CHERITA TAMPUN ANTU PALA

Cherita sida ke tuai terubah mungkal menua Drau ditu dulu kelia asai ti enda tentu ulih kenang serta ditemu ditusoi ditu magang. Iya ti disebut ditu semina sekeda iya ti ampit dikingat lalu ditusui urang ti tuai ngagai kitai pasal penatai sida ngagai menua tu dulu kelia. Kitai tu nampung sida iya ti dulu suba sida ti pindah kitu apin penatai Rajah James Brooke ka menua Sarawak tu menya.

Nyadi menua Krian senentang tu maya nya kelia semua agi puang magang, kampung baung apin bisi mayuh mensia nguan iya. Nyadi naka urang ti bisi ditemu sida ngachir pendiau diau belindung belalai dalam babas ba lubang batu ditu nya bansa Seru enggau Beketan. Bala Seru betuai ka Guling, lalu bala Beketan betuai Meragasing. Sida tu enggai tentu meda kitai Iban. Urang dua bengkah tu diau nabur sebelah babas di menua Krian ditu. Sida nya suah dipeda bejalai, belalai, lalu belindung ba siti tingkah tebiang batu tebing ai Krian lalu sebengkah agi enda jauh ari kubur tu kumbai kitai lubang munsuh.

Bala Seru pansut ari lubang nya lalu deka ngachau munuh kitai Iban lebuh maya ba umai tau ka maya kitai gawa kediri. Raban urang dua bengkah tu nadai tentu mayuh tubuh ti ayan dipeda siga-siga pendiau tang taja bakanya sida tu enggai nunduk ka Iban. Nyalai bala Iban ti tajam agi ati enggai surut nadai deka nunduk ka urang ti bakanya ngejung ka pengawa bebunuh bekayau pangan diri. Nyadi sekeda bala Seru iya ti ulih kaul Orang Kaya Temenggong Tandok anak Daap dianjung iya ngagai Imam Molana ka Kabong convert jadi Islam. Nyalai ari pengawa ti bakanya tadi Orang Kaya Temenggung Tandok bulih reta ti dikinginka urang ti ngalah rumah sida iya ti ditemu kitai Tembawai Alah diatu.

Menua Sarawak rambau nya menya mensia apin tentu bisi atur adat ti terit merintah menua lalu raban ke kering berani nya ka lalu empu menua ti tampung bala ichit-wit sida iya diatu. Nyadi aki ini kitai Drau tu lalu nemeran bempu menua ditu nyentuk ka ditampung tubuh kitai datai ka sehari tu. Pemar pemedis sida ti mungkal menua tu enda tentu ulih dikerandau kitai diatu tanda iya meh nya ti dipeda kitai Antu Pala baka ti disimpan dalam Lumbong Bundak enggau Saban ba pendam Kaki Wong.

Apin sida Jabas, Manju, Beti, Chuk, Gila, enggau raban sida pindah ari Melupa ka Drau kitu Seru enggau Beketan endang udah bisi ditemu dulu diau ditu tang sida nya nadai tentu entap pendiau rari alah laban kitai Iban. Udah nya kelia sida nya nyau pambar pendiau bala Seru betuai Guling, Gambang, Tanggai, Seguat pindah ka Tengalat, Senyawan Krian enggau Tebujang Ulu Awik. Enda lama udah nya suba kitai nyau bebaik nadai tentu bepenyarut agi begulai enggau pangan diri. Nyadi bisi siku indu anak Mamju seduai Chemuring ti benama Daong menyadi Jagit, Melana, Bulik ti nurun kitai Drau tu belaki ngambi Seru ke benama Sugom. Seduai iya begulai nadai beranak tauka punas, Sugom seduai Daong begulai enggau kaban sida iya Seru ti benama Riyu diau di Elas Krian. Sugom seduai bini iya Daong kadang-kadang diau begulai sebilik enggau ipar iya Jagit anak Manju bumai betaun diau di menua Elas. Nyalai nyentuk ka diatu kami Drau enggau Sebubu agi meruan mengkang bisi temuda buah tanah kebun getah di Kaki Bukit Tengalat nya dia alai bala kami selalu pereman bumai ngelama tu. Sungai Elas tu bepati ba Batang Krian tebing kanan mudik beseberai enggau rumah panjai sida TR. Sagi Klua diatu. Nyadi Beketan ti betuai ka Meragasing, Merajalin, Agan, rari ngulu ka Krian nitih sida Entigu, Entiggi, Entigar ka Paku Layar Seribas.

Raban aki ini kitai ti angkat ari Sebaru Kalimatan Indonesia betuai ka Padang anak Ligam enggau bala iya Ningkan, Pijih, Jarop, Medan mayuh menua ditengah alai ngetu bumai betaun dulu tang sida agi apin tembu ati endor ngentap ka diri. Nyalai agi mansang ngiga menua baru terengkah di Rimbas dia endang udah bisi diuan urang. Mati Padang diganti anak iya ti nama Gunggu angkat ari Rimbas melungang Bukit Legong ka Melupa berumah di Ng. Meramoh bumai betaun di Batang Melupa terus ka Ili Melupa. Lepas Gunggu diganti anak iya ti nama Garai berumah di menua ti dikumbai kitai Tembawai Alah diatu. Nyalai laban rumah sida ke dialah munsuh kitai pindah ka Krian tengah kitu. Rambau nya menya menua Sarawak tu apin bisi adat lalu mensia ngena pemerani ngena pengering sapa lembut alah iya ti kering menang. Nyadi bisi bala perintis (poineer) urang ti dulu ngambu menua tau alah laban urang ti datai dudi kering berani ti deka ngaga rita mansut nama diri empu rambau nya dulu kelia. Sida nya nadai beduli ka nyawa diri mati ngambi ka jadi kenang urang baka iya ti disebut ditu.

Nyalai utai ti disebut ditu iya nya antu pala lama udah ditaruh dijaga diibun kenyau ari dulu kelia dibai mindah nitih ka kitai nyadi diatu iya dianjung ka pendam. Antu pala nya ulih dengah bala pengayau jeman kelia menya tu jadi ka pesaka kitai ti ichit-wit sida iya. Nyadi asai iya ke diatu kitai enggai agi naruh iya di rumah laban nya kitai nemu anak nembiak mayuh enda tentu nemu guna jalai ngibun baka urang ti tuai dulu kelia. Nyadi tu sebayan begulai enggau kitai di rumah panjai penemu indu nembiak nya antu. Diatu iya dianjung ka pendam diatur kami iya enda ditumbak ka dalam tanah awak ka agi ngayan dipeda kitai iya udah dikemas. Nambah ka nya awak ka sida ti dudi jemah ila nemu pengawa kitai Dayak ti dipelandik ka urang kena ngulih nama ngulih rita.

Pala tu semua nya utai lama magang dia bisi dua bagi iya ti ditusuk nya lama bendar lalu iya diringka nya ti baru agi. Tang taja bakanya semua nya udah manggai ngagai ratus taun udah dikembuan. Bisi dibacha ba History Dayak headhunters tu awak ka nyadi nyata dipeda nyentuk ka sahari tu. Tang iya ti bendar utai tu ulih bala pengayau ukai baka kitai ngasu jelu ari babas ambi ka empa. Sebengkah agi kebuah laban nunjuk ka pemendar sida ti matak raban kitai pindah kitu kelia. Kitai di Drau tu mayuh udah serak tubuh nampung menapung urang ti mungkal menua tu kelia lalu bekau tembawai sida ke tuai suba agi mengkang ditemu kitai magang. Bakanya mega cherita asal penatai aki ini mengkang ditemu dalam tusut sida ti berumpang besawang menua tu. Tang iya ti bisi pegari nama nya semuti Gila seduai Daji ti empu Tampun Antu Pala sebelas 11 igi disebut ditu. Tu ukai semina ulih seduai iya kediri aja. Iya nya sama ulih sekeda kaban pengayau ti bukai ampit basah jari enggau seduai iya.

Cherita ti ditulis ditu nampung tusoi sida ti bisi pengingat ke penatai urang ti dulu kelia menya. Cherita nadai urang nulis iya semuti didinga pansut ari mulut tusoi ngagai rebak ke dudi. Nyalai utai tu mar bendar dicherita ensera sepi aku nadai ulih dibetul ka nitih iya ti asal ti bendar jadi dulu kelia. Nyadi iya ti dipeda kitai diatu abi kaki abi jari sida ke berumpang besawang menua tu temuda bali rimba serta pesaka lama tampun Gila seduai Daji enggau raban sida iya.

Pala munsuh tu ditaruh nitih ka penyiru penau penti pemali sida ti tuai dulu kelia belama disalai ditepok atas bedilang para dapur serta diberi piring asai ai lebuh maya kitai ti bisi begawai bedara ka macham utai ti bisi jadi ba rumah kitai ditu ngelama tu. Bakanya mega lebuh ke pindah berumah, Antu Pala tu nadai diempilita pia aja iya diangkat ngena adat serta piring ading. Nyalai urang ti ngibun utai tu kenyau ari dulu kelia milih urang ti patut alai engkah iya. Urang ti bulih empu dengah semua nya semuti rita enggau nama ditemu kitai nyalai enti nasit sida nadai pala sida tau empu urang. Lepas ari TR. Jabas diganti TR.Bundak jaga ngintu tampun antu pala tu Bundak bebini ngambi Marai uchu Jabas tambah agi Bundak tu uchu Orang Kaya Temenggong Tandok ti dialah ka munsuh rumah lebuh sida nadai ngadang di rumah panjai sida ti disebut kitai Tembawai Alah diatu. Mati Bundak ganti rebak serak uchu ambu iya ngibun jaga tampun antu pala tu suba. Penudi tu kamari diraran atas ruai Penghulu Garan lalu disetuju anjung ka pendam Kaki Wong begulai enggau lumbong Bundak seduai Saban. Saban tu menyadi Bundak sama anak Mawat . Mawat anak O.K. Temenggong Tandok.

PENGAWA MINDAHKA ANTU PALA
Nyalai bepun ari Aum kami ba Balai Raya lama kena 23rd.April 1995 rumah Ng. Drau, Sebubu, Mapar enggau Sg. Engkabang deka meresi serta ngaga ringkat kai tanah kubor Kaki Wong laban nya digaga nyadi kubor Christian. Nyalai lebuh nya kamari bala berunding lalu deka ngadu rumah Lumbong Bundak ke udah runtuh laban jelu makup, tulang Bundak seduai Saban nyau betabur sebelah tanah. Nyadi jaku lebuh nya disetuju ka magang lalu utai ti diperundingka bakani tauka dini alai kitai ngiga duit kena ngaga utai nya. Dia bala mayuh nuduh Penghulu Garan enggau aku (TR.Sabai) berandau enggau YB. Datuk Peter Tinggom (Niang) ngiga fund kena gaga lumbong nya baru. Nyadi peminta nya kamari lalu disetuju ka Datuk Peter Tinggom digaga baru serta meri duit kira ungkus ngaga Lumbong nya. Ungkus ngaga tu suba tau disebut ka besai iya ukai semina ngaga langkau aja serta kami meli BATU PENGINGAT ari Kuching sesingkap ditulis nama Bundak enggau Saban dia. Udah ditemu semua ungkus penyampau belanja diberi Y.B. Datuk Peter Tinggom kami duai Penghulu Garan ngasuh Timban seduai Bajai ngaga iya datai ka nya tembu. Lepas nya suba kami agi ngeluas semua utai ditu nebas ngeranchun rumput enggau kayu ti besai-besai.

Nyalai 1st.September 2002 Timban seduai Bajai berengkah ngaga rumah lumbong nya. Udah tembu rumah lumbong kemari kitai lalu berunding ngasuh kaban kitai ditu Bujang Berani Mr. Jelemin anak Saguh (Niang) ngelumu sekeda tulang Bundak seduai Saban ti agi bisi ngachir ba tanah laban makup disimpan ngagai tajau. Semua pengawa nya diadu ka nitih atur adat Iban chukup enggau piring, enselan munuh babi siku berat 70 kati tambah manok siku. Sehari nya semua kitai ari empat buah rumah panjai tu dipinta sama datai ngulu pengawa tu Ng.Drau, Sebubu, Mapar, Sg.Engkabang dibai kia magang. Makai ngirup semua nya disedia ka begelumu ba bansal Rumah Pesaka Kaki Wong dia magang. Lepas nya kamari kitai gawa gutong ruyong ngaga panti semin ari baruh nyentuk ka atas kin nyadi duit kena meli semin begumpul ngena chara semeri nambah duit teda bebeli ka rachun kena machit rumput enggau meresi kubor dia. Udah nya kamari kami berunding mai urang mayuh meda pengemas antu pala ti udah dianjung kia ka.

Dulu menya Lumbong tu selalu alai urang nyabong disebut urang menya nyabong kai lumbong lalu sida mai piring lalu ngadu iya ti bisi jai serta nebas ke ngelingi ditu. Tu ingat aku lebuh maya kami ti agi bermit suba bisi sekali dua meda urang nyabong ditu lebuh Linggi seduai Ngabong ngelumu tulang Bundak ti tekusai kerumbak makup kelia. Lebuh nya mayuh mensia datai kitu baka ke begawai pengawa lebuh nya suba. Nyadi nyau dudi tu kamari kitai serumah bisi ngajung piring kitu lebuh maya gawai Dayak betuai ka niang aki John (Senin anak Umbol) begendang udah lepas miring ditu pulai ka rumah ngintu gawai. Iya nya apai TR. Gana ke diatu.

Kena 27th.June 2003 Jelemin, Jawa, Ricky Nelson, Dudum ngangkat Antu Pala 11 igi tu ari rumah panjai Ng. Drau serta ngemas nya ngagai langkau lumbong. Sida tiga iya nyangkah antu pala tu niti rumah panjai kami Drau nyentuk ka tengah laman lalu dientudika enggau gendang terus ka kubur enggai ka nya salah peninga rantu jalai. Utai nya jaku urang kelia tau pulai pemali ngagai kitai ti mai enggau mindah iya.

Penghulu Garan, Lr. Gana enggau aku empu madah ngagai kitai serumah deka mindah ka semua antu pala ditu ngagai langkau lumbong Bundak ti udah tembu gaga Timban seduai Bajai. Atur pengawa kitai deka ngena piring serta enselan mindah ka iya. Nyalai apin mindah ka nya suba aku dulu madah ngagai apai Mulok (Niang Empawi ak. Minggat) Antu Pala tu, deka dipindah ka begulai enggau Lumbong Bundak ba kubur Kaki Wong dia. Nyadi Empawi ngasuh serta setuju ka runding nya kamari enggai ka nya dibuai pia aja jemah ila nadai urang tentu deka ngintu iya. Laban meda kitai serumah tu semua udah masuk Kristain magang lalu mayuh pengawa urang ti tuai dulu kelia mansang abis nadai agi tentu dikingat ka nembiak rebak kemaya diatu. Nyalai sekumbang kitai tu agi ulih meda manah ga antu pala tu dianjung ka pendam. Tu jaku Empawi anak Minggat, sama waris urang ti ngibun antu pala tu suba. Kami mai urang mayuh meda pengemas antu pala ti udah dikereja kami disikap ka di pendam Kaki Wong ditu.

Nyalai kena 13th July 2003 kenyau ari pagi sehari tu kitai empat buah rumah tu sama sedia nganti pengabang ba station bus ditu. Sida YBs enggau semua bala mayuh teribit datai Penghulu Garan enggau YB. Datuk Peter Tinggom mai bala tuai-tuai kitai ditu serta YB. bukai niki ka atas ngagai Lumbong pagi nya. Awak ka sama meda gamal pengemas lumbong tu udah diadu baru. Ba Lumbong din aku bisi bejaku nerang ka naka pengawa ti udah dikereja ngagai urang mayuh ke datai dia.

Malam nya semua urang ti datai dibai ka rumah panjai kitai magang lalu diintu baka ti ngenta ka pengabang. Aku bisi bejaku ngari kai kitai serumah nerang ngagai urang mayuh malam nya naka utai ti udah gaga kitai lalu nusui kitai Drau tu agi nganjung antu ka pendam Burui Melupa dulu kelia apin kitai nganjung antu kitu. Nambah ka nya aku bisi nyebut ANTU PALA tu deka disikap ka baru awak ka iya manah agi alai ulih dipeda urang ti mansa menua Kaki Wong ditu jemah ila. Nyalai diatu kitai semua nemu Kaki Wong tu deka mayuh bansa urang mansa Loji Ai berengkah digaga ditu.

Dikingat serta dikarang Ex. Cikgu TR. Sabai ak. Kadam