SK Nanga Drau

Blok Kelas

Kuarters Guru Besar, Pengajar enggau Kakitangan

View Sekula

View Sekula Dipeda Ari Rumah Panjai

Nama enggau Address Sekula
Sekolah Kebangsaan Nanga Drau, Kaki Wong, Krian Tengah, 95400 Saratok.

Lokasi Sekula
Lokasi SK Nanga Drau, kira-kira 11 batu tauka 20 minit pejalai ngena kereta darat ari pasar Saratok. Enti kita datai ari pasar Saratok, kita deka mansa Jambatan Sungai Krian tauka Jambatan Urih sebedau masuk ngagai jalai Kaki Wong (3 km). Datai ba palan penganti bas Kaki Wong, ka kiba kita deka nengah siti jambatan gantung (Jambatan Gantung,. Kaki Wong) meraka ai Sungai Krian. Ari jambatan tu, kita deka bejalai kaki lebih kurang dalam 5 minit sebedau datai ngagai sekula tu. Lokasi sekula tu, betul-betul ba belakang rumah panjai, ianya rumah TR. Gana ak. Senin, Nanga Drau, Saratok.

Penyampau enggau Nama Pengajar (Nitih ka maya artikel tu ditulis)
Enam Iku Pengajar;

Encik Nelson Sigat (Gurubesar)
Encik Dominic Nair ak. Bangkang (PK1)
Encik Christopher Umpi ak. Munang (PK Hem)
Puan Lucy Mindu ak. Kayan (PK KK)
Encik Jimmy Umbol ak. Gana
Encik Sait ak. Malong

Penyampau Anembiak (Nitih ka maya artikel tu ditulis)
Tiga Puluh iku
Tahun 1 - 9 iku
Tahun 2 - 9 iku
Tahun 3 - 3 iku
Tahun 4 - 4 iku
Tahun 5 - 3 iku
Tahun 6 - 9 iku

Dulu suba sekula tu bisi lebih ari seratus iku anembiak sekula. Kelimpah ari anembiak kelingi menua tu empu, anembiak ari Krangan Rusa, Praja, Kabo, Babang enggau ari menua bukai bisi nganjung anak besekula ditu. Tang diatu, laban mayuh sekula bukai lalu jalai raya bisi kulu kili, ngemudah ka urang nganjung anak besekula ngagai endur bukai.

Sejarah SK Nanga Drau
SK Nanga Drau belabuh ditumbuhka ujung taun 1939, maya menua Sarawak pegai perintah Brooke. Jepun ngalah ka menua Sarawak taun 1941 ianya dua taun udah sekula tu ditumbuh. Pengawa sekula tu diketuka kena 24 Disember 1941 ketegal penatai Jepun enggau penanggul bukai ka nyadi maya perang dunya kedua.
Pun taun 1947, Cr Numpang ak. Abang enggau TR. Sabang ak. Empiu ngiring bala mayuh niri ka sekula baru di Nanga Drau. Rumah sekula digaga enggau jalai gotong-royong bedinding, enggau beatap ka daun. Rumah panjai ka besemak menua tu ditu, bala Nanga Drau empu, Sungai Engkabang, Mapar enggau Kawang sama bela besaup ngadu ka sekula tu. Ujung sepiak-sepiak rumah sekula nyadi ka pendiau pengajar enggau anembiak, lalu ba tengah-tengah nyadi ka bilik kelas endur belajar.
Bulan June taun 1947, Governor perintah Colony British di Sarawak, Sir Charles Arden Clarke datai nemuai ngagai rumah panjai Nanga Drau. Maya tu, Cr. Numpang ak. Abang enggau TR. Sabang ak. Empiu minta perintah colony mantu ngaga rumah sekula, lalu nyendia ka pengajar. Kelimpah ari nya, sida mega minta bantu ari Pegawai Daerah Saratok, Mr. Edward Jerah enggau Mr. Thomas Unak ari Majlis Daerah Saratok ngiga bala pengajar, ngajar lalu ngemansang ka sekula tu.
Kena 7hb Julai 1947, Mr. Philip Bedus belabuh ngajar ba SK Nanga Drau. Penyampau anembiak sekula maya tu suba bisi 50 iku, enggau 3 iti kelas ka primary 1, 2 enggau 3. Mayuh agi anembiak ka belajar ba primary 3 endang sida ka udah besekula apin Jepun datai (1939). SK Nanga Drau maya tu (1947), endang udah dipegai perintah. Pengajar, Sylabus pelajar, enggau bup endang datai ari kemendar perintah Colony British.
Bulan Januari 1948, Mr. kedai ak. Jeti ganti Mr. Philip Bedus nyadi pengajar lalu nyadi Gurubesar ba sekula tu. Maya tu menya, SK Nanga Drau kena pegai Local Authority lalu digelar District Council School. Belabuh ari maya tu, mayuh bala pengajar dianjung perintah gawa ditu nyadi ‘Assistance Teacher’. Bala pengajar tu nulung Gurbesar ngajar dalam kelas. Jam maya belajar ditetapka local authority, ianya belabuh pukul lapan pagi ngagai duabelas setengah, tengahari. Udah ngetu tengahari, sida belabuh belajar baru pukul satu, lalu badu pukul empat lemai.
Belabuh ari taun 1948, rumah sekula, rumah pengajar nyau betambah digaga. Padang ball, gelanggang badminton enggau infrastruktur bukai digaga ari bantu perintah enggau District Council. Belabuh ari maya iya ditumbuhka nyentuk ka saritu, SK Nanga Drau ukai semina ngeluarka anembiak ka udah belajar ngagai ikas ka pengabis tinggi tang mega udah megai mayuh pengawa ka besai-besai ba upis perintah enggau kompeni luar. SK Nanga Drau tu udah ngubah pendiau mensia mayuh ke diau ngelingi menua tu.

Sekeda Nama Gurubesar

Mr. Philip Bedus
Mr. Kedai ak. Jeti
Mr. Ngelai ak. Numpang
Mr. Birai ak. Dap
YB Datuk Peter Nyarok ak. Penghulu Enteri
Mr. Samuel Ali ak. Bin
Puan Bedok ak. Bujang
Mr. Empading ak. Sabai
Mr. Bayai ak. Bungin
Mr. Kuyah ak. Kurong
Mr. Kibin ak. Jaya
Mr. Nelson Sigat