Danggat seduai Unggat datai kitu bedagang ari menua sida di Batang Empanang Kalimantan Indonesia. Perengka ti dibai seduai kitu iya nya baka ngepan pekayan Iban dulu kelia. Iya nya baka sagin tinchin, gelik, rawai, tumpa digaga ari temaga magang. Danggat anak Kapat tu petungal Unggat ukai menyadi iya. Seduai tu urang Embaloh bisi pengelandik betempa begaga ka ngepan urang indu ari temaga.
------------
Nyau ka suah seduai iya ti pulai mansang datai ari nyin seduai iya lalu ngaga langkau ka diri empu diau ditu kai alai betempa begaga ka temaga nya. Langkau seduai ba atas nanga Sungai Pelandok lalu pindah ba Wong Unggat nya diatu. Nyau kelama udah nya menya Danggat anak Kapat tu bebini ngambi Sudan anak Nambi seduai Serai. Nyalai nyepi diri nya udah bebini ditu Danggat nadai ati pulai agi, tang Unggat mulai ka diri ngagai menua sida Memaloh di Batang Empanang Kelimantan Indonesia.
------------
Seduai tu endang Memaloh ti datai ka Sarawak kitu bedagang bejual macham ngepan urang ti dulu kelia. Pekayan Iban baka tinchin sagin tumpa rawai enggau macham utai bukai ti digaga ari temaga sigi endang benong dikena urang rambau tu kelia. Diau di menua kitai ditu Danggat seduai Unggat tu, nyau nadai sanggu agi udah teleba begulai enggau kitai Iban. Semua urang udah sampal nemu pengawa seduai iya magang. Urang mayuh balat bendar ngasuh seduai iya ngaga rawai gelik tinchin sagin. Nyadi macham barang ti digaga seduai nya tadi laku bendar rebak nya kelia. Macham utai ti digaga seduai dia dijual ditukar enggau beras manok lalu bisi mega dibeli urang ngena duit.
------------
Temaga ti ditempa dilela seduai iya dia bisi sekeda endang dibai ari menua sida empu ari nyin lalu sekeda nya bisi ulih bagih enggau urang repik – repik temaga ke dianjung urang kia. Temaga tu diberesi digaga nitih ka utai ti deka diguna urang lalu seduai iya semina ngambi upah. Urang bukai kitai menua tu bisi sama nemu betempa nitih ka pengawa seduai iya laban perengka ke baka nya kelia benong di kerindu ka kitai Iban bendar laban apin bisi orang bekena ka barang mas. Baka rawai tinchin sagin gelik enti kitai kurang pemeli rambau nya kelia nadai ngena iya. Nya ngepan urang ke indu dulu kelia.
------------
Nyalai mayuh urang berebut-rebut ngasuh seduai iya ngaga utai nya di menua kitai ditu. Rambau nya kelia mensia nadai tentu mayuh udah nguan menua kitai Drau ditu. Ka ili Krian kia diuan bansa Seru enggau raban bala Melayu tauka Laut ku kitai diatu. Danggat nyau ati ngentap ka diri enda pulai ka menua sida iya empu ka Empanang Kalimantan Indonesia. Danggat tu bebini ngambi Sudan beranak ka Sendi, Bajut, Liman, Anyum, Enjan, Sendai enggau Baring . Danggat ngaku diri enda pulai kin agi lalu nyadi Iban. Udah nya kemari bisi apai iya datai deka ngambi seduai iya. Apai iya ke benama Kapat datai ari menua Kapuas nyin ngiga Unggat seduai Danggat deka mai seduai iya pulai ka Batang Empanang Indonesia.
-------------
Nyalai meda nya Danggat tu udah entap bebini beranak di Drau ditu apai iya Kapat nadai jaku nagang iya. Apai iya ngajar iya anang enda begulai enggau urang manah-manah lalu ngintu bini anak diri empu baka urang mayuh di menua tu. Unggat di bai apai iya pulai ka menua sida iya empu di Memaloh din. Danggat tu lalu tinggal ditu enda pulai agi. Udah nya kelia bisi sekali dua apai iya ngundang sida iya kitu. Iya chukup gaga meda bala uchu iya lalu udah mega meda ichit. Danggat nyau ngaku diri nyadi Iban tang baka nya bisi ga iya sekali dua nemuai ngagai sida apai indai iya di Batang Empanang kin.
--------------
Nemuai ngagai menua sida iya kin ukai semak bejalai kaki. Iya mati leboh sida berumah ba jalai pendai kitai ke diatu. Peturun uchu-ichit iya agi mengkang meruan di menua tu tang kitai ukai nyebut diri purih Memaloh. Diatu nya kebuah kitai ngumbai lansar wong ti ari ili Nanga Drau nya Wong Unggat laban nya pendai Danggat seduai Unggat leboh sida ke belangkau dia kelia. Lebuh tu kelia Tembawai Sungai Pelandok tu rumah panjai urang. Nyadi langkau Unggat seduai Danggat ba nanga Sungai Pelandok nya dia. Danggat jadi enggau Sudan lalu berumah tangga baka kitai mayuh di menua tu mih ga.
-------------
Tusut sida tu baka tu,Isut bebini ngambi Gandu beranak ka Nambi, Nambi bebini ngambi Serai beranak tiga iku iya nya Sudan, Achan, enggau Itau. Sudan belaki ngambi Danggat beranak ka sida tu Sendi, Anyum, Bajut, Enjan, Liman, Baring enggau Sendai. Ayum bebini Lindan beranak Nambi, Ungga, Gundi, Jelani, Empa, Rambok, Chandu, Katak. Sendi belaki ngambi Gambang beranak ka Megong, Jelemin, Bajai, enggau Lenguti. Bajut bebini ngambi Endek beranak ka Serai, Dandok, Edah enggau Tutih. Baring bebini ngambi Duri beranak ka Ruka belaki ngambi Loo beranak ka Kho, Uting enggau Awat Oh Tee.
-------------
Mati Duri Baring bebini baru ngambi Banat beranak ka Gimang (entua Bauk). Nyalai diatu kitai nyebut Wong Unggat dia pendai Unggat seduai Danggat dulu kelia. Nya mih penatai dama Wong Unggat. Dama tu endang bepun ari dulu menya agi idup seduai iya ti nguan engkalan nya suba. Sida ke belangkau dia menya apin datai Tuan Rajah James Brooke ke merintah menua Sarawak tu. Unggat pulai ka menua sida iya empu di Batang Empanang Kalimantan Indonesia kin.Tang nama iya agi kena kitai nyebut nama Wong nya diatu. Kitai nyebut nama menua endang bepun ari bisi kebuah enggau pengawa ti jadi ba senentang alai nya. Iya nya baka aku ke nusoi nama kebuah kitai ke nyebut Wong Unggat diatu.
-------------
Cherita dikarang Ex-TR Sabai ak. Kadam
