Berumpang Menua

Urang ka tuai dulu kelia mindah pendiau kia-kia, ngiga menua baru ka nyamai agi endur ngidup ka diri. Sida berimba temuda, ka ulih endur bumai betupi, tanah puang ka agi bisi jelu enggau ikan ka lauk. Tambah mega, tubuh makin mayuh, anak makin nelesak. Nyalai sida beguna ka menua baru ngambi ka ulih nyamai agi endur ngidup ka diri. Nya alai dalam cherita lama tuai kitai Iban, kitai meda mayuh agi pengawa ka berumpang menua, muka menua baru kelebih agi dalam menua Sarawak tu.

Siku ari urang tuai kelia ka nampung pengawa berumpang menua tu ianya Orang Kaya Temenggung Tandok. Orang Kaya Temenggung Tandok ngulu ka bala rayat iya, bepindah ari Rimbas ka Melupa. Sida niri ka pendiau di Melupa, bumai betupi baka urang bukai.

Pendiau OK Temenggung Tanduk di Melupa enda ulih betan lama, laban bala Balau ari Banting seruran nguji deka ngalah ka Iban Saribas enggau bala sida ka udah ngentap ka diri ba menua baru di Krian enggau Kalaka. Orang Kaya Janting ngulu ka raban Balau bebalas dendam ngagai bala Iban belabuh ari menua Saribas nuju ka Krian lalu ngalah ka pendiau OK Temenggung Tandok di Melupa. Rumah panjai 16 pintu retung ditunu. Orang Kaya Temenggung Tanduk empu ulih laban bala Balau, lalu rayat iya lebih kurang dalam 130 iku, mayuh ka mati lalu sekeda ka agi idup ngerari ka diri. Tapak rumah panjai OK Temenggung Tanduk di Melupa tu disebut ‘Tembawai Alah’ nyentuk ka seharitu.

Bala ka tasah ngerari ka diri ari Tembawai Alah ngulu ai Krian, muka pendiau di Ilas, ba kaki Bukit Tengalat. Sekeda sida ka tuai ngepun ke pendiau di Ilas nya Angking ak. Anau, Gila ak. Anau, Changgas ak. Achan, Beti ak. Bana, Manju enggau Jabas. Taja pan ngentap ka diri di Ilas, pemisi baka tanah endur bumai enggau kebun agi meruan di Melupa. Sida mega agi nganjung antu (Numbak urang ka mati) di pendam Burui di Melupa.

Di sepemanjai sungai Krian raban ka bepindah ari Melupa tu besatup enggau bala Seru ka endang udah dulu agi nguan menua tu. Sida ngalah ka bala Seru, lalu muka menua di Ilas. Sekeda bala Seru ditangkap, diserah ngagai tuai Melayu di Saratok (Diatu nyadi Melayu). Sekeda bala Seru nyadi Iban lalu sekeda agi becampur nyadi Cina. Cherita Seru bechampur enggau Iban bepun ari pengawa Daong ak. Layang ka belaki ka Seru benama Sugum. Belabuh ari tu Seru nadai agi belaya enggau Iban lalu bala Seru pulai nyadi Iban.

Sepengelama udah diau di Ilas, sekeda raban tu belabuh mudik kulu ke agi. Pemuas ka matau menua, sida milih menua pala pasang, senentang Nanga Drau ka diatu. Menua tu agi puang, manah endur niri ka pendiau, mayuh jelu enggau ikan lalu tanah manah endur bumai betupi.

Terubah ka muka menua tu, sida bisi bebagi penemu. Bisi ka berumah tebing ai, lalu sekeda agi ka ngiga tanah ka jauh ari ai besai (ai Krian). Sida ka deka berumah tebing ai, nganggap ai nya pun pengidup. Sida nyamai mindah kulu kili ngiga pemakai tauka bebai ka barang, nyamai endur ngambi ai irup. Tambah mega sungai, munyi ka disebut diatas nya tadi agi mayuh ikan ka lauk. Bala ka enggai berumah tebing sungai takut ka jelu ai. Dulu kelia ai Krian sunyi. Urang ka merau kulu kili suah besatup enggau jelu ai (baya). Sida enggai ka penusah ditangkap jelu ai nyadi ba raban diri sebilik.

Nambi ak. Anyum bekering penemu deka berumah semak enggau sungai. Ku iya “Enti ulih tali perau ditanchang ba tiang rumah panjai”. Laban ka enda senentang penemu pasal pengawa berumah tu, dia deh sida berumah nitih ka ati diri empu. Bala ka rindu berumah tebing sungai, ngaga rumah tebing sungai lalu raban ka bukai ngaga rumah dalam ai Drau tauka endur bukai. (Peda artikel “Penumbuh Pengawa Berumah”).

Jabas, Chuk, Bundak enggau Antas ngulu ka bala diri empu berumpang menua. Taja pan pia, pengawa ka berumpang menua tu enda seneka ati. Sida netap ka garis antara menua. Sepiak kanan ai Krian begaris ba Teriki. Nanga Mapar nyadi antara enggau Babang. Kili ai Krian naka Kawang, Kulu naka Teberu, Sungai Kedang. (Teberu mega nyadi antara menua enggau Babang).

Cherita ditusoi Niang Kadam ak. Nambi