Ngenang Pengawa Berikan

Kemaya hari tu, bala ka diau di rumah panjai suah bendar sebana ka penusah begiga ka lauk sungai. Ai Krian ka diatu jauh bendar bida enggau ka kelia menya. Sida ka turun ka ai, ngulih ikan enggau jalai nginti, mukat, nyala enggau nyelam jarang bendar bulih mayuh. Suah agi ka lebu nadai utai dibai pulai.

Mr. Katul Ak. Luna - benung nyanggit jala

Ngenang pengawa ka dulu menya. Enti nurun ngagai ai Krian urung Lubuk Labang, Lubuk Lidung, Lubuk Tembawai Tinting, tauka Embuas suah bendar tekenyit ninga semerap ikan besai ngempas nangkap barang utai ka anyut dibai ai ari ulu tauka labuh ari puchuk kayu. Suba ikan ulu baka Semah enggau ikan pegung baka Leko enggau Chou Hu (enda nemu nama ka bendar) mudah bendar dipeda nangkap kelebih agi maya ai baru mudik pasang. Sidang ka ngetan pukat, nyala enggau nginti nadai kala pulai lebu. Sida bulih Lansi, Ikan Tunggal, Baung, Ikan Pait, Aras, Supit, Peridin, Tengas enggau bansa ikan ulu ka bukai. Bala ka bagas turun ka ai bisi bendar jalai ngidup ka diri laban ikan ka diulih laku bendar dijual di rumah panjai.

Musim kemarau, kelia nyadi belabuh ari bulan tujuh setiap taun ngujung ka ai Krian langkang bendar. Pantai ari menua ili mudik keulu nyentuk ngagai pala pasang ba Wong Embuas. Maya tu, ikan ulu jarang bendar dipeda pansut. Bala ka turun ka ai suah bendar bulih ikan ka datai ari menua ili. Kadang-kadang sida tau bulih ikan tasik ba ai urung menua tu. Aku ingat bendar dalam taun 1981 menya maya ka besekula ba SK Nanga Drau, suah bendar enggau urang nyala maya langkang. Bansa ikan ka suah bendar ulih mayuh agi bansa ikan ili, kelebih agi Baung enggau Undang. Mayuh mega bansa ikan ka enda dikelala gamal enggau bansa. Abis musim kemarau, ai pulai dalam sereta chiru baru. Ikan ili pulai ka menua ili lalu ikan ulu belabuh pansut baru.

Pengkalan Nanga Drau enggau Pengkalan Lunching dulu suba penuh enggau perau. Diatu kitai semina ulih meda dua tiga iti aja perau ditu..

Bala ka anembiak rindu bendar ka pengawa nyelam. Dulu suba ai Krian enda keruh baka ka kemaya haritu. Enti keruhpan enda tentu lama, lalu iya nyadi ketegal segang bah ai ka anyut ari ulu. Siti ari kebuah pengawa nyelam tu balat bendar ngerindu ka ati laban kitai ulih meda ikan ba dalam lubang batu din, lalu ngasai ka diri ngulih ka iya ngena senapang ikan. Suba urang nadai takut nyelam ai Krian. Kebuah iya pia laban ai sungai tu seruran rami dipansa mensia ari ulu, ari ili. Urang ka undur ari Budu, Kabo, Babang enggau menua bukai sigi mansa menua tu magang ngena enjin ‘speed’ (Moto Speed). Nya alai, lubuk ka endang ditemu bisi jelu ai pan ulih diselam bala sida ka berani agi.

Taja pan pengawa ka ngulih ikan dikereja tiap-tiap hari, ikan menua tu suba endang tetap mayuh. Kebuah iya pia, ai agi beresi. Apin bisi jalan alun di menua ulu. Mega apin bisi projek betanam betupi ka bedandang besai. Kedua, urang apin tentu mayuh macham jalai ngulih ka ikan. (Semina ngena jala, pukat, ginti enggau senapang ikan). Ketiga, urang ka turun ka ai ngiga ikan ka lauk diri empu. Semadi maya ka bulih lebih baru bisi dibagi ka jual. Keempat, urang ka turun berikan semina bala menua tu empu. Nya pan semina bala ka bisi tubuh, bisi jala, pukat tauka ginti. Bala bukai ka nadai tubuh enggau rengka kena berikan jarang bendar enggau ngereja pengawa tu.

Kemaya hari tu, lubuk ka dalam dulu menya nyau nyadi mabu laban tambun tanah ka anyut ari ulu. Lubuk mega penuh laban kerukuh kayu enggau rau. Ai sungai nyangka nyau enda nyamai endur ikan diau ketegal laban ungkap enggau baruh kayu ka tengelam tambun tanah. Suah mega kitai tepeda ka anak undang, gerama enggau ikan ka mit-mit bakalepung mati. Tentu meh urang bisi ngena utai ka bisa ba ai sungai. Kelimpah ari nya mega, urang nyau nemu bekena ka karan enggau racun!

Munggah sekeda ari pukat ka deka ditan ba sungai

Tusah bendar deka meda ikan besai semerap nangkap ba tengah lubuk kemaya hari tu. Jarang mega kitai meda urang bakaserap betibar ka jala sepemanjai ai. Nadai agi meda urang bekedugau duduk atas perau nginti peridin enggau undang ba Lubuk Labang, Lubuk Lidong tauka Embuas. Enti bisi pan jarang bendar... Siti ari kebuah laban ikan nyau nadai tentu mayuh diulih.

Kemaya hari tu ai Krian nyau pulai sunyi. Urang suah bendar besatup enggau jelu ai maya ka merau tauka turun begiga lauk. Kenu ku urang, jelu ai mega begantung ba ikan ka pemakai sida. Nya alai diatu suah bendar kitai tepeda ka sida betangkap ka bangkai jelu, sampah tauka nganu jelu tupi.