Pemuka jaku

Ligam bebini ngambi Riah, beranakka Padang. Padang angkat ari Sebaru Kalimantan, Indonesia pindah ka Rimbas. Dalam cherita ka ditusui urang ka tuai, Padang tu ngetu ba mayuh bengkah menua sebedau ngentapka diri di Rimbas. Peturun Padang, rebak Baat enggau anak iya Munan matak bala pindah ka Batang Melupa, pati ai Krian. Sida berumah ba menua ka dikumbai Nanga Meramuh, Ulu Melupa. Maya tu kelia, tuai ka ngiring bala benama Orang Kaya Temenggung Tandok. Rebak tu kelia, menua agi charut, mensia agi bebalas-balas bebunuh enggau bekayau pangan diri. Rumah sida, disebut kitai diatu "Tembawai Alah" dialah, lalu ditunu bala Balau ka datai ari Banting. Sida pepar mindah ngiga pendiau baru sepemanjai Batang Krian. Raban Beti, Jabas, Manju, Changgas, Gila enggau Chuk pindah ka Krian Tengah. Peturun sida ngentap ka diri di Nanga Drau, pati Kiba ai Krian berumah ba Tembawai Masing...

Lalu meh ngagai rumah panjai kami

Friday, June 27, 2008

Lanji

Lanji dikena urang ngangkut padi ari umai nuju ka rumah panjai. Lanji lebih besai sereta panjai agi ari agak tauka belitung. Lanji ka tinggi kadang-kadang nyau ka sebela enggau kitai bediri. Urang kelia beguna ka lanji besai sereta panjai ngulihka padi mayuh agi ulih diangkut.

Saturday, June 21, 2008

Tibang

Kemaya hari tu, nadai mayuh agi kitai rumah panjai ngemeran ka pengawa bumai. Enti bisi pan, iya enda dikereja baka ka dulu kelia. Urang bumai semadi kena ngidup ka leka benih. Sekeda ka agi bumai nyau ngalih ka menua ili bumai paya.
Urang kemaya hari tu deka agi ngereja pengawa bukai, baka ka nangkal getah tauka bekuli. Getah besai amat rega lalu enggau jalai bekuli duit diterima jampat. Beras ulih dibeli ba kedai Cina. Taja pan rega beras jauh amat udah niki, tang duit ulih nangkal enggau kerja bekuli mega besai. Nya alai mensia kemaya hari tu mudah agi meli beras di pasar dibanding ka pengiruh enti sida bumai.
Tibang enggau pekekas bumai ka bukai nyau nyadi cherita lama (History) dalam pengidup kitai. Mayuh anembiak baru diatu enda nemu utai tu agi bisi ba rumah panjai sida. Sekeda sida endang enda nemu utai ka benama Tibang enggau reti guna iya.
*Tibang tu digaga ari kulit kayu. Tibang dikena urang tuai dulu suba endur nyimpan padi. Urang ka mayuh padi, ngembuan Tibang ka besai agi. Tibang deka penuh laban padi kelebih agi maya udah badu ngetau. Beras disimpan dalam Tibang dalam pengelama lebih kurang setaun, laban taun siti agi sida deka bulih padi baru.
Tibang dalam gambar tu disimpan ba sadau gantung di rumah panjai Nanga Drau. Diatu, sadau rumah panjai nyau udah bekena ka dik. Nya alai sida ka anembiak nadai ulih meda Tibang ba sadau gantung din.

Friday, June 20, 2008

Kelita Temaga


Sebedau bisi enjin api enggau api elektrik, penerang malam hari ba rumah panjai begantung ba kelita. Lampu gas dipasang semina maya bisi pengawa ba rumah panjai, tauka maya ka bisi temuai. Nya alai, sepemanjai rumah panjai kitai ulih meda senawah api kelita bakapeli malam lebuh hari.
Kelita endang udah dikena kitai Iban ari kelia menya. Bansa kelita ka mayuh dikena urang ari kelia ianya kelita tin ka mit, ulih meli ari pasar. Bisi mega kitai Iban nemu ngaga kelita ka diri empu ari tin tusu enggau tin milo ka mit. Kelita ka pengabis manah dikena kitai di rumah panjai maya tu suba digaga ari temaga (Gambar di atas).
Pun lemai, sebedau hari petang sida ka tuai belabuh beisi ka gas ngagai kelita. Sekeda sida kiruh nganti sumbu kelita ka udah jai. Lebuh hari nyau makin petang kelita belabuh ditungkun di bilik enggau di ruai. Pengingat aku, tiap-tiap ruang dalam bilik, belabuh ari dapur nyentuk ka ruai endang disediaka enggau siti kelita. Chukup jam, maya lemai hari kitai ulih meda mensia terudus beanjungka kelita ka ruai diri empu. Ruai enda tau petang. Nya alai endang udah adat ba rumah panjai, ruai enda tau enda ditungkun ka api.
Di rumah panjai jam maya tinduk enda sebaka enggau di nengeri. Kebuah iya pia, nadai tentu pemerindang lebuh ka malam hari. Nya alai sida deka tumu bendar deka ngenat ka diri di bilik ngambika ulih tumu angkat pagi siti. Pukul 9.00 malam, nyau ka semua ruai udah petang magang. Bala ti mulai ka diri ka bilik sama bela minching kelita pulai ka bilik.
Di rumah panjai mega, jarang bendar kitai meda urang tinduk enda beapi. Kelita dipasang enda tentu jauh ari endur ka tinduk. Enti api kelita padam dipuput ka ribut, dibintih indu utai tauka abis gas, sida deka beguai ngadu lalu nungkun iya baru. Pengingat aku ba rumah panjai kami di Nanga Drau ditu, lubang idung selalu chelum laban asap kelita maya ka dani pagi. Kadang-kadang kibung pan chelum laban ka kena asap kelita tiap-tiap malam.
Enjin api belabuh dikena ba rumah panjai tu lebih kurang dalam 28 tahun ka udah lalu. Enjin api ngena minyak diesel dipasang tiap-tiap malam ari pukul 7.00 ngagai pukul 9.00 malam. Lepas pukul 9.00 enjin api deka dipadam baru. Nya alai, taja pan udah bisi enjin api, kelita agi beguna bendar. Iya dipasang kena tinduk nyentuk ka pagi. Maya enjin ka rusak, tauka maya enjin ka nadai minyak kelita deka dikena baka selama.
Tengan tahun 1990-an , api SESCO belabuh disambung ngagai rumah panjai tu. Belabuh ari maya tu, mensia nyau nadai tentu bekena ka kelita agi. Kebuah iya pia laban api elektrik nyau bisi 24 jam.
Diatu kelita nadai agi dikena urang ba rumah panjai. Jarang amat kitai bisi meda urang nyimpan kelita tin ka mayuh bendar dikena dulu suba. Kelita temaga diatu disimpan dalam jemari tauka kena ngerias bilik aja. Sangka aku, mayuh bendar anembiak rumah panjai ka ada kemaya haritu enda kala meda kelita, lalu enda terunding ka jalai ngena iya.

Friday, June 13, 2008

Ipang

Sebedau bisi ai paip dikena ba rumah panjai, urang nyauk ai ka sungai. Ai ka disauk nya tadi, kelebih agi kena berapi tauka ka irup. Maya tu suba kibut tauka tong plastik (mayuh saiz) digaga ka tali lalu di ma ba belakang. Kibut plastik tu dikena urang nyauk ka sungai. (Dulu agi ari nya, urang ngena kerubung buah labu, kena nyauk ai enggau endur nyimpan ai).
Pengawa nyauk ai tu ukai semina dikereja sida ka indu aja. Bala urang ka lelaki enggau sida ka anembiak mega sama bela minching tauka ngema kibut lebuh maya ka nyauk tauka mandi ka sungai. Urang ka tuai deka nganu sida ka anembiak enti enda minching kibut, laban takut ka nadai chukup ai dikena di rumah.
Lebuh maya bisi pengerami baka gawai, tauka pengawa bukai di rumah panjai, kitai ulih meda bala ka nyauk terudus mansa nengah empuan. Nya alai jarang bendar kitai meda empuan rangkai, laban iya seruran ditengah bala ka mandi enggau nyauk ai ari sungai.
Di rumah, ba endur ka disebut 'Las Ai' antara bilik besai enggau dapur penuh laban kibut enggau ipang kena nyimpan ai. Ipang tu ulih meli ari kedai. Asal ipang endur urang ngengkah ka telu, ka dijual ba kedai Cina. Kitai Iban dulu suba beguna bendar ka ipang laban iya besai endur nyimpan ai.
Diatu nadai mayuh agi urang bisi ngembuan ipang. Enti bisi pan, iya enda dikena agi. Sekeda urang kemaya hari tu ngena ipang kena nimbun ai ujan. Iya beguna bendar kelebih agi lebuh maya ai paip ka rusak. Sementara nganti paip ka manah baru, bala di rumah panjai ulih nyimpan ai dalam ipang sida.

Thursday, June 5, 2008

Beramu Kena Berumah

Dalam pengelama sepuluh taun anggur deka berumah baru, kelimpah ari berunding ka endur berumah, urang ka tuai belabuh begiga ramu. Tiang, sanding, gelegar, atap, dinding enggau utai bukai enda tau enda disediaka dulu sebedau rumah bediri.

Pengawa ngiga ramu ukai utai mudah dikereja. Siti ari penusah sida ke tuai maya tu menya, sida nadai pekekas baka kemaya hari tu ngereja kayu. Retinya semua utai begantung ba tulang enggau pengeras ati. Kedua iya, menua tu nadai tentu mayuh kayu kering. Sida ka tuai enda ulih enda bejalai jauh, ngagai menua bukai beramu ka kayu kering. Sida bedarat nengah babas puang, neresa paya, nanjak bukit, nyemerai sungai sebedau datai ngagai kampung endur beramu enggau beban ramu.

Udah bulih ramu, sida deka ngangkut ramu pulai ka Drau. Sekali agi sida nyabung pengering tulang enggau pengeras ati. Enti tulang enda kering lalu ati enda keras berumah, pengawa baka tu enda ulih dikereja. Sida besaup ngesan. Sida besaup narit, ngiling, neruju enggau munggah ngagai perau. Pejalai pan ukai nya semak. Sida ngangkut ramu ari Kabo, Kerangan enggau Kawit.
Minggat ak. Changgas enggau Numpang ak. Abang terubah beramu ka Kawit. Udah nya seduai mai bala bukai baka Sabang ak. Empiu, Gundi, Untol enggau Gimang beramu ka Kerangan. Maya tu kelia kayu teras agi mayuh. Urang ka bempu menua nadai nagang bala ka ngambi ramu. Nya alai sida ka tuai menya, taja pan datai jauh, sida nadai penanggul bulih ramu kena berumah. Sida tau ngambi ni naka pemayuh ramu ba endur siti-siti. Sabang, Minggat, Numpang, Rambok enggau Impa endang beberita kering ati enggau kering tulang ngereja pengawa beramu. Nitih ka cherita urang ka tuai, enti tiang naka 8 inci segi empat pemesai agi kelalu lempung ba sida tu.

Enti enda teulih ka ramu diri empu, sida ngupah urang bukai beramu, lalu ngaga ramu ka sida. Nambi ak. Anyum ngupah siku urang benama Timbang ari Klua ngaga 12 batang tiang (Pemesai 6 inci, pemanjai 3 depa). Maya tu menya upah urang beban tiang agi murah. Nambi mayar Timbang $2.00 ka sebatang tiang. Ukai semina gaji nebang enggau beban aja, laban Timbang ngangkut lalu nganjung tiang nya datai ka Nanga Drau.

Enda chukup beramu di Kawit enggau di Kerangan, sida mudik Batang Kabo ka Nanga Ijan, Rantau Kechala enggau Lubok Kudi. Di Kabo, Nambi, Gundi enggau Jelani bulih tiang 7 ngagai 8 inci pemesai, lalu 3 ngagai 4 inci pemanjai. Kelimpah ari beramu ka tiang, sida mega ngaga atap. Sida beban atap teras ba Nanga Limat, Kabo.

Munyi ka udah disebut aku di atas nya tadi, pemedis pengawa beramu tu menya ukai semina senentang ka nebang enggau beban. Iya ka pedis agi nya ngangkut tiang enggau ramu bukai pulai ka Nanga Drau. Kelimpah ari jauh (Kabo, Kawit enggau Kerangan), tiang enggau ramu besai ulih sida endang teras magang, lalu berat bendar dibai.

Taja pan jauh enggau berat, pengawa berangkut ulih dikereja. Semua urang rindu besukung betulung enggau pangan diri. Sida ka anembiak ransing ati mandang ka pengering tulang. Sida ngesan ramu ari kampung endur beramu ka sungai. Ari sungai ramu nya ditarit tauka diundan ngena perau besai nuju ka Nanga Drau.

Nitih ka cherita aki, pengawa ka ngangkat enggau ngengkah ka ramu enda tau enda sereta. Sida enda tau beteju ka pangan diri. Uyu tauka Aki Kiley nya siku ari urang ka besai endar nyawa ngerah bala sida ka anembiak berangkut. “Bah..bah..bah, angkat kitai” ku iya. Bala sida ka anembiak lalu sama ngangkat ka ramu ka disan sida. Bakanya mega enti maya ka bisi penanggul, baka maya kaki telinchir, kaki terunjam, besalah urat iya lalu ngerah sida ka anembiak enda ngasuh ngelengka ka ramu seneka ati.

Mayuh chara dikena sida ngangkut ramu. Lebuh ka nengah menua bebukit, sekeda bala diasuh ngesan, lalu sekeda agi narit tiang ngena tali ari atas bukit. Sida enda tau enda ngena tali narit ari atas laban enggai ka tiang nya merurut ka belakang. Maya ka nurun bukit, tiang deka diulurka belubah-lubah ngena tali, tauka enti sida ngesan tiang nurun bukit, tali mesti ditan enggai ka sida telasur ka lebak. Lebuh ka nengah tanah luchak, kaki tengelam ngampuhka buku ali, tang ramu sigi enda dilengka.

Bala ka enggau ngesan enda tau ngelengka ka ramu seneka ati, taja pan sida benung pedis, tauka lelak enggau enda tan agi. Enti sida ngelengka ka ramu nya, iya deka terempas lalu ngemedis ka urang bukai. Nya alai, tajapan sida lelak tauka pedis, sida enda ulih enda ngetan ka diri lalu nganti bala bukai udah sama sereta deka ngengkah ka ramu ka tanah.

Enti sema endur ngangkut ramu besemak enggau sungai. Pengawa ulih dikereja mudah agi. Sida mina ngesan ba darat sebedau ramu dipunggahka ngagai perau. Perau ka dikena ukai perau sebarang, laban iya endang perau besai digaga kena ngundan ramu besai enggau panjai. Munggah ramu ka dalam perau mega ukai mudah. Perau tau pechah kena tinggang tiang tauka ramu ti berat. Kena ngelipakka perau pechah laban ramu, sida deka ngaramka perau dulu. Udah perau karam dalam ai, sida belubah-lubah munggah ramu ka dalam perau. Udah tiang nya tadi tama dalam perau, sida nanggung perau nya tadi lalu nimba ai keluar. Lebuh datai di Nanga Drau, sida deka ngena jalai nya baru ngemansut ka tiang ari dalam perau sebedau disan niki ka darat.
Cherita ari Pengingat Niang Kadam ak. Nambi

Tuesday, June 3, 2008

Pasak Kayu Enggau Tangkal Tiang

Pasak kayu ba puchuk tiang. Lubang pasak ditebuk enggau bur kayu, pasak kayu digaga ari teras sama pemesai enggau lubang nya. Tuju pasak sama enggau kitai ngena nat besi tauka paku kemaya hari tu.
Lubang ba puchuk tiang mandang ka urang kelia ngena pasak kayu ngaga rumah sida.
Puchuk tiang enggau ujung ramu mega ditangkal. Ramu ka tepanggai ba puchuk tiang nya tadi enda ibuh agi ditan ngena paku tauka pasak.
Ba rumah panjai Nanga Drau tu, semua tiang ka didirika rebak dulu menya ngena pasak enggau tangkal ba puchuk tiang enggau ujung ramu enda kira iya ba ruai, dalam bilik, atas sadau tauka ba ruang ka bukai.
Kelimpah ari ka disebut di atas nya tadi, urang dulu kelia mega ngena pasak enggau tangkal ngaga tangga sida.

Maya urang ka tuai menya ngaga rumah tu, sida apin bisi rengka baka ka diatu. Apin bisi nat besi enggau paku lawang. Nya alai sida ngaga akal dikena nampung, ngelekat siti ramu enggau ramu ka bukai. Ramu ka deka ditampung deka digaga lubang ngambika ulih endur ngemasukka pasak, lalu puting ramu enggau puchuk tiang ditebuk lubang besegi tauka ditangkal.

Ramu ka dikena berumah endang kayu kering magang, baka teras. Nya alai rumah ka digaga nadai agi berubah taja pan umur iya udah lebih ari 80 taun.