Pemuka jaku

Ligam bebini ngambi Riah, beranakka Padang. Padang angkat ari Sebaru Kalimantan, Indonesia pindah ka Rimbas. Dalam cherita ka ditusui urang ka tuai, Padang tu ngetu ba mayuh bengkah menua sebedau ngentapka diri di Rimbas. Peturun Padang, rebak Baat enggau anak iya Munan matak bala pindah ka Batang Melupa, pati ai Krian. Sida berumah ba menua ka dikumbai Nanga Meramuh, Ulu Melupa. Maya tu kelia, tuai ka ngiring bala benama Orang Kaya Temenggung Tandok. Rebak tu kelia, menua agi charut, mensia agi bebalas-balas bebunuh enggau bekayau pangan diri. Rumah sida, disebut kitai diatu "Tembawai Alah" dialah, lalu ditunu bala Balau ka datai ari Banting. Sida pepar mindah ngiga pendiau baru sepemanjai Batang Krian. Raban Beti, Jabas, Manju, Changgas, Gila enggau Chuk pindah ka Krian Tengah. Peturun sida ngentap ka diri di Nanga Drau, pati Kiba ai Krian berumah ba Tembawai Masing...

Lalu meh ngagai rumah panjai kami

Friday, October 31, 2008

Kenang Pemansang di Sungai Engkelili

Mua ari ili pengkalan Lunching, ari kanan mudik ai Krian bisi siti tempat ka dikumbai Sungai Engkelili. Dulu kelia menua tu seruran endur bala anembiak bemain ketegal ka semak bendar enggau pendai endur mandi. Ai krian ba Nanga Sungai Engkelili nyamai bendar endur bemain laban ai ba senentang tu lansar lalu bekerangan. Ari ili mimit nanga sungai Engkelili bisi dua iti lubuk dikumbai lubuk Pituh Bejait enggau Lubuk Labang.

Nadai mayuh bala anembiak ka rebak baru bisi nemu, tauka bisi ditusui pengawa ti kala bisi nyadi ba awak endur tu kelia. Taja pia, sida nyangka bisi berunding ka bekau ka agi bisi dia, mandangka pengawa bisi udah kala dikereja urang ka tuai menya. Siti ari bekau ka disebut aku nya tadi ianya sekeda ari tangga batu (semin) meruan ulih dipeda nyentuk ka saritu.

Ditu aku deka nampung cherita ka ditulis Mr. Liman Numpang, District Officer di Saratok ka dulu suba, ka endang ada di Nanga Drau ditu bekaul enggau pengawa sida ka tuai menya di Sungai Engkelili. Cherita tu bisi diubah aku mimit, ngambi iya ka bisi besangkut paut enggau pengawa ba sungai Engkelili enggau menua Kaki Wong ditu.

(Niang) Mr John Kennedy Wilson tauka Tuan Tuai

Pengawa di sungai Engkelili bepun ari runding siku urang putih ka benama John Kennedy Wilson tauka Tuan Tuai ka numbuh siti komiti, dikumbai ‘Komiti Pemansang Raban Bansa’ di Budu tauka Budu Community Development. Kaban komiti pemansang tu diambi ari sekeda bala Tuai Rumah kandang Krian Ulu, Budu, Kabo, Babang enggau Kaki Wong. Komiti ka ditumbuhka tu, meri penyanding penemu sereta nyukung pengawa ti dipejalaika Budu Pemansang Raban Bansa.

Kena ngerembaika atur pemansang, baka pengawa sekula, pengawa dagang, pengawa pengerai (opis perubat) enggau pengawa betanam betupi, bala komiti ka udah dipaduka tu ngansak Mr. JK Wilson tu ngerembai ka pengawa di Budu ngagai endur bukai baka Nanga Budu, Nanga Gerenjang enggau Kaki Wong. Penemu raban komiti tu tadi diterima Mr. JK Wilson, asal sida sanggup ngiga tanah ba menua diri empu endur nudukka pengawa. Ba tiap iti tempat ka disebut aku diatas nya tadi endang bisi urang dipaduka ngiga tanah tu, lalu di Kaki Wong tu pengawa tu dipejalaika Empa ak. Anyum seduai Numpang ak. Abang. Ari setuju bala mayuh, Empa seduai Numpang bulih tanah di nanga sungai Engkelili endur nudukka pengawa gerempung.

Urang ti bempu tanah ba Sungai Engkelili besetuju nyerahka tanah, lalu dibai betemu enggau District Officer di Saratok. Iya besain surat ka tanda setuju nyerahka tanah ngagai Komiti Pemansang Raban Bansa, dipasukka dalam gazzete lalu dikumbai tanah Native Communal Reserve. Retinya tanah tu tadi nyadi tanah simpan ka guna kunsi mensia mayuh dalam kandang menua nya.

Di sungai Engkelili tu, komiti ti nguasa pengawa dikumbai Komiti Kandang Engkelili Pemansang Raban Bansa. Komiti tu nguasa lalu ngemataka pengawa pemansang raban bansa di sungai Engkelili lalu nadai bekaul enggau pengawa politik tauka komiti rumah panjai. Semua rumah panjai ari Krangan Rusa, Babang, Praja, Sebubu, Mapar, Sungai Engkabang, Drau enggau Nanga Drau sama bempuka pengawa ba sungai Engkelili. Tiap-tiap Tuai Rumah ari rumah panjai nya nyadi kaban komiti, lalu Cr. Numpang ak. Abang dipaduka nyadi Chairman. Pengawa ti ditumbuhka dia maya nya menya baka rumah sekula,Dispensary, Opis Betanam Betupi enggau kedai Gerempung Kereja Sama. Pengawa di sungai Engkelili tu dikemata perintah ari opis Gerempung Kereja Sama Sarawak.

(Niang) Mr. Arthur Thwaites (Tuan Manang) maya iya ka agi idup suba selalu nemuai ka Nanga Drau. Taja pan udah lama ninggalka menua Sarawak, Tuan Manang tu agi landik bendar bejaku Iban. Dua iku agi urang putih ka sama nulung pengawa JK Wilson ianya Mr. Thomas McBride (Apai Tam) enggau Dr. Ronald Lees (Tuan Ragum).

Lebuh maya nya suba sekula di Nanga Drau semina dikemendarka perintah ngajar ari primary 1 ngagai primary empat aja. Sekula di sungai Engkelili dikemendarka ngajar ari primary lima ngagai primary enam. Lebuh perintah muka kelas primary lima enggau primary enam di Nanga Drau, dia sekula di sungai Engkelili lalu ditutup. Semua anembiak dalam kandang Kaki Wong besekula ngagai Nanga Drau nembuka pelajar primary enam.

Sekumbang kedai gerempung Kereja Sama dibuka di sungai Engkelili, dia kedai tu bejalai enggau lanchar sereta maju. Nitihka singkang pemansang dunya kemaya hari tu dia kedai gerempung enggau rumah berubat di sungai Engkelili enggau kedai sereta rumah berubat di pasar Kaki Wong kena kelaung jalai raya, ngujungka nadai mayuh urang agi datai kia. Tang tu ukai reti Kedai Gerempung Kerja Sama di sungai Engkelili nya bangkrap. Sebagi duit puko mensia mayuh agi dipegai Opis Gerempung Kereja Sama di Kuching.

Siti ari tuju Gerempung Pemansang Raban Bansa munyi ka disebut dulu tadi iya nya kena ngajar urang betanam betupi, numbuhka kebun getah kawin laban maya tu menya mensia ka nguan Batang Krian apin sampal nanam getah. Tanah di sungai Engkelili bisi pemesai lebih kurang tujuh ekar, lalu nebing belakang rumah nya ditanam getah kawin chunto. Diatu, semua rumah ba sungai Engkelili, ketegal ka nadai urang meruan nyaga tauka ngintu, nyau nadai agi tau diguna. Tang taja pia, kebun getah kawin agi meruan lalu tau ditangkal.
____________________________________________
Kena ngujungka jaku, aku meri besai terima kasih ngagai Mr. Liman Numpang (Apai Scott) ka udah meri pemendar ngagai aku ngemansut ka cherita iya, pasal pemansang ka diaduka Mr. JK Wilson di sepemanjai Batang Krian, ari Budu ngili ai Krian ngagai Kaki Wong ditu ba majalah sekula kami taun 2005. Cherita tu dipansutka aku baru ditu ngambika iya ulih nyadika pengingat enggau penemu bala anembiak rebak baru ka kemaya haritu.

Saturday, October 11, 2008

Pengerami Muka St. Jerome's Chapel (13 Disember 1977)

Pendam Alik seduai Gambang ba puting jematan Kaki Wong mandangka pengarap Kristian udah lama ngerembai ba menua tu. Sekeda bala bukai ka bisi besekula enggau belajar pengawa pengarap enggau urang putih menya, Megong ak. Gambang. Taja pia, pengawa tu enda dikemansangka lalu lebuh maya tu menya mimit bendar urang ti mereti ka pengawa pengarap.

Taja pia, pengerembai pengawa sekula serta kaul enggau gereja St. Peter’s di Saratok nambahka penyampau rayat menua tu masuk pengarap Kristian lalu bejalaika pengawa sembiang. Lebuh maya tu menya, bala ka besembiang hari minggu deka nurun ka gereja St. Peter’s di Saratok.

Ke dudi hari tu kemari penyampau rayat menua tu, ari Nanga Drau, Sungai Engkabang, Sebubu, Mapar, Babang, Kawang Atas enggau Empelas nyau semakin betambah. Nya alai, gereja St. Peter’s di Saratok maduka dua iku bala menua tu empu nguluka pengawa besembiang, ianya LR Gana ak. Senin enggau LR Illai ak. Sagat.

Pengawa besembiang dipejalaika tiap-tiap minggu. Taja pia, penanggul agi bisi ketegal ka nadai rumah sembiang. LR Gana enggau LR Illai nguluka bala besembiang ba rumah panjai. Bala Paderi ari gereja St. Peter’s di Saratok baka Fr. Unggin mega selalu datai ngundang, ngulu ka raban Kristian menua tu besembiang hari Minggu.

Ketegal ari pemansang pengarap Kristian ba kelingi menua tu, gereja St. Peter’s di Saratok mantu, ngumpul ‘fund’ dikena nirika rumah sembiang. Pengawa ka niri rumah sembiang tu mega bepun ari penalam runding enggau pengangkun sida ka tuai ba pengarap Kristian tu. St. Jerome’s Chapel didirika lalu dipenyadika siku paderi urang putih benama Bishop House kena 13 Disember 1977.

Ketegal ka udah bisi rumah sembiang diri empu, rayat menua tu enda ibuh agi nurun besembiang ka pasar Saratok, ba gereja St. Peter’s. Tambah mega, munyi ka udah disebut diatas dia tadi, rumah sembiang tu seruran diundang paderi ari Saratok, lalu mega bisi urang ti dipaduka ngintu lalu ngiring pengawa ditu.

Penyampau urang ka masuk Kristian mega betambah tiap-tiap taun. Nya alai, kemaya haritu bala raban sida ka tuai ngulu bala anembiak redak sida ngatur pengawa ba gereja. Siti ari pemansang ka baru nyadi, ianya St. Jerome’s Hall ka nyadi siti ari palan endur begelumu tiap kali ka bisi pengawa diatur ditu.

Wednesday, October 1, 2008

Kaul Enggau Bala Cina, Melayu

Kaul enggau bala Melayu, Cina di Menua Drau udah nyadi kenyau ari kelia menya. Tu sekeda ari cherita ngenang kaul rayat menua Kaki Wong, kelebih agi menua Drau enggau bala Melayu, Cina ka datai ari ili.

Bala Melayu kala numbuh ka siti Kampung Melayu ba urung menua Kaki Wong dikumbai urang suba Kampung Lengki. Tanah temuda ba Tanjung Gagam menya kala diempu siku Melayu benama Mahmud. Kelimpah ari nya, Siku agi Melayu benama Haji Bujang Kabi, kala ngambu bempu tanah tebing ai Krian nyentuk ka Tanjung Gagam. Pengawa seduai tu, numbuhka penyarut laban kitai Iban ngasaika menua tunga keulu tu dipangkang bansa kitai, lalu ngetan ka tanah ngambi ka enda pulai ngagai bansa bukai. Penyarut nyadi antara kitai Iban benama Jambu enggau Hj. Bujang Kabi. Penyarut seduai tu dipadanka ngena jalai chara (Pechara). Kena mutuska penyarut tu tadi, bala mayuh besetuju ngena jalai ‘bebunuh babi’. Bangkai babi diperanyutka ngili ai Krian. Endur bangkai babi nya tadi tepanggai deka dikena jadika antara, menua diempu Melayu enggau Iban. Bangkai babi ka diperanyut tadi, tepanggai ba siti endur ka disebut Batu Ampar, Sepu. Belabuh ari tu, menua Sepu keili diempu bala Melayu, lalu mua kaulu diempu bala Iban.

Penyarut enggau bagi menua antara kitai Iban enggau Melayu enda kala nanggul kaul kitai enggau sida. Bala Melayu Saratok enggau Kabong suah mendam di Nanga Drau, enggau urang bumai, bekebun, nangkal getah, berikan enggau bedagang. Siku Melayu benama Abang Ganggo lama bendar mendam belangkau di Sungai Pelanduk. Abang Ganggo tu ngidup ka diri ngena jalai berikan. Siku agi Melayu benama Jupit (nama sebut kitai Iban), bejalai ka pengawa bumai ba Tembawai Baruh. Nyentuk ngagai pun taun 80 lebih, sida Usop menyanak-nyanak diau betaun-taun ba tanah sida Niang Ex. TR Gawan bejalai ka pengawa betanam betupi. Suah bendar kitai meda bala Melayu menyanak-nyanak datai nepat pangan sida ba rumah panjai. Sekeda nya diau beminggu-minggu bekuli tauka nulung gawa.

Bala Melayu ari Kabong, suah datai bedaja ngena perau mai garam, gula, ikan masin, ikan salai, belacan, rumpung, budu, bubuk, senik, tesar,empedi enggau bansa-bansa pemakai enggau kuih Melayu. Garam, Gula, Bubuk, senik, budu enggau sekeda pemakai ka bukai dibai ngena udat. Barang tu dijual ngena sukat tin (jarang urang ngena jalai timbang). Sebedau mensia tentu nemu ngena duit, barang ka dibai bala Melayu ditukar ngena padi tauka beras. Ngambika chunto, seudat budu ditukar ngena dua pasu padi. Bala Melayu mega beguna bendar ka buah, baka buah temedak ti dikenadaika sida di menua ili. Nya alai, kadang-kadang barang ka dibai nya tadi dipetukarka ngena buah. Bala menua tu menya suah bepesan ngasuh pangan Melayu sida mai barang ti dipeguna ari ili tauka pasar. Sekeda barang nya diberi ngagai urang ka endur sida bemalam.

Sekeda nama bala Melayu ka suah bendar datai bedagang kitu maya tu menya benama Adir, Man enggau Haji Derasin. Sida suah ngetu dua tiga hari ba Nanga Drau, sebedau nampung pejalai bedagang ngagai ulu ai Krian baka Kabo enggau Budu. Pengkalan Tembawai Tinting, Nanga Drau, Lunching, Kaki Wong kelia teleba bendar nyadi ka penyangkai perau bala Melayu ka datai bedagang ari ili.

Penatai bala Cina ngagai menua tu, jauh lebih dudi ari bala Melayu. Taja pia bala Cina mega sama bela nanggam kaul enggau bala menua tu. Siku Cina benama Kinsing (nama sebut kitai Iban), suah bendar datai bedagang ngena perau lalu bemalam di Nanga Drau. Kinsing enda datai kediri aja, tang bebaika bini anak. Iya mai barang-barang pemakai ka diguna urang rumah panjai baka garam, gula, bilis enggau pusu. Suah bendar Kinsing tu pereman beminggu-minggu ba rumah panjai tu. Nitihka cherita ka ditusui urang ka tuai, Kinsing datai nepat bilik pangan iya baka ka nepat bilik diri empu. Iya nadai sanggu tama lalu ngintu diri dia tajapan sida ka bempu bilik nadai di rumah. Datai maya iya deka mulaika diri ka pasar Saratok, iya ninggalka barang pemakai enggau utai bukai ka sida ka bempu bilik nya tadi.

Bisi mega bala Cina datai bedaja barang ngena perau, dikumbai bala menua tu ‘Cina Belampu’. Sida bedagang, lalu diau dalam perau beminggu-minggu tauka bebulan-bulan nyentukka barang ka dijual sida abis. Kelimpah ari ka bejual barang, bala ‘Cina Belampu’ tu mega meli asil ari urang ka kelingi menua tu ditu baka getah enggau lada. Sida tu bekelala enggau tiap iku urang menua tu, lalu mega deka endur berutang. ‘Cina Belampu’ tu bepalan ba pengkalan di Nanga Drau tauka ba pengkalan Tembawai Baruh. Sekeda ari nama Cina ka belampu ba menua tu ianya Ah Chee, Ee Tay, Ah Yong, U Teng, Ah Seng, Ajang, Ah Chin enggau Ah Pau. (nama disebut Iban menua tu). Ketegal laban pengelama ka udah bedagang di menua tu, sekeda ari bala Cina tu rapat bendar kaul enggau rayat menua tu. Dua iku ari sida nya, ianya Ah Seng enggau Ajang bebini ngambi indu menua tu empu.

*Pengawa Cina ka belampu tu ngujung ka perintah besetuju numbuhka pasar ba menua tu, ianya Pasar Kaki Wong.