Pasar Kaki Wong (Mulai Ka Pengingat)

Kaki Lima, Mua Pasar enggau Gelanggang Semin agi ulih dipeda datai ka saritu.

Jalai semin meraka parit ba mua tiap-tiap iti kedai

Semin segi empat ba belakang kedai endur Cina Kaki Wong nyimpan ai.

Tangga Semin nurun ngagai wharf agi ulih peda nyentuk ka saritu.

Gambar Pasar Kaki Wong Lama

Gambar Wharf Kaki Wong Lama

Pasar tu ditumbuh dalam taun 1953. Bisi Lima iti kedai Cina ba pasar tu. Mua ari ulu kedai Ambi, ditangkan kedai Ah Kaw, kedai Ah Pau (Pakong), Kedai Ah Hui lalu ujung sekali kedai Ah Bey.

Kedai Ambi, Ah Kau, Ah Pau nyual barang runcit. Kedai Ah Hui enggau Ah Bey nya kedai kopi. Nyau ka semua barang ka guna mensia mayuh, baka garam, gula, roti, ai enggau ka bukai bisi dijual ba pasar Kaki Wong. Antara semua kedai ka bisi ba pasar tu, kedai Ah Kaw pengabis iya terit lalu mayuh bansa utai dijual.

Bisi Peti surat ba puting penatai Pasar Kaki Wong. Taukey Ambi jadi ejen pos ba pasar Kaki Wong. Surat nuju bala ditu ulih diambi ba peti surat tu. Taukey Ambi mega bisi nyual minyak baka petrol tauka diesel iya ka beguna bendar dikena enjin (Motor Speed), generator enggau ka guna bukai. Bisi siti stor ba ujung kedai Ambi endur nyimpan barang ka dijual enggau ka dibeli ari mensia mayuh.

Ba mua pasar bisi gelanggang endur bemain. Bisi maya sida opis imformation datai mai tukis (Wayang Gambar). Gelanggang tu penuh laban mensia meda wayang. Selalu mega kitai meda Cina Kaki Wong bejembui utai, baka getah enggau lada ba gelanggang tu.

Bala Cina ngambi ai ari Sungai Krian, ngena enjin pam ai. Sida mega bisi generator diri empu. Ari jauh kitai ulih ninga enjin ba pasar Kaki Wong iya ka idup 24 jam.

Bisi sekeda bala menua tu gawa enggau Cina, kelebih agi kerja ngangkut barang ari wharf ka pasar, tauka mai barang ari seberai (jalai raya Kaki Wong) ka pasar Kaki Wong. Sekeda bala tu ari Nanga Drau empu, Sebubu tauka Mapar. Aku ingat ka siku urang benama Tangkun. Iya tu datai ari Sri Aman, lalu lama bendar bekuli enggau Cina ba pasar tu.

Pasar tu ngadap ngagai ai Krian. Bisi siti wharf penyangkai perau ba mua pasar, selalu penuh laban perau panjai kelebih agi bala ka datai Budu, Ulu Krian, Gerenjang, Kabo, Babang, Kerangan Rusa enggau ari endur bukai datai ngalu ngagai pasar Kaki Wong. Sida mega datai mai getah, lada enggau utai bukai ka dijual ngagai Cina Kaki Wong.

Bala ka bedagang di menua ulu Krian mayuh ngambi barang ditu.

Jambatan gantung ka lama suba nyambung pasar enggau seberai sungai. Bala ari Babang, Mapar, Sebubu, Kawang nurun ka pasar Kaki Wong nengah jambatan gantung tu. Ari seberai nyin mega jalai raya nuju ka pasar Saratok.

Sebedau bisi jalai raya ari Kaki Wong, mensia mayuh nurun kili (Saratok) ngena bot besai (Motor Alun). Cina Ah Hui mega bisi ngambi lalu nganjung bala ari menua tu ngagai jambatan urih. Ari jambatan urih baru ngena motor darat ka pasar Saratok. Udah bisi pasar Kaki Wong, Ah Hui tu siku ari Cina Kaki Wong ka terubah bendar bisi Van tambang, lalu ngambi serta nganjung bala menua tu ka pasar Saratok.

Bas (Sarawak Transport) bejalai ka Kaki Wong 5 kali sehari. Terubah iya pukul 6.00 pagi, 8.00 pagi, 10.00 pagi, 1.oo tengahari lalu ka penudi endar pukul 4.00 lemai. Nadai urang enda nemu Bas lumur 5A (Saratok - Kaki Wong). Ke penudi tu kemari, laban sida ka mai van tambang pan majak mayuh. Dia deh servis bas nyau makin kurang. Siti ari kebuah laban penyampau mensia ka ngena bas kulu kili nyau semakin mimit. Diatu nadai agi servis bas ngagai menua tu.

Diatu pasar Kaki Wong udah nadai agi. Pasar lama nyau runtuh. Urang ka pengabis dudi bedagang ba pasar Kaki Wong nya Hj Othman / Seman. Ah Kaw angkat ari pasar Kaki Wong bedagang di pasar Saratok. (Diatu nyau nadai agi bedagang). Sida Ah Hui pulai ka Kuching. Keng Ung ka nampung kedai Ambi pulai ka Sarikei. Diatu Keng Ung mai van ari Saratok, mansa Kaki Wong lalu terus ka Babang. Sida Ah Bey bekebun semak pasar Saratok. Anak Ah Bey agi bejalai ka van ari Saratok ka Kaki Wong.

Tapak pasar Kaki Wong agi bedau ulih dipeda diatu. Tang rumah kedai, wharf enggau jambatan ka lama suba nadai agi. Diatu komiti gereja St. jerome, kaki Wong ngena tapak pasar tu niri ka Dewan Serba Guna Gereja (St. Jerome's Chapel Hall).