Sebedau bisi ai paip dikena ba rumah panjai, urang nyauk ai ka sungai. Ai ka disauk nya tadi, kelebih agi kena berapi tauka ka irup. Maya tu suba kibut tauka tong plastik (mayuh saiz) digaga ka tali lalu di ma ba belakang. Kibut plastik tu dikena urang nyauk ka sungai. (Dulu agi ari nya, urang ngena kerubung buah labu, kena nyauk ai enggau endur nyimpan ai).Pengawa nyauk ai tu ukai semina dikereja sida ka indu aja. Bala urang ka lelaki enggau sida ka anembiak mega sama bela minching tauka ngema kibut lebuh maya ka nyauk tauka mandi ka sungai. Urang ka tuai deka nganu sida ka anembiak enti enda minching kibut, laban takut ka nadai chukup ai dikena di rumah.
Lebuh maya bisi pengerami baka gawai, tauka pengawa bukai di rumah panjai, kitai ulih meda bala ka nyauk terudus mansa nengah empuan. Nya alai jarang bendar kitai meda empuan rangkai, laban iya seruran ditengah bala ka mandi enggau nyauk ai ari sungai.
Di rumah, ba endur ka disebut 'Las Ai' antara bilik besai enggau dapur penuh laban kibut enggau ipang kena nyimpan ai. Ipang tu ulih meli ari kedai. Asal ipang endur urang ngengkah ka telu, ka dijual ba kedai Cina. Kitai Iban dulu suba beguna bendar ka ipang laban iya besai endur nyimpan ai.
Diatu nadai mayuh agi urang bisi ngembuan ipang. Enti bisi pan, iya enda dikena agi. Sekeda urang kemaya hari tu ngena ipang kena nimbun ai ujan. Iya beguna bendar kelebih agi lebuh maya ai paip ka rusak. Sementara nganti paip ka manah baru, bala di rumah panjai ulih nyimpan ai dalam ipang sida.
6 comments:
Tabi Dom,
Lama nadai berita ari nuan ?
Agi nyimpan kerubung labu kita di rumah din ? Ingat endar aku agi mit kelia, ma mansang mandi ke sungai asuh sida ke tuai mai kerubung labu nya. Bisi ke beldi plastik nya tang berebut ka megai kerubung labu, ingat ke enda nuan??
Endu,
Nadai agi sangka aku. Maya urang ka tuai agi bumai bukit suba bisi. Diatu nadai mayuh agi urang ka ngemeran pengawa bumai. Enti bisi pan sida ka agi bumai paya. Kelia bidijir labu digantung urang atas para. Tuju iya ngambi ka labu nya kering agi laban selalu kena diang api.
Dom
Dom,
Selamat Ari Apai ke nuan !
Have a nice day.
Endu,
Bisi blog aku siti agi, Ruai Apai Mau. tau dipeda meh.
dom
au, terima kasih !
ooo...kena aku nimbun ai mandi tumu pagi.hehehe. pukul 6 dah nitih apai enggau indai nurun ke pasar seratok. apu...chelap datai ke tulang!
Post a Comment