NANGA DRAU, 100 TAUN. (TUSUN TI KESATU)

Sepengudah rumah panjai 16 pintu di Melupa dialahka bala Balau ari Banting. Bala anembiak redak Orang Kaya Temenggong Tandok mupuk begigaka pendiau baru ti likun agi ari kachau bala munsuh. Sekeda sida mudik ngulu ai Krian, berimba, berumpang ngiga pendiau ti baru. Pejalai sida ti berumpang menua tu ukai pengawa ti mudah. Sida besatup enggau orang ti udah dulu nguan menua tu, kelebih agi bansa Seru. Pejalai sida mudik kulu, sida sangkai di Ilas (enggau Kerango), tebing kanan mudik ai Krian ba kaki Bukit Tengalat. Sida ngepunka pendiau ti baru dia. Sida tu diuluka Angking ak. Anau, Gila ak. Anau, Changgas ak. Achan, Beti ak. Bana, Manju enggau Jabas ak. Layang. Maya tu, penyarut enggau bala Seru mupuk diketuka. Sida begulai enggau pangan nyentukka bisi betampil belaki bebini. Daong ak Layang belakika bansa Seru ti benama Sugum. Taja pan udah ngentapka pendiau diri di Ilas, sida agi meruan ngabas pendiau lama di Melupa ke disebut ‘Tembawai Alah’ kemaya hari tu. Kelimpah ari ti ngabas buah tanah ke tinggal di Melupa, sida agi ‘Nganjung Antu’ (Nguburka sida ti mati) ngagai pendam Burui di Melupa. Sepengelama udah ngentapka pendiau diri di Ilas, sida berunding begigaka pendiau ti baru. Jabas ak. Layang, Chuk ak Changgas, Bundak ak. Mawat enggau Antas ak. Gima nguluka bala mudik kulu agi ngiga endur ti nyamai alai begiga pemakai, kelebih agi alai bumai betaun. Pejalai sida kulu ngetu ba Jeno. Muka menua dia. Mudik kulu agi ke Nanga Melak nyentukka sida datai ba menua pala pasang di Embuas. Menua baru, apin kala endur mensia diau ngentapka diri (kelimpah ari bansa asal Seru). Taja pia, maya tu kelia endang udah bisi atur bagi antara menua. Retinya, muka menua baru enda ulih seneka ati. Bisi atur antara menua ti udah ditetapka. Ke kanan, beantara ba Teriki, seberai ai Mapar enggau orang Babang. Kili, naka Kawang. Kulu, Naka Teberu, Sungai Kedang ti mega beantara enggau menua Babang. (Arapka penerang tu betul, enti salah tau diperatika baru). Peturun Jabas ak. Layang, nya orang ti asal diau di Nanga Drau, Sungai Engkabang, Sebubu enggau Mapar ke diatu. Jabas ak. Layang ngepunka pendiau iya ba menua tu, bedampa di Nanga Sungai Kundong. Ari Sungai Kundong, sida bepindah ka Nansang di Mapar. Sida diau dia enda lama, laban ti diserang lalu dialahka bala Seru. Udah mati Jabas ak. Layang, Iya diganti menantu iya empu ke benama Chuk ak. Changgas. Chuk nyadi Tuai Rumah. Iya ngiring bala anembiak redak iya berumah di Tembawai Baruh. Ari Tembawai baruh sida bepindah ngagai rumah panjai baru di Tembawai Tinting. Ari Tembawai Tinting bepindah ga baru ke Tembawai Sungai Pelanduk, sebedau bepindah pulai baru ngagai Tembawai Sungai Kundong. Di Tembawai Sungai Kundong tu sida belabuh bepechah penemu. Rumah panjai ti baru di Sungai Kundong pan bepechah baru. Sida bepindah ngaga dampa baru nitihka temuda, tanah jerami enggau raban diri empu. Dampa ke terubah digaga di Tembawai Pungkar. Maya tu, Chuk ak. Changgas agi meruan nyadi Tuai rumah. Udah mati Chuk ak. Changgas, menantu iya ke benama Bundak ak. Mawat (Dikangau orang Aki Boo) diambi nyadi Tuai Rumah sida. Bundak ak. Mawat nguluka bala iya berumah ba Tembawai Kilong. Maya ti nyadi tuai, Bundak ngiring bala anembiak redak iya berimba mungkal menua. Sida bumai ke Sebubu enggau Mapar. Rambau tu mega, Bundak mai anembiak redak iya bedampa di Sungai Tekalong. Ari Sungai Tekalong, Bundak ak. Mawat mupuk mai anembiak redak iya berimba, bumai betaun ngagai ulu Sungai Betong. Pemuas ke pulai mansang bumai betaun ari Sungai Tekalong ke Sungai Betong, Bundak sekali agi nguluka bala iya berumah baru di Sungai Betong. Sebedau iya mati, Bundak mai bala anembiak redak iya pulai berumah baru di Tembawai Tinting tauka disebut Tembawai Panjai. Tajapan udah belabuh ngaga rumah panjai baru, Bundak enda sempat diau dia. Iya mati ba langkau umai. Kena ngenang pemesai pengawa ti udah dikerja Bundak ak. Mawat, ngulu serta ngiring rayat menua tu berimba mungkal menua. Pemati iya diintu ngena chara ngintu pemati Bujang Berani. Bangkai iya enda ditumbak, tang dilumbung (*Lumbung Bundak enggau Saban meruan diintu nyentukka saritu). Antas ak. Gima nganti Bundak ak. Mawat nyadi Tuai Rumah di Tembawai Tinting (Tembawai Panjai). Tuai Rumah Antas chukup dikenang laban ke nyadi Tuai Rumah ke terubah mai bala rayat iya nirika Gawai Antu di Tembawai Tinting. Rumah panjai di Tembawai Tinting pechah baru. Sang ak. Melana mai raban iya berumah baru di Sebubu. Rumah panjai Tembawai Tinting nyau makin jai, ngujungka bala ti tinggal dia belabuh begagaka pendiau ti baru. Sekeda sida betampung ba dampa. Sekeda agi belangkau ba kebun tauka temuda diri empu sementara ti nganti ulih berumah panjai baru. Tajapan sida enda begulai diau, tang sida besetuju ngasuh Minggat ak. Changgas (Uchu Bundak) nyadi Tuai (Rumah) sida. Maya tu, bisi tiga iti rumah dampa ianya dampa di Nanga Drau, dampa di ulu Sungai Dabai enggau dampa di Tanjung Tapang. Rumah dampa di Nanga Drau (endur kebun Niang Achin, Apai Rantai) bisi sebelas pintu. Bala ti diau ditu, Sida Nambi ak. Anyum enggau sida sebilik, Impa ak. Anyum (Aki TR. Justine Enggie) enggau sida sebilik, Kendawang (Apai Lema) enggau sida sebilik, Entamin (Apai Paul) enggau sida sebilik, Engkoh (Apai Jawan) enggau sida sebilik, Manang Ambu enggau sida sebilik, Baba (Apai Chemagat) enggau sida sebilik, Kentun (Apai Kenda) enggau sida sebilik, Gu (Apai Ladu) enggau sida sebilik, Baing (Apai Ketit) enggau sida sebilik, enggau sida Galang sebilik. Sida ti diau bedampa di Sungai Dabai bisi lima pintu. Apai Megat enggau sida sebilik, Luna (Apai Ujey) enggau sida sebilik, Belaki enggau sida sebilik, Manggoi enggau sida sebilik, Gimang enggau sida sebilik enggau sida Antas sebilik. Sida ti bedampa di Sungai Dabai tu betuaika Antas, jadi Tuai Rumah sida. Dampa di Tanjung Tapang semina bisi dua pintu aja ianya Minggat (Apai Empawi) enggau sida sebilik. Apai Dagai enggau sida sebilik. *Munyi ti disebut tadi, bala ti diau nyembuah-nyembuah, bedampa (kelimpah ari Sungai Dabai) betuaika Minggat. *Cherita ti ditusui ditu ditampung aku ari utai ti ditusui Niang Aki (Kadam ak. Nambi). Enti sema bisi enda sebaka, aku ngarapka bala kitai ti bisi pengingat enggau penemu sama besaup ngemetulka iya kelebih agi ba tusun pemindah, nama orang enggau tempat. Enti bisi ditemu maya tauka taun, nya utai ke manah agi. Aku ti nulis tu ngambika cherita tuai (history) menua kitai enda lenyau lalu ditampung anak uchu kitai dudi ila. Agi bisi udah tu ditampung aku, naka cherita ti bisi dirikot aku empu, ari cherita Niang Aki enggau ‘note’ ti ditulis Apai.

NANGA DRAU, 100 TAUN (TUSUN TI KEEMPAT)

Nampung cherita ti udah ditusui dulu agi ari tu. Sepengudah sepuluh taun merambu pengawa berumah serta nyendiaka semua perengka (ramu enggau utai bukai) ke dikena berumah, sida belabuh nyendiaka diri ngentak ba tapak ti udah dipesetujuka bala mayuh ba Tembawai Masing. Ba senentang tu, cherita nyangka bisi besibil mimit laban kitai ti ngira umur 100 taun tu berengkah ari taun 1924. Nitihka cherita ti ditusui niang Aki, orang ngentak rumah panjai tu maya umur iya 15 ngagai 16 taun. Enti taun ada iya betul 1910, rumah panjai tu nyangka belabuh didirika dalam taun 1926. Taja pia, kitai ngira pengawa ti nyendiaka tapak endur berumah ukai utai mudah dikereja, kelebih agi semua pengawa ngena pengering tulang magang. Nya alai taun 1924 ke disebut nya nyangka dikira ari pun pengawa sida ke ngaduka tanah enggau pengawa bukai sebedau belabuh ngentak. Nadai ga niang Aki nyebut, maya ti ngentak rumah panjai tu iya udah pulaika Drau begulai enggau niang Ini kami ke benama Mau lalu nampung bilik entua iya, Nambi ak. Anyum. Taja pia, pengawa ti nyendiaka diri berumah nyentukka pengawa nirika rumah tu sigi dipeda mata iya magang. Orang Sebubu enggau Drau sigi datai ari siti tampuk lalu sigi begulai serta betulung dalam ngereja semua pengawa. Maya ti deka ngentak rumah tu kelia sida sigi nitihka adat serta atur pengawa ti udah dikena Aki Ini sida ke dulu menya. Sida meratika mimpi enggau burung sebedau netapka maya belabuh ngereja pengawa. Kelimpah ari nya, sida tentu ngintaika maya ti bisi puang, bisi lapang agi ari maya sida ti bumai betaun enggau pengawa bukai. Sida mega, meratika maya kaban belayan, bala pangan ti bisi lantang, bisi puang laban semua pengawa begunaka tubuh mayuh lalu dikereja ngena chara besaup. Enda baka kemaya hari tu, kitai nadai tentu agi betanggul ba mimpi tauka burung enggau semua utai bukai ke disebut dia tadi. Semua pengawa dikereja sida ngena chara besaup. Sekeda agi ngena chara beduruk. Sida ke bisi belanja ngupah orang ke landik gawa, enggau orang ari menua bukai gawa ka sida. Pelaba aku, pengawa ti nyendiaka tapak endur berumah tu sigi nadai penanggul besai ba sida. Sebedau tu, aku udah nyebut pengeras ati sida ke tuai ngiring bala mayuh maya ti beramu enggau pengawa bukai serta pengeransing ati sida ke nembiak nguji serta mandangka pengering tulang diri ngereja pengawa. Tanah ti deka digaga endur berumah ba Tembawai Masing tu tanah munggu. Kemaya hari tu kitai agi ulih meratika gaya gamal tanah ba senentang endur tu. Tanah tu bisi ka nunggang tunga ke ulu, lalu tinggi tunga ka ili. Ari sepiak mua (ujung tanju) enggau belakang (ujung bilik) tanah tu, bisi belebak. Nya alai, pengawa sida ti deka ngentak tu belabuh enggau pengawa ngerataka tanah ngambika tanah ti endur nirika rumah nya sebaka peninggi lalu nyamai endur sida besukat betimbang. Ngereja pengawa tu ngena chara bechangkul ukai utai mudah. Enda baka kemaya hari. Diatu, asal bisi belanja mengga mit kitai ulih nyewa lipan (Bulldozer) dikena nyungkur serta ngerataka tanah. Kelia, tanah dichangkul, dikaur, diangkut ari endur ke tinggi ngagai endur ke baruh agi. Tentu pengawa tu enda ulih dikereja dalam sehari dua. Enda nemuka minggu, tauka bulan tauka taun. Tang iya ngambi timpuh maya ti lama. Nitihka cherita ka ditusui niang Aki, orang ke terubah ngentak rumah iya ianya Minggat ak. Changgas (Apai Empawi). Anang sanggu madah enti pengingat tusui orang tuai kelia bisi enda sebaka ba senentang tu. Rumah ke digaga Minggat tu sepemesai lima penaik. Berapa kaki tu kini?. Pelaba aku iya lebih kurang sama pemesai enggau saiz rumah dua pintu. Kebuah rumah tu besai, laban Minggat enggau Numpang ak. Abang bekunsi nirika rumah. Maya tu pengidup apin bisi bagi enggau pangan diri. Sida nirika rumah begulai enggau diri menyadi, enggau bala ipar. Ke dudi hari, nya baru bilik sida disapat nyadi dua pintu. Sepengudah Minggat seduai Numpang ngentak rumah seduai, nya baru dititihka bala bukai. Nadai ga disebut tusun sapa ti ditetapka berimbai enggau sapa. Barang sapa ti udah chukup perengka enggau ramu, sida nya ti dulu nampung (ngentak). Tunga ke ili, ditampung Gundi ak. Anyum (Apai Belanda). Bekau nya, ditampung Senin ak. Umbol (Apai Dagat). Tunga ke ulu, ditampung Sabang ak. Empiu (Apai Gawan). Udah Sabang ak. Empiu, lalu ditampung Gambing ak Gindal (dikangau Aki Arak), Nambi ak. Anyum (Apai Mau), Manju tauka Rengan ak. Atat (Apai Dudum), enggau Entamin ak. Samat (Apai Paul). Nitihka cherita ti ditusui niang Aki, Aki ichit kami Nambi ak. Anyum bisi ati ka berimbai enggau Sabang ak. Empiu. Taja pia, ketegal laban ramu iya bedau tentu chukup ba ati iya, iya meri peluang ngagai Gambing ak. Gindal ngentak dulu. Tusun bilik tu ulih dipeda kitai nyentukka saritu. Ngagai taun-taun 1937, 1938 (Ngarapka bisi tambah ba senentang tu), rumah panjai Tembawai Masing semina bisi tujuh pintu aja. Ari ili, Senin ak. Umbol, Gundi ak. Anyum, Minggat ak. Changgas seduai Numpang ak. Abang, Gambing ak. Gindal, Nambi ak. Anyum, Rengan ak. Atat enggau Entamin ak. Samat. Maya tu, semina lima pintu ti udah nyengala agi tembu. Enggi Senin ak. Umbol seduai Entamin ak. Samat agi naka rumah dapur aja. Dalam timpuh tu mega, bala bukai mupuk-mupuk nitih sida ke udah dulu berengkah. Pengawa ti nitihka orang bukai berumah tu, nitihka pemisi diri empu kelebih agi ba tulang enggau rengka (ramu enggau utai bukai) ti diguna kena berumah. Nyau ka semua sida, sementara ti nganti chukup ramu enggau perengka bukai, Ngaga dapur endur sida diau dulu sebedau ke ulih ngentak bilik besai. Nitihka cherita niang Aki, sekeda sida ti nampung sepengudah sida tujuh pintu ke dulu nya tadi, ianya Jan ak. Luat (Apai Bilal) enggau ipar Ansi ak. Ngelayang (Apai Tida), ditampung Ajah ak. Sumok (Aki Lin) mua ke ulu. Sepengudah taun-taun 1937, 1938. Rumah panjai di Tembawai Masing tu pan semakin panjai. Maya tu, tunga ke ili ditampung Gimang ak. Maring (Apai Tunga), sepiak Senin ak. Umbol. Udah nya, Luna ak. Megong, Sepiak iya, Mensan (bilik Megat ak. Mensan), ditampung Ansi ak. Ngelayang (Apai Tida). Ngaga bilik baru kediri. Sepiak Ansi, ditampung Juing (Apai Salok). Tunga ke ulu, sepengudah bilik Entamin, Jan enggau Ajah, ditampung Uyu ak. Unong (Apai Sagat), Impa ak. Anyum. Impa berumah disaup menyadi iya ke benama Rambok ak. Anyum (Aki Lundu). Besepiak enggau Impa ak. Anyum, ditampung Engkoh ak. Madang (Apai Jawan), Unchang ak. Antas enggau Titum ak. Unjah (Aki Donald). Nitihka pengingat aku empu, dalam pun taun 1980 kelia. Rumah panjai tu agi mengkang iya ke asal menya. Puting ari ulu, bilik Titum ak. Unjah, lalu puting ari ili, bilik Juing (Apai Salok). Arapka pengingat tu enda salah. Kemaya hari tu, rumah panjai Nanga Drau makin panjai sepanjai, enda naka ke disebut ditu tadi ketegal bala anak telesak sida ke tuai dulu mupuk nampung ngaga ruang bilik ke diri empu. Pulai baru ngagai cherita sida ke ngentak rumah panjai tu kelia. Kelimpah ari pemagas, pengeliat ati, pengering tulang enggau pengelandik gawa (betukang). Mayuh pengawa sida dikereja ngena akal. Nya kebuah utai ti dipeda kita mar serta pedis (digaga maya nya suba) ulih diputar lalu dikereja sida enggau mudah. Nitihka cherita niang Aki, Sabang ak. Empiu (Apai Gawan) tu siku ari orang ke dikelala laban pengelandik iya betukang. Kelimpah ari nya, iya tu mega ngembuan perengka ti chukup dikena iya gawa. Nya kebuah, nitika cherita ditusui niang Aki, Sabang ak. Empiu tu suah nulung serta diupah orang gawa nembuka rumah sida. Maya tu, upah tukang udah besai agi antara $20 ngagai $30, duit maya tu kelia (Duit maya perintah raja Brooke). Kelimpah ari Sabang ak. Empiu, bala bukai jarang ke enda nemu gawa. Sekeda ari sida bukai ke endang ditemu landik betukang baka Minggat ak. Changgas, Numpang ak. Abang enggau aki ichit kami Nambi ak. Anyum (semina nyebut nama ke ditusui niang Aki). Pemandai sida tu dalam pengawa berumah, betukang ulih dipeda kitai dipeturunka bala uchu, ichit wit sida kemaya hari tu. Orang Nanga Drau mayuh pandai betukang. Munyika udah disebut aku di atas nya tadi, sebedau ngentak sida dulu bepiring. Bebunuh babi, meda atau enggau darah iya. Sida mega ngilaka maya mimpi enggau burung ti manah sebedau belabuh gawa. Semua pengawa tu mesti dikereja ngambika pengawa sida mujur, gerah mudah lalu tubuh sida, nyentuk ngagai anak uchu, ichit wit ke nguan rumah tu chelap lindap sepemanjai pengidup sida. Lubang tiang ti udah ditumbak disimbur enggau darah babi. Tiang didiri enggau sampi, enggau piring enggau ading. Nitihka cherita niang Aki, maya orang ngentak rumah nya asai ti meda orang benung rami. Bala sida serumah, enggau kaban belayan bukai ari ulu ari ili sama sampal datai ukai semina deka meda orang ke gawa, tang nulung sida. Pengawa ti batang begunaka tubuh mayuh, baka pengawa betanggung (kitai meratika diatu, tiang ti besai-besai nya nadai ulih ditanggung siku dua). Tiang diangkat, ditarit, sekeda agi ngetan tiang ke udah bediri nya bebala mayuh ba lubang tiang ti udah digaga dulu agi ari nya. Sida ke indu, besaup nyendiaka pemakai, ai irup enggau sekeda pengawa bukai ti ulih disaup sida. Sida ke nembiak, merati ari jauh. Belajarka pengawa ke dikereja orang tuai. Sida ke benung ngangkatka diri bujang, umur bebelas taun nulung ngereja pengawa ti apin tentu berat ke ulih dikereja sida. Chara nirika tiang, nitihka pengelandik tukang. Nya alai, maya tu suba tau disebutka mayuh chara dikena. Chara ke dikena nirika siti-siti tiang tentu bisi besangkut paut enggau pemesai, pemerat enggau pemanjai tiang. Tentu bisi chara dikena nirika tiang ti besai serta berat, lalu pia mega chara enggau iya ti mit serta jelan pemesai. Semua pengawa tu dikereja besaup, ngena akal serta pengering tulang. Perengka ti dikena gawa semua digaga diri empu magang. Tali digaga ari betik, pia mega sida bekenaka kayu (ka sukung, ka alang, ka tungkat enggau guna bukai). Sida mega ngena ai ngelancharka tiang masuk dalam lubang lalu ngalihka tiang nya betul-betul ba endur ti dikedeka sida (nitihka sukat). Nitihka cherita niang Aki, maya ti nirika tiang tali betik ditanchang ba puchuk tiang nya. Sekeda sida nulak tiang ngasuh bediri, lalu sekeda agi narit iya ngena tali betik nya. Bala ti bukai, nyaup ari belakang, ngeju puchuk tiang ngena kayu bepanga, nyentukka tiang tu bediri enggau manah. Udah tiang nya bediri baru sida ngaga sukung iya ngambika tiang nya enda rebah agi. Kayu ti lembut agi, baka kayu gerunggang dikena ngaga sukung ari sepiak-sepiak tiang ti udah bediri. Mayuh orang madahka diri enda arap ati ka pengawa sida ti nirika rumah ba Tembawai Masing tu tau nyadi. Kebuah sida penemu bakanya, laban sida meda, tanah enda rata. Tiang ke dikena bisi panjai, bisi pandak. Sida enda ulih terundingka bakani tiang ti bisi besai, bisi mit bakanya ulih digaga sebela nyadi rumah baka ke dipeda kitai kemaya hari tu. Bala sida ke tuai, ke landik pengawa betukang berumah ke disebut aku tadi nemu chara ngatur iya. Kelimpah ari sukat penalam lubang, sida nyemelaka tiang siti enggau tiang siti enggau chara ngayakka tiang (arapka leka jaku ke dikena aku tu betul). Lubang endur tiang ke panjai disimpan ai, ngambika tanah iya lembut. Enggau chara ti bakatu, sida ulih ngunjam tiang dalam agi ke dalam tanah. Tentu balat pedis pengawa tu. Enda pia?. Enti tiang tu pandak tauka masuk kelalu dalam, sida ngaga kayu ka alas. Udah sida nyukat lalu nentuka peninggi iya sama, nya baru sida ngemas iya manah-manah. Tu meh pengawa ti ngena akal ka aku ari pun tadi. Enti baka kemaya hari tu tanah sigi endang udah rata, lubang enggau pemanjai tiang sebela. Rengka dikena ngaduka iya mayuh. Ngasuh pengawa kitai lempung. Enti kitai meratika, gamal pelin enggau chara ngaga rumah panjai tu mayuh sebaka enggau rumah menyadi kitai bansa Melayu. Nyangka kitai nembiak rebak baru diatu enda nemu kebuah iya. Maya tu kelia, kaul kitai menua tu enggau bala Melayu ari ili sigi cukup manah. Sida mudik kulu, bedagang, gawa lalu diau enggau kitai Iban. Pia mega mayuh kitai Iban ti nemuai kili begulai enggau sida Melayu baka diri menyadi. Kala kita ninga orang tuai nusui ba Kaki Wong kelia bisi kampung Melayu?, disebut orang Kampung Lengki. Kampung tu ari ili mimit pasar Kaki Wong ke dulu suba. Pulai ngagai pengawa berumah nya tadi, sida ke tuai mayuh bulih penemu betukang ari bala Melayu. Sekeda sida ngena tukang Melayu gawa ke sida. Penemu ka diambi ari bala menyadi kitai bangsa Melayu tu siti ari kebuah gamal perabung rumah ti asal kelia baka perabung rumah Melayu, Renjan. Kemaya hari tu, gamal iya nyau jauh udah berubah ari ke dulu suba. Enti cherita ke ditusui aku ba senentang pengawa sida ti ngentak tu bisi enda sebaka enggau utai ke ditusui sida ke tuai ngagai kita, aku arapka bisi tambah ari kita ngambika cherita tu ulih digaga manah agi ke dudi hari. Aku mega minta ampun enti sema nadai nyebut nama Aki Ini kita ke bukai ti sama enggau berumah tu kelia laban aku bulih cherita ari orang siku aja, niang Aki. Iya nusui naka utai ke dikingatka iya. Enti bisi hari, aku arapka ulih nampung cherita pasal pengerembai pengawa sekula, pengawa pengarap, pengawa dagang, pengawa gerempung enggau iya ti bukai. Sekeda ari cherita tu udah kala ditulis aku dulu ari tu, dikongsi ba facebook tu lalu sekeda agi disimpan aku ba blog aku mylonghouse.blogspot.com.

NANGA DRAU, 100 TAUN (TUSUN TI KETIGA)

Menua Kaki Wong, rambau sida ti benung nyendiaka diri berumah ba Tembawai Masing kelia nadai mayuh kayu kering, kelebih agi kayu Teras (Tebelian) ke beguna bendar kena berumah. Iya ke bisi, dipebagika bala sida ti sama benung berumah magang. Nya alai, sida ke tuai begiga ramu kia-kia, kulu kili serata menua. Endur ke ulih digagai. Sekeda sida ngagai menua ti jauh agi, nepat menua kaban belayan tauka pangan baka Kawit, Kerangan, Kabo enggau endur ti bukai. Maya tu suba, orang nadai betagang beambi ramu. Kayu, kelebih agi bansa kayu kering ti beguna amat kena berumah agi mayuh. Nya kebuah sida ulih begiga, beramu enggau mudah tajapun ukai ba tanah tauka kandang menua diri empu. Kelimpah ari ti beban ramu (kelebih agi tiang) ka diri empu, sida mega bisi meli tauka ngupah orang beban ramu (tiang) ka sida. Sida ti beban ke diri empu, baka Minggat ak. Changgas (Apai Empawi) enggau Numpang ak. Abang (Aki Ogos), begiga serta beban ramu ba kandang menua Kawit. Udah nya seduai iya, enggau bala ti bukai baka Sabang ak. Empiu (Apai Gawan), Gundi, Untol enggau Gimang beramu ke Kerangan. Niang aki Ichit kami, Nambi ak Anyum maya tu ngupah orang beban ramu ka iya. Iya ngupah siku orang ke benama Timbang. Orang Klua, beban 12 batang tiang pemesai 6 inci, pemanjai 3 depa siti-siti. Sebatang ramu dibayar $2.00 (Nyangka dua Dollar duit perintah Brooke kelia). Timbang ngangkut serta nganjung ramu nya ke iya sampai ngagai pengkalan di Nanga Drau. Niang Aki (Kadam ak. Nambi) maya tu udah nitihka entua iya (ke lalu nyadi Apai iya sepengudah pemati ini kami), Nambi ak. Anyum beramu lalu nirika rumah. Nya alai iya meda utai ti nyadi maya nya kelia. Nitihka ka cherita Niang Aki, orang ti chukup kering gawa (beban, berangkut ramu serta berumah) maya tu kelia nya Sabang ak. Empiu, Minggat ak. Changgas, Rambok ak. Anyum (Apai Entika) enggau Impa ak. Anyum (Aki Tr. Justine Enggie). Maya tu kelia, bala sida tu agi benung tulang gawa magang. Tiang ke pemesai lapan inchi segi empat, baka ti lempung enti bala sida tu nanggung iya. Kelimpah ari ti beramu ba kandang menua Kawit enggau Kerangan, sida mudik kulu begiga ramu ka batang Kabo. Nitihka cherita Niang Aki, menua ke selalu ditepat sida endur beramu nya ba Nanga Ijan (besemak enggau rumah panjai Nanga Ijan) enggau menua Rantau Kechala (ari Ili Nanga Ijan) ba menua Kabo. Aku arapka bala ti macha tu bisi ulih ngemetulka nama, endur menua ka bisi disebut ditu, enti iya bisi salah tauka enda sebaka enggau iya ke ditemu kita). Niang Aki Ichit, Nambi ak. Anyum, Gundi (Apai Belanda) enggau Jelani enggau orang beramu ka Kabo. taja pia sida enda enggau orang beban ramu di Nanga Ijan tauka di Rantau Kechala. Sida beban ramu ba menua ke disebut Lubuk Kudi di Kabo. Sida bulih ramu sepemesai 7 ngagai 8 inchi, pemanjai 3 ngagai 4 depa siti-siti. Kelimpah ari ti beban tiang. Sida mega beban ramu ke bukai. Cherita ti ditusui orang tuai semina bebanka tiang, lalu tiang ke diban sida tu endang kayu Teras magang. Pelaba aku, tentu mega bisi bansa kayu ke bukai ke diambi sida ari menua tu, enggau endur-endur ke bukai. Sida mega bebanka atap. Nitihka cherita niang Aki, sida bebanka (ngaga atap ari kayu teras) ba menua Nanga Sungai Limat, Ari Ili menua Wong Besi di Kabo. Enti kita ingat, sebedau atap rumah panjai tu ditukar ngagai Zink (Atap zink) kelia enggau Atap Spendex ke kemaya hari tu. Rumah panjai Nanga Drau tu endang ngena atap kayu (atap teras). *Orang belabuh nukar ngagai atap zink (lebih kurang ujung taun 1970an ngagai pun taun 1980an) laban atap teras ke lama nya nyu udah makin jai. Pengawa ti pengabis pedis dikereja orang tuai kelia maya ti beramu nya maya ti ngangkut serta mindahka ramu (tiang) sida. Ukai nya bisi injin kena nanggung tauka lori besai kena ngangkut serta mindahka ramu (tiang) ari endur ti beban ngagai endur ti deka berumah baka kemaya hari tu. Kitai ngira penyauh endur beramu ka disebut aku tadi, di Kawit, di Kerangan enggau di Kabo. Pejalai kereta kemaya hari pan pama ga asai penyauh. Kelia menua semina ulih digagai enggau chara bejalai kaki tauka ngena perau. Pemindah sida enggau semua pengawa ti dikereja sida sigi ngena tulang magang-magang. Enti pengawa beramu tu dikereja siku, tentu enda ulih. Ramu, kelebih agi tiang ke diban, diangkut semua besai serta berat magang. Nya alai, sida begunaka akal, lalu sida enda ulih enda besaup, tauka beduruk enggau pangan diri. Penemu enggau pengawa ti dikereja besaup enggau pangan diri tu chukup manah bendar lalu tau jadika ke chunto kitai kemaya hari tu. Sida nadai bebagi ati, nadai bechiping penemu tang sanggup betulung, besaup, lalu nadai betejuka pangan diri ngereja pengawa. Sida ke biak-biak ransing ati nguji serta mandangka pengering tulang diri ngereja pengawa. Ngangkut ramu ti besai-besai baka tiang nengah jalai darat mesti disan. Enti endur ke mai nya jauh, iya enda ulih diirit, dipanggal baka endur ke semak. Sida ngesan ramu (tiang) ari endur ti beban iya ngagai sungai. Enti sema menua ke endur beramu nya nadai besemak enggau sungai. Ramu nya disan nengah jalai darat mansa kampung, mansa bukit enggau lebak nuju ngagai endur sida ti ka berumah ba Tembawai Masing. Enti ramu (tiang) ka disan nya besai, sida ngaga kalang ngambi mayuh agi tubuh ulih ngesan iya. Ka tusui Niang Aki, siti-siti tiang ke besai, penyampau sida ti ngesan iya enda kurang ari tiga puluh iku. Retinya enda kurang lima belas iku sepiak-sepiak enti iya dikalang. Maya ti ngangkatka tiang, tauka nurunka ramu ari bau sida mesti ka sereta. Sida enda tau beteju enggaika pangan diri pedis kena tating tauka ditinggang tiang ti besai serta berat nya. Niang Uyu (Aki Kiley), selalu diasuh orang ngerah semua bala sida ti betanggung. Nyawa iya besai serta terang didinga ngerah sida maya ti nanggung tauka nurunka tiang ari bau sida ka tanah, maya ti niki ba endur ti tinggi (bukit, munggu), nurun ngagai endur ti baruh, meraka sungai tauka mansa jalai ti luchak. Niang Aki ingatka utai sebut iya. “bah bah bah…ko iya, angkat kitai”. Semua sida lalu besedia magang ngangkatka tiang nya sereta. Bakanya mega maya ti nurun ka tiang, tauka maya datai tauka endur munyi ti disebut aku diatas nya tadi. Maya ti niki bukit, bala ti ngesan agi tetap ngesan. Sekeda diasuh narit ngena tali ari atas bukit ngambika tiang ti disan nya tadi enda surut ke belakang lalu pejalai bala sida ke ngesan mansa endur nya mudah dikereja. Bakanya mega maya ti nurun bukit, sekeda sida bediri ari belakang ba atas bukit ngetan ngena tali ngambika tiang ulih disan lubah-lubah, enda nelusur laju ke mua ti tau ngemediska sida. Maya ti mansa tanah lembut, kaki sida tengelam nyentukka buku ali. Bala sida ti ngesan, enda tau ngelengkaka san sida seneka ati tajapan lelak, pedis, tauka enda nakal agi. Laban pengawa tu tau nganu serta ngemediskan orang bukai. Nya alai, pedis-pedis bakani pan sida enda ulih ngelengkaka sebarang nyentukka maya tiangnya diturunka sereta ke tanah. Enti pengawa ti ngangkut, ngesan tu udah datai ba sungai, tauka endur ti beban ramu (tiang) tu endang besemak enggau sungai. Pengawa sida deka mudah agi dikereja. Tiang tauka ramu bukai tu ulih diirit, sepemenjai sungai. (Kala meda orang pengawa bakatu maya ti diau di Ulu Awik kelia). Tiang ti ulih undan ngena perau, deka diundan ngena perau. Perau ti kena ngundan tiang tu digaga besai ngambika ulih dikena mai tiang ti besai serta berat. Nitihka cherita niang Aki, akal sida ngengkahka tiang ka dalam perau. Perau nya mesti dikaramka dulu. Tiang dipasukka lubah-lubah ke dalam perau, enggaika perau nya pechah. Udah tiang masuk dalam perau, baru sida nimba perau nya baru. Tiang diundan ngili ai Kabo, ai Krian sebedau datai di pengkalan Nanga Drau. Datai di pengkalan Nanga Drau tu, chara ti sama dikena ngeluarka tiang ari perau sebedau iya disan baru ke atas ngagai endur ti deka berumah ba Tembawai Masing. Cherita tu ditampung ari utai ti ditusui Niang Aki (Kadam ak. Nambi) kelia. Enti sema bisi besibil enggau utai ke ditemu kita, kelebih agi ba nama tempat, nama orang (Nyangka bisi tinggal), enggau pengawa ti dikereja sida. Anang sanggu madah, tauka komen ngambika cherita tu ulih digaga manah lalu nyentuk agi ke pengingat kitai semua. Rumah panjai Nanga Drau tu bediri lebih kurang antara taun 1924 ngagai taun 1926. Aku nadai engkah taun, laban tuai kelia nadai besebutka taun. Sida ngingatka utai ke nyadi kelia ngena maya utai utai ke nyadi baka maya Raja datai, maya orang ngayau mulau, maya orang bebaik ari penyarut, maya penyakit enggau iya ke selalu didinga kitai maya ‘Lampung Pechah’ enggau iya ke bukai. Taja pia, nitihka cherita enggau utai ke nyadi maya tu. Pengawa ke ditusui dalam cherita tu nyadi lebih kurang dalam kandang dalam taun 1920an. Udah tu lagi, aku nguji nulis pengawa sida ke ngentak…

NANGA DRAU, 100 TAUN (TUSUN TI KEDUA)

Lebih kurang lima belas taun sepengudah ti bepechah pendiau ari rumah panjai lama di Tembawai Panjai, diau bedampa di Nanga Drau, Ulu Sungai Dabai, Tanjung Tapang, enggau sekeda agi ke belangkau ba tanah temuda enggau tanah kebun diri empu. Sida belabuh berunding ka begulai baru ba siti rumah panjai. Sida ngelanggur deka berumah baru. Langgur ti deka berumah baru tu ukai sehari dua. Nitihka cherita ti ditusui Niang Aki, langgur penemu ti deka berumah baru tu udah disebut lebih kurang sepuluh taun (dalam timpuh lima belas taun nya), baru iya ulih dikereja sida. Sebedau ti berumah baru, sida selalu begelumu ba rumah panjai (dampa) di Nanga Drau. Rumah panjai tu tau dikira dalam jaku ke diatu nyadi palan endur sida betemu, begelumu serta berundingka utai. Ukai nya aja, rumah panjai (dampa) sebelas pintu tu suah lalu nyadi palan alai temuai datai. Bala orang perintah, bala Cina, bala Melayu enggau mensia mayuh ke bukai ti datai ari ulu, ari ili nepat rumah panjai tu ketegal iya mudah digagai, ba nanga sungai (Drau), besemak enggau ai Krian ke endang jalai mensia mayuh mindah kulu kili. Kelimpah ari nya, tu menua pala pasang. Bot enggau perau ti besai agi, ti ulih ngundan mensia enggau barang ulih datai ditu lebuh maya ai ti besai segang pasang. Mensia mayuh ari ulu. Ulu Krian, Batang Budu, Batang Kabo, Babang enggau menua ke bukai betemu enggau orang ti datai ari ili. Saratok enggau menua ili ai Krian. Mensia mayuh, orang dagang, enggau orang perintah betemu ba endur tu. Dalam timpuh sepuluh taun nya, kelimpah ari ti berundingka pengawa beramu. Sida mega berundingka endur ti patut alai berumah. Maya tu, penemu bisi beserekang. Sekeda ari sida dekaka rumah panjai ti baru nya digaga ba Sungai Dabai, Semak Tembawai Kilong. Sekeda agi, dekaka rumah panjai ti baru tu digaga di Sungai Ijok, dalam Sungai Isu. Drau. Sida enggai berumah besemak enggau ai besai, ai Krian ke endang ditemu bisi jelu ai. Penyarut enggau jelu ai udah kala nyadi di menua tu. Nya ngasuh sida takut. Sida enggaika bala anak, bala uchu bemain ba sebelah ai, tau dikachau jelu ai nya. Niang Aki Ichit kami, Nambi ak. Anyum enda besetuju enggau penemu tu. Iya keras deka berumah besemak enggau ai Krian. Ko iya, enti berumah besemak enggau ai besai. Nyamai alai mindah bekenaka perau kulu kili. Maya tu suba, sungai tu disema baka jalai raya (jalai alun) kitai ke diatu. Semua pemindah, ari ti ngidupka diri nyentukka nganjung pemati sigi nengah sungai magang. Pengawa bumai betaun, bekebun, berangkut, begiga lauk, begiga utai bukai sigi nengah sungai magang. Orang perintah, bala Melayu enggau Cina ti datai bedagang enggau bekuli mudik pasang nengah ai Krian. Sida ari ulu, Ulu Krian, Batang Budu, Batang Kabo, Babang enggau menua bukai sepemanjai ai Krian, mansa menua tu sebedau kili agi ke pasar Saratok. Nya alai, penemu niang Aki Ichit menya bisi nyelai ari enggi orang bukai. “Enti Ulih”, ko iya. “Tali perau tanchangka ba tiang rumah panjai”. Retinya, iya deka berumah besemak enggau ai. Ti kitai meratika pemedis pengidup maya nya suba, penemu tu betul. Kelebih agi ba pengawa sida ti berumah baru. Pengawa berangkutka tiang, berangkutka ramu ukai utai mudah dikereja. Niang Aki Ichit suba, bisi ngembuan runding ti jauh. “Kitai ti berumah tu, ukai semina ke tubuh kitai ke diatu, tang ke tampung, nyendiaka pendiau uchu ichit kitai ke dudi hari ila Nambi ak. Anyum meri langgur penemu deka ngena tanah ti besemak enggau dampa sida di Nanga Drau alai berumah baru. Tanah munggu enggi apai iya ke benama Anyum ak. Danggat. Betunga enggau ai Krian. Ari belakang (belakang SK Nanga Drau ke diatu) dikepit ai Drau. Tanah tu disebut orang Tembawai Masing, laban kala endur dampa siku orang ti benama Masing ari menua Praja. Nadai disebut bagi nama orang bukai ke sama bedampa enggau iya dia kelia. Sida pulai ke menua asal laban orang ti bempu tanah (Peturun Anyum ak Danggat) deka berumah, ngambi tanah nya pulai baru. Kelimpah ari nya, tanah tu berimbai enggau tanah temuda Niang Saudagar Jeti. Orang ti tebilang ba menua Kaki Wong maya nya suba. Penemu Nambi ak. Anyum disukung bala ti bukai baka Minggat ak. Changgas (Tuai Rumah maya nya suba), Numpang ak. Abang, Sabang ak. Empiu enggau sekeda bala tuai bilik ke bukai. (Ngarapka bisi tambah ba senentang tu). Semua bala ti besetuju enggau penemu Nambi ak. Anyum, berumah ba Tembawai Masing. Peturun sida tu, orang ke diau di rumah panjai Nanga Drau ke diatu. Bala ti enda besetuju, ketegal penanggul diri empu tauka enggai berumah besemak enggau ai besai mai raban diri empu begiga endur bukai alai sida berumah. Sekeda ari sida berumah kulu agi ba menua Drau Ulu enggau Sungai Engkabang ke diatu. *Ngarapka bisi tambah cherita ba senentang langgur sida ti deka berumah baru tu. Udah tu lagi, aku deka nampung cherita sida ti beramu lalu nirika (ngentak) rumah.