Rumah panjai tu digaga dalam taun 1924. Tuai rumah kami maya tu kelia iya nya Minggat ak. Changgas. Iya parai dalam pun taun 1941. Minggat ak. Changgas lalu diganti TR. Sabang ak. Empiu. Tuai Rumah Sabang megai rumah tu enggau bala anembiak iya pengelama 34 taun. Tuai Rumah Sabang mega udah parai, lalu diganti TR. Braoh ak. Baki. TR. Braoh diganti TR. Gawan ak. Sabang, TR Gawan diganti TR. Sabai ak. Kadam, TR Sabai diganti TR Senang ak. Gambing (enda lama) lalu diatu dipegai TR. Gana ak. Senin.Terubah didiri ka kelia, rumah panjai tu semina bisi 24 pintu aja. Nyau ka dudi hari tu, laban bala anak uchu sida ka tuai suba nyau bebini belaki, bisi magi diri ari bilik lama lalu numbuh ka ruang bilik diri empu. Diatu rumah panjai tu bisi 31 pintu betampung. Enti nitih ka munyi jaku, agi bisi bala ka dudi deka nampung tang tanah nadai agi alai. Sekumbang pegai TR. Sabang enggau councillor Numpang, mayuh bendar temuai ari ulu, ari ili datai ngagai rumah panjai tu.
Taun 1941, Jepun datai ngalah ka menua Sarawak lalu megai perintah menua tu dalam kandang 4 taun. Bala urang Jepun suah datai bemalam ba rumah panjai Nanga Drau ditu. Jepun minta padi ngagai kitai Iban di Kabo, Budu, Gerenjang, Kerangan Rusa, Babang enggau bala ka bekelingi di menua Kaki Wong ditu. Semua sida tu nganjung padi ka dipinta Jepun ngagai rumah panjai kami di Nanga Drau kitu. Nyalai dua taun beturut-turut Jepun nerima padi ari kitai Iban udah bekau badu ngetau. Rumah panjai tu sekut laban guni padi. Nyalai dianggar ka pia aja bisi beratus iti guni padi ditugung ka ditu. Tiga buah bandung endang seruran pulai mansang nengah ai Krian ngangkut padi ari Nanga Drau ka pasar Saratok. Urang Jepun nadai tentu mendam ditu, tang bala kerani sida nadai pulai, nganti padi tu abis diangkut ngagai gudang padi di Saratok. Udah bekau Jepun nyerah diri alah, kena 11 hb Julai 1946, Colony British megai perintah menua Sarawak. Nyadi bisi dua kali Tuan Governor British nemuai ngagai rumah panjai Nanga Drau kitu.
Dalam bulan Julai 1947, Gavernor Colony British Sarawak, Sir Charles Arden Clarke, Resident Simanggang, Director of Education, District Officer Saratok, Private Secretary Tuan governor, Mr. Tom Harrison enggau military officer datai ngagai rumah panjai tu. Leboh nganti penatai urang putih tu suba, mayuh bendar kitai Iban sama dibai nyambut penatai sida nya. Rumah panjai tu penuh laban pemayuh bala mensia.
Kedua kali Governor Colony British datai kitu, ianya Sir Anthony Abell. Kedua kali tu nadai tentu mayuh urang putih datai enggau tuan Governor. Bakanya mega kitai Iban nadai tentu sampal enggau datai kitu. Tuan Governor tu diambat bala mayuh berengkah ari pasar Kaki Wong baru iya niki ka rumah panjai. Penemuai bala pemesai-pemesai ka bukai deka ditampung dudi ila...
Cherita tu diambi ari pengingat Mr. Sabai ak. Kadam.
No comments:
Post a Comment