Dagang Bejalai

Pengawa dagang bejalai endang udah nyadi di menua Drau ditu berengkah ari kelia. Kenu ku sida ka tuai, maya pegai perintah urang putih (Brooke), masuk ngagai maya Jipun, lalu ngalih ngalih Colony British taun 1946, menua tu semampai diundang bala Laut enggau Cina ka bedagang bejalai enggau belampu. Sida mudah mudik ngagai Kaki Wong laban ditu meh endur ai pasang tepantup. Mudik kulu nyerumba pasang, lalu pulai ka ili ngundur ai surut. Mensia ka nguan menua tu mayuh. Nya ngasuh barang ka dijual nadai kala enda laku. Enti kitai meratika, pasar Kaki Wong menya didirika District Council enggau perintah ketegal laban pengawa dagang menua ulu ka mujur bendar di Kaki Wong.

Kelimpah ari bala Cina ka ngentap bedagang ba pasar Kaki Wong, pengawa sida ka bedaja niki ngagai rumah panjai endang enda kala ngetu ari kelia menya nyentuk ka seharitu. Iya ka bedaja tu bala Cina, Laut, Indon enggau kitai Iban empu. Penatai sida tu endang ari mayuh bengkah menua. Bisi ari Saratok, bisi ari Debak, bisi ari Kabong, bisi mega ari Sibu enggau Kuching, lalu urang Indon tebal agi ka datai ari Badau.

Aku ingat bendar maya pasar Kaki Wong agi bisi kelia. Cina Kaki Wong baka Bini Ah Bey (Lian) enggau bala anak Ah Hui niki ka rumah panjai bedaja kuih enggau sekelim (Ice-cream). Sida ka bedaja jarang bendar lebu. Kebuah iya pia laban bala di rumah panjai, kelebih agi bala anak mit deka bendar makai kuih digaga Cina. Ice-cream laku, laban dulu suba rumah panjai apin bisi peti ais. Maya musim panas, berebut bala nutu sida ka mai sekelim mangkuk enggau sekelim pau(Enti Cina lelaki dikumbai kitai Apek Sekelim).

Bala kitai Iban empu bisi mega datai bedaja. Utai ka didaja lebih agi barang pemakai baka ikan ulu, dagin babi menua, kasam babi enggau babi babas. Bisi sekeda mai kasam Semah ulih ari menua tunga Batang Rajang enggau bansa utai bukai ka jarang ditemu kitai rumah panjai ketegal ka nyau pedis amat digiga kemaya hari tu.

Bisi mega sekeda kitai Iban datai mai barang ka bukai. Aku ingat ka siku kitai Iban ka landik bendar nengkebang ngaga utai, ianya niang Dunging ari Rimbas selalu datai mai tinchin gaga iya empu, dikumbai urang tinchin Dunging. (Anak iru Dunging ka benama Sangking bebini ka Nanga Drau ditu). Nyau ka dudi hari tu kemari, bisi mega bala kita Iban nguji enggau urang bedaja kain. Kain ka dijual dibai ari Entikong tauka Tebedu antara menua kitai enggau Indonesia. Siku ari bala menua tu ka udah ngereja pengawa tu ianya niang Kedai ak. Jeti tauka Apai Lajun. Siti ari pemanah niang Apai Lajun menya, iya deka diutang. Bala ka meli, kelebih agi sida ka indu mayar ni naka ka ulih setiap kali iya datai.

Bisi mega raban urang Indon, datai ari Badau (masuk nengah Lubuk Antu) ketebal agi bebai kain, tajung, pua, baju urang indu enggau rengka ngepan digaga ari pirak. Sekeda sida ka datai tu mega bebai ka ikan masin, ikan salai, telu penyu, enggau sekeda pemakai bukai ari Badau ka nadai kala dipeda kitai menua tu. Bala Indon ari Badau tu suba teleba bendar enggau kami sebilik. Sida selalu nepatka bilik kami ketegal apai ka nyadi tuai rumah. Suah sida iya bemalam semalam ditu sebedau bejalai baru pagi siti ngagai rumah panjai ka besemak ditu, baka Sungai Engkabang, Sebubu, Mapar, Babang, Kawang enggau Melak. Niang indai suba kiruh bendar nyendia ka peninduk enggau mela pemakai sida ka datai. Suah agi ka nadai ngira pengiruh enggau pengerugi laban ka rindu ka sida ka datai. Indai selalu diberi sida iya kain tauka ditinggalka sida iya lauk kena meri terima kasih ka penyiru ka endur sida diau.

Suah mega urang ka datai bejual barang (lebih kurang baka direct selling). Bejual penapis ai, bansa-bansa periuk, set chapak mangkuk, barang-barang plastik kelebih agi baka bisin enggau jagan plastik ka dijual belungguk-lungguk (Mayuh bansa barang dijual sekali). Apai seduai indai bisi ampit meli set penapis ai. Bala sida ka bedaja bakatu suah bendar datai, kelebih agi enti enti bisi bala ka udah berutang ba sida. Bulan siti sida datai baru mai barang baru sambil ka ngumpul duit utang ari bala rumah panjai. *Selalu iya barang ka dijual sida ka bedaja barang bakatu, rega iya dua tiga kali lipat lebih mar agi ari di kedai. Tang ngasuh iya tau laku laban barang datai ka rumah lalu iya mega ulih dibayar enggau jalai pupuk.

Bisi siku Laut ari Debak, Enti enda salah ingat aku dikangau urang Haji Nawi enggau anak iya selalu datai bedaja kain, jam, rengka urang indu enggau barang ka bukai. Bida Haji Nawi tu enggau sida bukai ka sama bedaja tu, iya enda tentu ibuh ka barang iya dibeli ngena duit. Iya rindu amat ati enti barang iya ditukar enggau rengka lama kitai Iban. Mayuh bendar bala maya tu kemari beruah ka sadau, begiga ka baka sida raga, sida ma, duku, ilang, kain kebat enggau ka bukai. Sangka ati aku, siti ari dagang iya tu, ianya bejual rengka lama kitai Iban ngagai bala Cina di negeri din. Peda aja kedai souvenir ba sebelah Carpenter Street di Kuching din, mayuh bendar rengka lama kitai Iban dijual ngagai bala pelancong luar.

Enda ngira nama bansa urang ka datai, tauka nama barang ka didaja, bala di rumah panjai ditu enda kala leju ngulu sida. Enti enda meli rindu ngebak, lalu meratika utai ka dijual urang. Bala indu anembiak mega sama-sama bekangau pangan diri madah ka urang ka bisi datai bejual. Tu siti ari jalai sida begelumu enggau diri sama diri, lalu iya udah nyadi siti ari pengidup kitai ka diau di rumah panjai, baka di Nanga Drau ditu.