Penumbuh Menua Drau

Tuai ti nurun rayat menua Nanga Drau, Sebubu enggau Mapar diatu benama Jabas ak. Layang. Jabas ngepun ka pendiau bedampa di nanga sungai Kundong, Drau sebedau bepindah ka Nansang di, Mapar. Di Nansang, bala Jabas diserang bala Seru, ngujung ka iya empu mega ulih laban munsuh.

Udah pemati Jabas, iya diganti menantu iya ka benama Chuk ak. Changgas. Chuk ngiring bala nembiak redak iya niri ka rumah di Tembawai Baruh. Maya tu pendiau sida apin tentu entap. Kebuah iya laban ka agi ngiga endur ka nyamai agi endur berumah. Ari Tembawai Baruh sida bepindah ka Tembawai Tinting. Ari Tembawai Tinting mindah baru ngagai Sungai Pelanduk, sebedau mulai ka diri baru ngagai Tembawai Sungai Kundong. Maya tu, sida belabuh bepechah endur berumah. Sida belabuh nirika rumah nitih ka temuda diri empu.

Chuk ngulu ka bala iya bedampa ba Tembawai Pungkar. Bundak ak. Mawat nganti Chuk nyadi Tuai Rumah (Udah Chuk mati). Bundak ngiring ka bala iya berumah baru di Tembawai Kilong. Maya tu bala rayat Bundak bendar amat berimba menua, kelebih agi enggau chara bumai ngagai menua Sebubu enggau Mapar.

Bundak sekali agi ngiring bala iya berumah baru. Sekali tu sida bedampa di Sungai Tekalong. Bundak terus ngulu bala raban nembiak iya berimba muka menua. Sida bumai ngagai menua ulu Sungai Betong, lalu ngujung ka sida berumah baru di Sungai Betong. Rumah panjai ka pengabis dudi digaga maya iring Tuai Rumah Bundak ianya rumah panjai Tembawai Tinting enggau rumah panjai Tembawai Panjai. Taja pan udah ngaga rumah panjai baru ka tegap agi, Bundak mati ba langkau umai. Kena ngingat ka pengawa Bundak, kelebih agi pengering ati iya berumpang menua lalu niri ka pendiau rayat, bangkai iya lalu dilumbung ianya sama baka adat urang ngintu Bujang Berani. (Lumbung Bundak agi ulih dipeda nyentuk ka saritu).

TR. Antas ak. Gima nganti Bundak ak. Mawat nyadi Tuai Rumah. Maya iring TR Antas, rumah panjai di Tembawai Panjai niri ka Gawai Antu.

Pendiau di Tembawai panjai mega enda ulih ditan ka lama. Sang ak. Melana mai bala iya berumah baru di Sebubu. Maya tu, rumah panjai tu pan nyau semakin jai laban ka nyau udah lama. Ari nya bala ka agi tinggal sampal berunding deka berumah baru. Udah rumah panjai tu dirumpang, sekeda bala bedampa, lalu sekeda agi belangkau nitih ka tanah, kebun enggau umai diri empu.
Taja pan sida enda segulai pendiau, sida sama besetuju ngasuh Minggat ak. Changgas (Uchu Bundak) nyadi ka Tuai Rumah. Tu nunjuk ka sida agi seati ngadu ka pendiau sebaka enggau urang ari rumah panjai bukai.

Tiga iti dampa, sama betuai ka Minggat ianya di Nanga Drau (ba kebun Achin ka diatu), di Tanjung Tapang enggau di ulu Sungai Dabai. Dampa di Nanga Drau nya bisi sebelas pintu. Bala ka bedampa ditu ianya Nambi (Apai Mau), Impa (Apai Enggi), Kendawang (Apai Lema), Entamin (Apai Paul), Engkoh (Apai Jawan), Manang Ambu, Baba (Apai Chemagat), Kentun (Apai Kenda), Gu (Apai Ladu), Baing (Apai Ketit) enggau Balang.

Bala ka bedampa di ulu Sungai Dabai bisi lima pintu ianya Apai Megat, Luna (Apai Ujay), Belaki, Manggoi, Gimang enggau Antas. Antas diambi nyadi ka tuai sida. Dampa di Nanga Sungai Dabai tauka disebut Tanjong Tapang semina bisi dua pintu ianya rumah Minggat (Apai Empawi) enggau Apai Dagai.

Antara tiga buah dampa tu, dampa di Nanga Drau lebih beberita lalu ditemu urang mayuh ari ulu ari ili. Kebuah iya pia laban rumah panjai tu semak lalu mudah digagai. Nambi ak. Anyum, taja pan ukai nyadi ka tuai endang seruran ditepat urang ka datai ngagai menua tu.

Cherita diambi ari pengingat Niang Kadam ak. Nambi