Jalai Semin Ujung Tanju

Siti ari penanggul ka besai amat dikena ngintu rumah panjai lama ianya ba senentang pemeresi. Ujung tanju, enti enda dijaga tau jai bendar dipeda ketegal laban sangkar utai ka ditupi, tugung ramu enggau bekau pengawa ka dikereja kitai besari-sari. Bisi sekeda urang enda tentu peduli ka pengamah ketegal laban uras ka dibuai seneka ati ba ujung tanju.
Kandang ujung bilik mega deka pedis bendar diperesi, kelebih agi enti bala ka diau di rumah panjai enda seati ngadu ngintu iya. Ukai semina ketegal laban uras ka ditikau seneka ati, tang tanah mega tau nyau ami laban ai ka labuh ari dapur, agu enggau bilik mandi. Tanah ka ami tau balat bendar dipeda enda beresi, lalu deka balat bendar bebau kelebih agi enti iya nyau becampur enggau bekau pemakai, uras ditambah agi enggau tai babi, manuk enggau itit ka ditupi di baruh rumah.

*

Bakanya mega dalam kandang baruh rumah. Baruh rumah endang pedis amat diberesika, kelebih agi enti rumah panjai nya begantung. Urang ka tuai nyangka nemu reti pasal pemeresi baruh rumah lalu enda muruk ka uras tauka bekau pemakai enggau seneka ati, tang bala anak mit enda ulih ditagang enggau mudah. Nya alai enti baruh rumah enda selalu diperatika bala tuai ka ngiring anak biak rumah panjai, baruh rumah mega tau kamah amat dipeda.

Pengawa ka ngintu pemeresi kandang rumah panjai tu beguna amat, ukai semina ngasuh iya manah dipeda urang ka datai tang mega ka tuju pengerai mensia mayuh ba rumah panjai nya empu. Kerubung tin sardin, plastik mee tauka plastik bukai enti enda dibuai tau ngandang ai lalu nyadi endur nyamuk besarang. Bau ka datai ari uras enggau bekau pemakai ka dipuruk ka baruh rumah tau bendar ngangau lalat enggau langau. Utai tu tau bendar nganjung igi penyakit ka kitai ka diau ba rumah panjai.
Di rumah panjai Nanga Drau ditu, atur kena ngintu pemeresi kandang rumah panjai endang udah dikereja belabuh ari iring sida ka tuai dulu suba. Pengawa ka begutung-ruyung nebas, manchit, ensiang ujung tanju, ujung bilik, tengah laman, jalai pendai enggau jalai ka pasar endang dikereja tiap-tiap taun kelebih agi sebedau maya deka ngintu pengerami baka Gawai Dayak, Krismas enggau pengerami bukai di rumah panjai.

*

Diatu, JKKK rumah panjai ka baru dipegai bala ka anembiak regas bendar nampung lalu nambah ka agi pengawa ka udah dipun sida ka tuai menya. Pengawa ka ngintu pemeresi ukai semina diaduka lebuh maya ka bisi pengerami aja. Sida bisi nyendiaka tusun pengawa ka patut dikereja lalu maya pengawa nya deka dikereja. Sida mega ngaduka komiti mit ka diasuh nyaga sebengkah-sebengkah pengawa baka komiti jalai, komiti dapur, komiti api, komiti ka ngintu pendai enggau ka bukai. Ari tusun pengawa ka udah disediaka bakatu, bala komiti nemu bagi pengawa diri empu, lalu tu ngujung ka batang pengawa ka udah diagihka nya tadi ulih dipejalaika enggau manah agi.

*

Jalai besemin ka dipeda dalam gambar tu belabuh dikereja sebedau ngintu pengerami Gawai Dayak 2008 lalu tembu enda lama udah bekau ka begawai. Enggau jalai semin ka bakatu, ujung tanju rumah panjai, tajapan lama tampak bendar beresi ari ka selama tu. Pengawa ka ngadu jalai besemin bakatu nyangka enda ulih dikereja kediri, kelebih agi ketegal ungkus iya ka besai. Tang taja pia, enggau bantu ari YB tauka upis-upis perintah kelebih agi Majlis Daerah, pengawa bakatu nyadi mudah amat dikereja. Iya nyangka enda datai ka diri empu tang mesti ari pinta, ari tanya ngagai urang ka ulih nulung.