Jematan Kaki Wong - 12 Januari 2009

Ujan nyadi sehari semalam nadai ngetu. Nya alai malam 13hb Januari 2003, ai berengkah besai. Bah ti pemadu besai dalam timpuh 50 taun udah nyadi dalam kandang menua Kaki Wong. Jambatan gantung ka lama enggau iya ti baru tembu digaga (Jematan ka diatu) keterubah iya ampuh laban ai. Tengah laman rumah sakit Kaki Wong mega ampuh lebih kurang dalam lima kaki peninggi. Reba enggau batang kayu ti anyut ari ulu betakat ba jematan ka lama lalu ngujung ka iya putus. Semua reba ti lekat dia lalu rarat nempuh jematan ti baru digaga. Ketegal laban penegap jematan tu enda rusak, tang semina singit sepiak aja. Siang hari 13hb Januari bala kami serumah sampal magang nurun kia, ngupas kayu reba ka lekat ba jematan tu.

Diambi ari diari Ex-TR Sabai ak. Kadam (Ditulis 13hb Januari 2003)

Kena 11hb Januari 2009, 7 taun udah bekau jematan tu kena duju bah taun 2003, sekali agi iya kena uji ai deras. Baka ka ngulang utai ti udah nyadi dulu suba, ujan bangat enda ngetu-ngetu lebih kurang dalam pengelama dua hari ngujungka ai Krian kena bah besai baru. Taja pia, bah tu enda ngemesai iya ti nyadi dalam taun 2003. Ai enda ngampuhka jematan. Taja pia, kayu besai ti anyut ari ulu ditabanka ai deras betakat baru ba jematan tu, ngujungka sekeda ari besi enggau dawai ti nanggan ramu jematan tu putus. Ramu enggau papan teras ti nyadika alang enggau ngeladak jematan mega lenyau ditaban ai deras. Raga dawai jematan mua ari ulu balat bendar rusak.

Munyika ditusui bala ti sama ngemataka utai ti nyadi ditu kemari, jematan tu balat bendar singit laban kena paut kayu ti deka anyut ka ili. Sida irau bendar ati enggaika jematan tu putus baru baka iya ti udah nyadi taun 2003 suba. Enti sema jematan tu putus baru, iya balat bendar ngemedis ka bala ti nurun kulu kili, kelebih agi bala anembiak sekula enggau sida ti kelang kelut nurun ka kedai enggau nurun gawa. Pemendar ati bala ka tinggal di rumah panjai, diuluka Penghulu Garan ngansak bala pemegai pengawa di Majlis Daerah Saratok, minta saup sida ngaduka jematan tu enggau lengkas. Pengawa bepinta ukai utai mudah dikereja, kelebih agi enti iya besangkut paut enggau duit. Tajapan perintah ulih meri tulung, tang suah agi iya enda ulih diaduka dalam sehari dua. Ari runding ti kering, enggau pengekih ngatur utai, Penghulu Garan mujur ngansak bala di Saratok (Majlis Daerah) ngerepair jematan tu dalam tempuh enda datai dua hari. Kontraktor ari Saratok dipaduka ngereja pengawa tu seharitu (12hb January 2009), sehari udah iya ka rusak laban kayu. Tajapan bisi kontraktor udah dipaduka perintah ngerepair baru jematan ti rusak tu, bala rayat ari rumah panjai tuai biak, indu lelaki kelebih agi ari Nanga Drau enggau Sungai Engkabang dua buah rumah sama bela sampal magang ngemataka jematan tu direpair. Sekeda ari bala sida sama nyurungka jari nulung urang ti gawa dia.

Penatai bala rayat rumah panjai, enggau sekeda agi ka diau ba sebelah pasar Saratok enggau endur bukai mandangka pengibuh enggau pengingin ati sida deka meda jematan tu pulai manah baru. Jematan tu siti ari jalai ka ditengah sida mindah kulu kili, lalu enti sema iya enda diaduka, mayuh bendar pengawa enggau jalai pengidup tau tejanggal enda ulih dikereja.

Pengerusak ti nyadi ba jematan tu, enti enda diaduka enggau lengkas mega tau nganu nya mensia mayuh ti nengah iya kulu kili.

Ngenang pasal jematan Kaki Wong tu; sebedau jematan baru ka diatu didirika, endang udah bisi jematan lama ba endur tu. Meraka ai Krian ari ulu pasar lama Kaki Wong, lalu tepantup ba pendam Alik seduai Gambang ba puting ari kanan. Penyauh jematan lama enggau iya ti baru tu lebih kurang dalam 10 meter aja mua ari ulu. Ketegal laban ti udah kelalu lama enggau selalu rusak, mensia mayuh majak enda tentu nyamai nengah kelebih agi ketegal iya ti nuntung ba pendam. Bala sida ka tuai berunding bepinta ari perintah dikena nirika jematan ti baru.

Udah tembu jematan baru, jematan lama makin jarang ditengah, ngujungka jematan lama tu majak rusak. Jematan teras ti nampung jematan lama meraka sungai lubang munsuh tauka sungai penuan nuju ngagai stesen bas Kaki Wong mega sama rusak lalu nadai direpair agi. Munyi ka disebut aku terubah dia atas dia tadi, jematan lama tu runtuh ketegal laban bah besai taun 2003.Ungkus dikena nirika jematan tu dianggarka lebih kurang RM65.000.00. Penghulu Garan nguluka bala ti gawa begaji nirika jematan nyentukka iya tembu dalam taun 1996. Atur ngaga jematan endang dikereja ngena jalai enggau adat kitai Iban. Pengawa ngenselan, miring enggau bebiau dikereja sida ka tuai. Darah babi disimpan dalam lubang tiang. Tajapan pengawa ti ngaduka jematan tu dikereja ngena jalai begaji, rayat mayuh ti bukai sama mandangka pengaga ati lalu meri sukung ngagai sida ti udah kiruh bepinta, ngatur lalu nirika iya.

Sida ka tuai enggau bala ka anembiak sama bekunsi runding dikena nentuka semua atur pengawa mujur dikereja.

Kena 14hb March taun 1997, jematan ti baru tembu tu dipenyadika Ahli Parlimen Saratok maya tu suba, ianya niang YB Datuk Peter Tinggom ak. Kemarau. Sekeda bala ti bisi nadai ngulu pengerami tu, ianya ADUN Krian, YB Datuk Peter Nyarok ak. Penghulu Enterie, bala-bala pemesai opis perintah, ketua-ketua masyarakat enggau ketua kaum ari kelingi menua tu ditu enggau sekeda bala ari endur bukai ti bisi dikangau datai.

Kena 21hb Ogos 1998, menua urung tu ditu enggau di rumah panjai Nanga Drau empu nerima penatai mensia mayuh ti ngulu pengawa 'Pesta Berakit Sungai Krian 2008'. Sekeda mensia bemalam ba rumah panjai, lalu sekeda agi bemalam ba tebing ai sepiak-sepiak (ba klinik desa Kaki Wong enggau endur pasar lama Kaki Wong ke dulu suba. 32 iti akit berangkat ari endur tu, ngili ai Krian. Maya tu kemari mensia mayuh bepadat bediri atas jematan enggau tebing kiba enggau kanan ai Krian ngemataka akit ti belepas.