengawa berumah mesti diaduka enggau bebendar laban rumah ka digaga nya lagi ukai semina endur diau rebak tubuh sida aja, tang ka pendiau tubuh uchu, ichit, wit ka dudi hari. Nya alai rumah panjai mesti tegap, tapak endur berumah mesti manah. (Sida udah puas diau bedampa, lalu patut ngentap ba endur siti).
Jaku sedagar Jeti madah ka rumah panjai ba Tembawai Masing tu disempamaka baka Singapura. Endur urang ari ulu, ari ili betemu, endur pengawa perintah, endur pengawa dagang, endur ngerembai ka pengarap enggau semua bansa pemansang dunya. Runding sedagar Jeti jauh nyulut ari urang bukai. Iya nemu nganggap ka tuju pemansang dunya ka dudi hari.
* Mayuh bala anembiak ka kemaya ari tu mina nemu nama menua tu Nanga Drau. Iya ka bendar tapak endur rumah panjai tu kelia dikumbai urang Tembawai Masing. Urang ari Praja, benama Masing, belangkau ba tanah Anyum ak. Danggat. Udah Masing mulai ka diri ka Praja, urang ka diau kelingi menua tu agi ingat ka tanah tembawai rumah ka udah endur iya belangkau nya ‘Tembawai Masing’.
*Sedagar Jeti tu apai Niang Pengajar Kedai ak Jeti. Iya bebini ngambi Racha lalu beranak ka Sambai, Eda, Duwin enggau Kedai. Duwin bebini ngambi Ijah, beranak ka Datin Pilin ianya bini Datuk Amar Dunstan Endawie ak. Enchana. Tu meh kebuah siku ari anak lelaki Datuk Amar Dunstan Endawie digaga ka nama Jeti.
Cherita ditusoi Niang Kadam ak. Nambi
